1 Peniya, ngatughalambwika, ngatujhenda kunjenga kupete ndela jha Mbwane jha Chamo, ngita Bhambo Chapanga chatulaghila, ngatutindilatindila ku kilambo chi itombe yuku Cheile kwa machiko ghamahele.

2 "Bhahe, Bhambo Chapanga nganobholila, 3 Ntinditindii hake mu kilambo chi itombe chenio, ngohe nng'alambuke nnyende upande gwa kachikachine. 4 Malobholela bhando nhwilo ghongo, mmandikii kupete ku kilambo chi itombe ya Cheile, kilambo cha akalongo bhino, ibheluko ya Echau. Bheniya nabhannyoghopa, nambo mma miho, 5 mangakomana nabho jhe nhwalo nimpengana jhe hilu pandina chehemo jha kilambo chabhe. Kilambo chenie chi itombe ya Cheile nimpile Echau ibheluko yake ibhehe jhabhe. 6 Anda mipala chakulyegha amu mache kubhoka kwabhe, chakaka ntenda kuhemela kwa madine gha chaba."

7 Bhahe nkomboke Bhambo Chapanga, Chapanga gwino pampelengine mota mu kila kilebhe chanteilingine. Ngantunjita pimakibha mukutindilatindila mu njenga jhenje ngolongwa. Bhambo Chapanga, Chapanga gwino abhii pamonga na mangota kwa yaka henge makome ncheche na mangota mpongokiwe jhe kilebhe chochoha.

8 "Yene, ngatujhendilila na mwanja gwito, ngatwapetita akalongo bhito, ibheluko ya Echau yenie yatama ku Cheile, ngatuilekite ndela jhuku jhenda ku Alaba na ilambo yuku Elate nuku Esione Gebele. Peniya ngatughalambuka kukengama ndela jhukupete njenga jhuku Moabo. 9 Peniya, Bhambo Chapanga nganobholila, ‘Mangachumbu jhe bhando bhuku Moabo hilu kukomana nabho ngondo, nhwalo nimpeke jhe mangota hilu pandina chehemo mu kilambo chabhe. Nhwalo kilambo chenie kikemitwa Ari, naapekii ibheluko ya Luto kibhehe chino.’"

10 "Makacho kilambo chenie chuku Ari bhatamita bhando twe, bhina makakala bhibhakemitwa Akaemi na bhakibha akatandamaho ngita Akaanake. 11 Ngita hela Akaanake, bhando bheniya bhamanyikina ngita Akalefai, nambo Akamoabo bhakemita Akaemi. 12 Na Akaole makacho bhatamita kwenio ku Cheile, nambo ibheluko ya Echau ngabhabhenga na kwakoma pulutu, peniya ngabhatama bhene chehemo jhenio, ngita Akaichilahele ngabhatehila helenaha kukilambo chabhapila Bhambo Chapanga kibhehe chabhe."

13 Peniya Bhambo Chapanga ngatulobholila, " ‘Ngohe mmokengane, nnyomboke kakipela Zelede.’ Bhahe ngatujhombwika kakipela keniya. 14 Ngaipeta yaka makome matato na nane kubhoke putubhoka ku Kadeshe Baneya ade kujhomboka lulambo lwa ku Zelede. Kipinde chenie, kibheluko choha cha bhando bheniya ndanga jhukuhoto kujhenda kungondo kikibha kijhomwike ngita palongila Bhambo Chapanga. 15 Jwenie Bhambo Chapanga ngajhendelela kwabula kupala kwakoma pulutu kwenio kukighono, ata bhoha ngabhajhomwika."

16 "Bhahe, bhando bhoha bhina ndanga jhukujhenda kungondo pibhatabhuka nnema, 17 Bhambo Chapanga ngannobholila kubhehe, 18 ‘Deleno namujhomboka mpaka gwa Moabo kupete kilambo chikikemitwa Ari. 19 Nanhwikila kukilambo chuku Amone. Mangachumbu jhe hilu kukomana nabho kwa nhwalo nimpee jhe chehemo jhojhoha jha kilambo cha ibheluko ya Akaamole, ibhehe jhino. Bheniya ndi ibheluko ya Loti, nimpelingine kilambo chenie kibhehe chabhe.’ "

