1 "Anda ubhii bhulo kate jha bhando bhabhele bhuku Ichilahele, nu kujhenda kutakalilana puudamo gwa mihalo, kwenio jhumo anda abhonikine jwangamalemwa, na jhonge jhuna malemwa, 2 jhola jwalemwite, anda ahadabwile kubulwa yato, nnyomola mihalo nannobholela jwenio agholoke pahe mangukama nu kunnapu yato nnonge jhabhe tela na lilemwa lyake lyatehile. 3 Jhuna lilemwa achwapulwa yato makome ncheche nambo yangapetelecha jhe. Anda mpeteliche yato yenie nammuntenda abha na hone nnongo gwino.

4 "Mangantabha jhe ng'ombi nnomo puntumii lihengo lyukupuluwa mbonje."

5 "Anda akalongo bhabhele akanalome bhitama chehemo jhikiteno na jhumo pakate jhabhe anda ajhomwike changaleka mwana munalome, mwikeghe jwenio angatolana jhe na mundo jhonge panja jha lukolo lwenio. Ipalwa nnongo mundo ammujhila lipwela lyenio. 6 Mwana jhulitibho munalome jwapakubhelukwa nabhalangilwa kubhehe mwana mundo, kupala liina lyake lyangahobhelela jhe kukilambo chuku Ichilahele. 7 Nambo anda nnongo jwenio jwawile ampahi jhe mwikeghe lipwela jwenio, bhahe, mwikeghe jwenio akijhendela nnonge jha ighogholo bhi kilambo nu kulonge, ‘Nhwacha jwa anganabhango jwawile ipala jhe kujhendekeya liina lya nhwachamundo jwawile ku Ichilahele, ikana kulenganikiya ghapalwa kutenda pakate jha bhando bha Ichilahele.’ 8 Peniya, ighogholo bhi kilambo bhinkema munalome jwenio kulonge nako. Anda najhendelela kukamulila malobhe ampahijhe kummujhila, 9 mwikeghe jwenio nannyendela jwenio nnonge jha ighogholo bhi kilambo, nanhula lighubache lyake na kunhune mata kumiho na kunnobholela kubhehe, ‘Yene ndi chiipalwa kuntende mundo jwakana kumpeke nhwacha mundo ibheluko.’ 10 Na liina lya nyumba jhake ku Ichilahele ibhaha, ‘Nyumba jha mundo jwa hulitwe lighubache.’ "

11 "Akanalome bhabhele anda bhitenda kubulana na mwikeghe jwa jhumo pakate antangatii unganamundo kwa kukamula makengele gha jwabulana na unganamundo, 12 mangammone jhe kiya mwikeghe jwenio, nambo mulueketa lubhoko lwa mwikeghe jwenio.

13 "Mangabhe jhe niipemo ya aina ibhele yukupemela, chimo kitopahu na chenge kijhojhohu. 14 Hilu mangabhe jhe na aina ibhele yi ipemo yu kupemela, chimo kikolongwa na chenge kichokombe. 15 Ntumiya kipemo cha uchakaka, kupala ntame kwa machiko ndii mu kilambo champelangana Bhambo Chapanga, Chapanga gwino. 16 Bhoha bhibhatenda ilebhe yenie yukolowa, Bhambo Chapanga, Chapanga gwino, abhachimwa bhando bheniya.

17 "Mikomboka itendwa ya Akaameleke yabhantendila pimikibha umwanja kuhumii ku Michile, 18 Akaameleke bheniya bhakannyogwipe jhe Chapanga, yene ngabhannyingilila kukunyobhela kuhumii unyuma, kongo ntotokile na kwakoma bhala bhibhakwabhita kachoko kone bhatotokalile. 19 Yene, kipinde Bhambo Chapanga, Chapanga gwino, papakuntenda njelembo kubhoke pukujhingililwa na akamakoko bhino bhoha bhibhantindikii mu kilambo champii kubhehe chino nu kutama mwenio, makoma pulutu Akaameleke bhoha, bhangakombokwa jhe pahe jha nnema."