1 "Kila pukipehekela chaka cha chaba malekekeya bhimakopile. 2 Naha ndi chimipalwa ntenda kila jwankopile Mwichilahele nnyake, aliputa lighambo lyenie, mangajhenda kundahe lighambo lyenio, nhwalo Bhambo Chapanga jwenie kulekekeya maghambo gheniya. 3 Mihoto kwaghamba akaghene nambo akalongo bhino Akaichilahele, mangaghamba jhe.

4 "Bhambo Chapanga, Chapanga gwino, nampela mota mu kilambo chino champii kubhehe chino, apitii jhe ata jhumo jwapakubhe nhwocho pakate jhino, 5 anda tugha namnyokanikiya Bhambo Chapanga nu kuikamuu mihilo jhake jhinnighalikiya deleno. 6 Bhambo Chapanga, Chapanga gwino nampela mota ngita chalaghila. Namangota namajhahikicha bhando twe, nambo mangota nanyahika jhe. Kabhele nannongocha ilambo twe nambo mwenga nannongochwa jhe.

7 "Anda abhii nnongo gwino nhwocho mu miche jhojhoha jhampii Bhambo Chapanga, Chapanga gwino, mangabhe na chojho jhe na mangaleka jhe kuntangatila. 8 Nambo mipalwa mujhahikicha kwa mwojho gwambone kilebhe chochoha chakipala. 9 Mukilolokeya umwojho gwino pangapitii jhe na liwacho libhoho, kulonge chaka cha chukulekekeya maghambo kibhandikile, nu kukana kumpe kilebhe nnongo gwino, jwenio ahoto kunnelela Bhambo Chapanga kunhwalo gwino mwenga, yene mihoto kubhehe nu uhakaho. 10 Mupele nnongo gwino nhwocho kwa mwojho gwambone pangakokoleka, kukutenda yene Bhambo Chapanga, Chapanga gwino nampela mota mu mahengo ghino ghoha na kila kilebhe chimpa kuhenga. 11 Akahocho bhabhii pannema machiko ghoha, yene ninaghalikiya kubhehe mma na mwojho gwambone kwa akalongo bhino akahocho mu kilambo."

12 "Anda abhii nnongo gwino Mwichilahele munalome amu mwikeghe anda ahikite kwino antumikile ngita mmanda kwa yaka chita alepwa chakighana, mipalwa munnekekeya mahulo chaka cha chaba. 13 Namwe pumpa kunnekekeya mahulo manganneka jhe abhoka mabhoko matopo. 14 Mupela kwa mwojho kukuhangana ilebhe ino inkwete kubhoke mu mota yampii Bhambo Chapanga, mambelele na mahuno na divaye. 15 Nkomboka kubhehe mangota makibha akabhanda kukilambo chuku Michile na Bhambo Chapanga, Chapanga gwino ngankombwila, ndi nhwalo deleno ninnaghalikiya gheniya."

16 "Nambo anda ntumiche gwino alongii, ‘Nibhoka jhe pakajhino pano,’ nhwalo nighana mwenga na akalongo bhino na apaii jwene kutama na mwenga, 17 peniya muntola ade pannyango gwa nyumba jhino na peniya nhotola lichikilo lyake kwa luchungulo, na jwenio nabhaha mmanda gwino machiko ghoha ghangapeta. Ntenda helahela kwa mmanda gwino mwikeghe. 18 Mangabhina mwojho jhe pumunnekeke mmanda gwino mahulo, nhwalo antumikii kwa yaka chita kongo mnepita nucho jha ghala ghighapalitwa kulepwa kwa mundo jwa kuhenga mahengo ghino. Ntenda yenie, Bhambo Chapanga, Chapanga gwino nampela mota kwa kila chimpa kuhenga."

19 "Mupiikiya Bhambo Chapanga, Chapanga gwino mapongo gha ng'ombi ino na mambelele ghino ghighatumbwila kubhelukwa, na mangape jhe lihengo lyolyoha ng'ombi yenie na mambelele mangaghacheku jhe mangoma. 20 Kila chaka, mwe na yana ino mmemene nyama jhi inyama yenie nnonge jha Bhambo Chapanga, Chapanga gwino chehemo jhela pahagwii Bhambo Chapanga, Chapanga gwino. 21 Nambo kinyama chenie akibhii na malola ghoghoha ngita hela kuchepela amu kihakanaho amu kibhii ni kilema kikolongwa amu jwangalola, mangapiya jhe litambiko kwa Bhambo Chapanga, Chapanga gwino. 22 Mmemena nyama jhenie kajhino, bhando bhangajheketelwa na Bhambo Chapanga na bhibhajheketelwa na Bhambo Chapanga bhihoto kumemena nyama jhenie ngita chimimemena nyama jha mbabhala amu oloko. 23 Nambo mangalye jhe myahe jhake, myahe jhenie, mijhitila pahe ngita mache pwaa.