1 "Anda munalome antolii mwikeghe na peniya impala jhe jwenio nhwalo akibwene kilebhe mwikeghe changakipala. Bhahe, munalome jwenio nanyandikila baluwa jhukulekana nu kumpe, peniya, mwikeghe jwenio nabhujhichwa kajhake. 2 Peniya, mwikeghe jwenio anda atoline na munalome jhonge, 3 na munalome jhuubhele na jwenio anchimwite na jwenio anyandikila baluwa jhukunneka, kumpe na kummenga pakajhake, pange munalome jwenio atei kujhomwoka, 4 bhahe, munalome jhukutumbula, jwenio ipalwa jhe kabhele kummujhii kabhele mwikeghe jwenio kubhehe nhwanamundo, kunhwalo atei ghangajheketelwa na Bhambo Chapanga. Kukutenda yene ndi kilebhe changakipala Bhambo Chapanga. Mipalwa jhe kuhenga kilebhe ngita chenio mu kilambo champii Bhambo Chapanga, Chapanga gwino kibhehe chino"

5 "Munalome jwatolii mwikeghe enoeno, angajhenda jhe kungondo hilu angapelwa jhe lihengo lyolyoha lenge. Alekwa mahulo kwa kipinde cha chaka chimo, kupala atame kajhake kukihanga nu nhwana mundo."

6 Mundo jhojhoha anda annyaikiche nnyake kilebhe angatola jhe lwala amu njiwa jhu kuyaghila kubhe pone, kutenda yene, mpakuibha ndela jhake jhu kupata chakulya kunhwalo jha ughome gwabhe.

7 Anda mundo jhojhoha pakate jhino antoii kwa makakala Mwichilahele nu kuntenda mmanda amu kunchulucha kuubhanda, mundo jwenio ipalwa akomwa. Ndi chimpakuibhikiliya ubhoho pakate jhino.

8 Anda mundo akamwii na malohe payegha, mipalwa mma miho kukengama mihilo jha akapiya litambiko Akalawe ghibhannaghalikiye. Nkengama mihilo jhoha ngita chanaghalikiye Bhambo Chapanga kutenda. 9 Nkomboka Bhambo Chapanga, Chapanga gwino chakantendii Miliamo pimikibha undela kuhumii ku Michile.

10 Anda munnyahikiche nnyino kilebhe chochoha, mangajhenda jhe kajhake kukamulila pone, 11 nambo mnnendela panja na munneka jwene annetela pone jhenio. 12 Anda nhwocho abhekite ngobho yake pone, mangatamanajho jhe kelo ndaa, 13 mmujhicha kila lichiko kimiye kupala kilo ahotola kukiyeka nu kunnombe mota. Kutenda yene ndi kilebhe chikinhanganicha Bhambo Chapanga, Chapanga gwino.

14 "Mangamponja jhe kibalua nhwocho na jwapala kilebhe, abha Mwichilahele amu jhumo pakate jha akaghene bhibhatama mu kilambo chino. 15 Kila lichiko, lyobha nukutipika jhe, munnepa malepo ghake gha lichiko lyenie, nhwalo jwenio nhwocho na malepo gheniya ndi kihobholelo cha mwojho gwake, kupala angannele jhe Bhambo Chapanga, namwe kubhehe nililemwa.

16 "Akatate bhangakomwa jhe kwa malemwa gha yana yabhe, hilu yana yangakomwa jhe kwa nhwalo jha malemwa gha akatate bhabhe. Kila mundo nakomwa kwa malemwa ghake jwene."

17 "Mangamponja jhe mundo jhojhoha chela chapalwa kupata akaghene na akakebha. Hilu mangatola jhe ngobho jha nanhwela kubhehe pone. 18 Nkomboka kubhehe mangota makibha makabhanda kukilambo chuku Michile, na Bhambo Chapanga, Chapanga gwino ngankombwila kuhumii kwenio. Ndi nhwalo ninnaghalikiya kutenda gheniya."

19 "Pimihuna mahuno ghino munng'onda nu kulibhilila manjwanjwane ghange mwenio, mangabhujha jhe kutola, nambo malekela akaghene na akakebha na akananhwela, kupala Bhambo Chapanga, Chapanga gwino ampela mota mu mahengo gwino ghoha. 20 Anda minyua uhohe gwa micheitune jhino, mangabhujhii jhe kunyua kabhele mandabhe ghake, malekela akaghene na akakebha na akananhwela. 21 Pimitongo chabibo, mangabhujhii jhe kutongola chabibo iighilike, yene, malekela akaghene na akakebha na akananhwela. 22 Nkomboka kubhehe mangota makibha akabhanda mu kilambo chuku Michile, ndi nhwalo nimpelangana mihilo jhenje."