1 Mucha ngajhendilila kulonge, "Nimpekii nhwaghulana mabhene mota amu jhe likoto. Nkomboka mambu ghanga chehemo jhojhoha pipakubhehe pakate jha ilambo ipakupelekwa na Bhambo Chapanga, Chapanga gwino, 2 anda mumujhii Bhambo Chapanga, Chapanga gwino mangota na yana ino, nu kulitembekeya lilobhe lyake kwa mwojho gwino na uhuke gwino ghoha nu kukengama malaghalikilo ghinninaghalikiya deleno, 3 peniya, Bhambo Chapanga, Chapanga gwino nankolela kiya na kummujhicha kuhumii mu kilambo champeingine na kumpela ghambone. 4 Na ata mpechangane kutale hake pannema, Bhambo Chapanga, Chapanga gwino nankonganicha nu kummujhicha, 5 kupala mwitola kabhele kilambo chibhatamita akahoko bhino. Jwene chantenda mme na mota hake nu kubhelekana hake kupeta akahoko bhino. 6 Bhambo Chapanga, Chapanga gwino chantenda mangota na ibheluko ino mme na mwojho gwa utembekelo kupala mukung'ana jhojho kwa uhuke gwino ghoha, kupala ntame mu kilambo chenie. 7 Bhambo Chapanga, Chapanga gwino, nabhabhujhichila likoto lende lyapate akamakoko bhino bhibhanchimwa nu kung'aha. 8 Mangota mulitembekeya lilobhe lya Bhambo Chapanga nu kukamuu mihilo jhake inimpekeya deleno. 9 Bhambo Chapanga, Chapanga gwino, nantenda mme na mota mu kila lihengo limuhenga, nampapa yana hoko na ng'ombi twe na mighonda jhino naipiya mahuno twe. Nhwalo napala kabhele ngita chabhapalita akahoko bhino, 10 anda namuntembekeya nu kamuu mihilo na malaghalikilo ghake ghighajhandikwe mu kitabo nu kunnyinamila Bhambo Chapanga, Chapanga gwino, kwa mwojho ghoha nu uhuke ghoha."

11 Mihilo jhinnimpeke deleno inonwipe jhe kwino, na mihoto ku itenda. 12 Ibhii jhe kunane kwa Chapanga ade nnonge, meneke nakwela kunane kwenio kutuletela, kupala tuhoto kujhoha nu kuikamula? 13 Hilu ibhii jhe kwiye jha baale ade kulonge, "Meneke jwapakujhomboka kwiye atuletele kupala tuijhoha nu kuikamula? 14 Nahi jhe, nambo ibhii pahina namangota, ibhii munnomo gwino nu umwojho gwino, kupala militembekeya."

15 Deleno, nimpelengana nhwaghule pakate jha ghambone na mabhoho, kate jha ghome anda jhe kuwegha. 16 Anda mitembekii mihilo jha Bhambo Chapanga, Chapanga gwino jhinnimpekeya deleno, nu kumpala Bhambo Chapanga gwino, nu kukengama ndela jhake nu kamuu malaghalikilo na mihilo jhake, bhahe, mpakulama nu kubhehe twe na Bhambo Chapanga, Chapanga gwino, nampela mota mu kilambo chenie chimijhenda kutama. 17 Nambo anda nhwobhite nu kukana kuntembekeya, nu kuutilwa kuijhinamii ichapanga jhenge nu kuitumikila, 18 deleno ne nintangachila kubhehe chantenda kuwegha. Milama jhe kwa machiko ghamahele mu kilambo chimijhenda kutama kubhehe chino, kwiye jhu lukemba Yoludane. 19 Niijhopa kunane na nnema ibhaha akachaide kwino kwa chela chimpa kuhaghula, nhwalo deleno jhene nimpelangana kuhaghula pakate jha ghome nu kuwegha, na kate jha mota nu likoto. Bhahe, mbaha nhwaghule ughome mangota ni ibheluko ino kupala nname, 20 mupale Bhambo Chapanga, Chapanga gwino, nu kuntembekeya nu kulombana nako. Nhwalo kutenda yene kulangii nankola ughome hoko ghukutama kukilambo chabhalapila akahoko bhino Ulahimo na Ichaka na Yakobu.