20 Helahela kilambo chenie kimanyikina kubhehe ndi kilambo cha Akalefai. Nambo Akaamone bhakemita bhando bheniya Akazamuzumi. 21 Bheniya Akalefae bhakibha bhakajholokine hake, kabhele bhando bhina makakala na akatandamaho ngita Akaanake. Bhambo Chapanga ngabhajhomwila pulutu palonge jha Akaamole, kupala Akaamole bhatame mwenio. 22 Bhambo Chapanga ngateila hele kwa Akaedomu bhibhakibha ibheluko ya Echau, bhibhatamita kuilambo ya itombe ya Edomu. Bhambo Chapanga ngabhakomita Akahole kupala Akaedomu bhatole kilambo chenio nuku tama, na bhitama mukilambo chenio ade ngohe. 23 Peniya makacho Akaave bhibhatamita mu chenda jha muupele jha mbwane jha Meditelaniya ade muche gwa ku Gacha. Badae ngabhahikita Akafitole kuhuma kulindala lya Kafitole jhiikemwa Kilete ngabhakomelekeya, ngabhatama mwenio badala jhabhe.

24 Patujhombwika lukemba lwa Moabo, "Bhambo Chapanga ngatulaghila kulonge, ‘Ajha! Nnyimwike ntumbuu mwanja. Nnyomboke lukemba lwa Alinone. Nenga nanintenda munhotole munahota nkolongwa Sihone muamole, jwatama ku Eshibone na muche gwake. Mumpukile nu kutumbuu kutama mu muche gwake. 25 Kutumbulii ngohe nu kujhendelela mbakwatenda bhando bhoha pannema bhabhe na kiholo nu kunnyoghopa mangota. Pibhapakujhoha mihalo jhino mangota nabhalendima nukujhoghopa.’"

26 "Nganatuma bhando kuhumii kunjenga jha Kedemote bhajhende ku munahota Sihone jwa Eshibone bhahikiche malobhe gha uteeke, 27 Utujheketele kupeta mu kilambo chino. Tupeta mundela tugha nu kujhenda chomola changalyungalyunga kwalelo amu kwangejha. 28 Twenga natuhemela chukulye pamonga na mache ghitupa kunywegha chitupala kwino utujheketela tupete tu mu kilambo chino, 29 tujhomboke lukemba lwa Yoludane tujhingii kilambo chatupii Bhambo Chapanga, Chapanga gwito twenga. Helahela ibheluko ya Echau bhibhatama kwenio ku Cheile na Akamoabo bhibhatama ku Ari, ngatujheketila hele tupeta mu ilambo yabhe."

30 Nambo Sihone, munahota nkolongwa jwa Eshibone, ngatukanila kupeta mu kilambo chake. Bhambo Chapanga, Chapanga gwino, ngantenda abhe muto nnyomo na ngandango, kupala tunhotole nu kutola kilambo chake chitutama ade ngohe.

31 Peniya, Bhambo Chapanga nganobholila, dola nitumbwile kuntenamekite munahota nkolongwa Sihone na kilambo chake mu kindendeke chino, ntole kilambo chake kibhehe chino. 32 Yene, Sihone ngabhoka na bhando bhake bhoha kukomana natwenga pahina na muche gwaku Yahasa. 33 Nambo Bhambo Chapanga, Chapanga gwito, ngantenda tunhotole, na ngatunkoma jwene na yana mundo na bhando bhake bhoha. 34 Ngatutola kwa makakala muche gwake nu kukihangabhana, ngatwakoma akanalome na akakeghe na yana, tunnekite jhe mundo ghome ata jhumo. 35 Ngatutola ipugho na ilebhe yoha yambone ituikolila mwenio. 36 Kutumbuu Aloele, muche chikibhii muupele jhu lulambo lwa Alinone na muche chikibhii mu lulambo lwenio ade ku Gileade, ukibha jhe muche ghoghoha ghukibha na makakala ghukukomana na twenga. Bhambo Chapanga, Chapanga gwito ngaibhekita miche yoha mu mabhoko ghito. 37 Nambo tubhandikii jhe kilambo cha Akaamole amu ilambo ibhii muupele jhu lukemba Yaboke, amu chehemo jhojhoha jha itombe jhatukanikiye Bhambo Chapanga gwito.