1 Ghanga ndi malobhe ghalongila Mucha kwa bhando bhoha bhuku Ichilahele kipinde chibhakibha ku kingalennema upandi ghulipitii lyobha mwa Yoludane ghubhii ku Alaba, ghulolikihana na miche jha Sufu, pakate jha kilambo cha Palane na Tofeli na Labani na Hezilote na Dizahabo. 2 Kuhumii pikitombe Holebo ade Kadeshibameya kupete ndela jha kitombe chiku Seile mwanja gwa machiko kome na limo. 3 Lichiko likutumbula lya mwehe gwa kome na ghumo, chaka cha makome ncheche, kuhumii pamabhoka ku Michile, Mucha ngabhatangachila Akaichilahele ghalaghalikilwa na Bhambo Chapanga abhalobholele. 4 Atehila yene kubhoke kunhotola munahota nkolongwa Sihone jwa Akaamole jwalongwicha kubomane jha Heshibone, na kwenio ku Edilei nganhotwila Ogu munahota nkolongwa jwa ku Bashane jwalongwicha ku Ashitalote. 5 Mucha ngatumbwila kwalobholela bhando mihilo jha Chapanga kipinde pibhakibha kwiye ya lukemba Yoludane upandi ghulipitii lyobha ku kilambo chuku Moabo.

Ngalongila yene,

6 "Putukibha ku Holebu kukitombe chikikemwa Chinae, Bhambo Chapanga gwito ngatulobholila kubhehe, ‘Ntamingine kwa machiko ghamahele pikitombe chenje, 7 ngohe ntwekule ighono ino nnyendelele na mwanja. Nnyendengane ku kilambo chiku itombe ya Akaamole nu chehemo jha ilambo ya pahina ku Alaba, ku itombe na lulambo, ku Negebo na chehemo jha mbwane, ena, nnyendengane ade kilambo chiku Kanaane, nuku Lebanone, mpaka kulukemba lukolongwa lwa Efulate. 8 Nenga Bhambo Chapanga nakalongile kilambo chenje choha napekii akahoko bhino Ulaimo na Ichaka na Yakobu na ibheluko yabhe, nnyendengane makatole ibhaha jhino.’ "

9 Mucha ngabhalobholila bhando kubhehe, "Putukibha kukitombe chuku Chinae, ne nikannobholile yene, ‘Nenga kanjikajhango kwalongocha mangota bhoha lihengo likolongwa hake. 10 Bhambo Chapanga, Chapanga gwino, antehilingine nnyolokane kubhehe bhamahele, deleno mmi twe ngita ndondo yukunane kwa Chapanga. 11 Bhambo Chapanga, Chapanga jwa akahoko bhino, anyonjekeye mme twe mala pa elufo kupeta chimii ngohe nu kumpe mota ngita chalaghila! 12 Nambo kanjika ndo nanhoto bhole kuhenga lihengo lyenio litopaho likujhelenicha kukwapana kwino na mang'ahe ghino? 13 Nhwaghulane bhando kuhumii kila likabila bhina malango, umanye na bhina kutembekelwa na bhando, kupala nabheke bhabhe ilongoche bhino.’ 14 Mangota ngannyeketila, ngunyangwila, ‘Nhwalo ghunnongii gwamaha.’ 15 Yene, nganatola ilongoche bhina malango na bhina umanye na bhibhajhokanikiya, bheniya ndi bhimahagwila kuhumii mu makabila ghino, nganabheka kubhehe ilongoche bhino. Bhange bhakibha ilongoche ya likunde lya bhando elufoelufo, bhange bhakibha ilongoche ya likunde lya bhando miyamiya, bhange bhakibha ilongoche ya likunde lya bhando amchineamchine. Helahela bhange bhakibha ilongoche ya makabila.

16 "Kipinde cheche nganapila mihilo akakenga bhino kulonge, ‘Nnyokanikiya mihalo jha bhando bhino. Nhwadabula chakaka chiipalwa paudamo pakate jha mundo na nnongomundo amu nng'ene jwaitama pamonga namangota. 17 Mangannoleke jhe mundo kumiho pimihadabula, majhokanikiya bhoha changajheghemeke kumo, akanahota amu yana. Manga nyoghopa jhe mundo jhojhoha, nhwalo luhadabulo ndi lwa Chapanga. Andaubhii nhwalo unonopaho hake kwino, unetela ne nanyokanikiya.’ 18 Kipinde chela, nganinnaghalikiya ilebhe yoha ipalwa kuhenga."

19 "Ngatutehila ngita Bhambo Chapanga, Chapanga gwito chatulaghalikiye. Ngatutumbwila mwanja kubhoka ku Holebo ku itombe ya Chinae, ngutupete kunjenga ngolongwa jhijhoghoha lela limuliwene, kukupete ndela jhu kujhenda ku kilambo chitombe ya Akaamole. Yene ngatuhikita Kadeshi Beneya. 20 Peniya, nganninobholila kubhehe, ‘Ngohe nhwikite kukilambo chi itombe ya bhando bhuku Amole, jhatupii Bhambo Chapanga, Chapanga gwito. 21 Dola, Bhambo Chapanga, Chapanga gwino akibhekite kilambo nnonge jhino, ajha nnyendengane, makatole ibhaha jhino, ngita Bhambo Chapanga, Chapanga jwa akahokobhino chibhalobholila. Mangajhoghopa jhe hilu kuhengeleka mwojho.’

22 "Nambo mangota mabhando bhoha ngunhikila, nu kulonge, ‘Twalongoleye bhando nnonge jhito, kupala bhakalingukiye kilambo nu kutulangii ndela jhitupala kupeta, na miche jhitupala kuijhendela kwenio.’

23 "Kilebhe chenie nganikibhona chamaha hake, yenie nganahagwila bhando kome nabhabhele, mundo jhumo kila likabila. 24 Bhando bheniya ngabhajhenda kuilambo yiitombe, ngabhaika pululambo lwa Eshikole, nukulingukiya chehemo jhenio. 25 Pibhabhujhita, ngabhatugheghila uhohe ghukulye kuhumii kilambo chenie na ngabhatulobholila kubhehe kilambo chenie chatupela Bhambo Chapanga, Chapanga gwito, kilambo chikibholii hake."

26 Nambo mangotamwe mukajhokanikii jhe mihilo jha Bhambo Chapanga, Chapanga gwino, kukana kujhenda ku kilambo chenio. 27 Ngankokolikiya mu mahema ghino, kulonge, Bhambo Chapanga itenda kutuchimwa, yene atubhoite ku kilambo chuku Michile, na kutuleka mumabhoko gha Akaamole bhatukome. 28 Nhwalo ghani tujhenda kwenio? Tutenda kujhoghopa. Bhando bhitatumita kwenio bhatulobholii naha, bhando bha kwenio ni akatandamaho hake na bhina makakala kutupeta twenga, na bhitama mu miche itindikilwe mapamanda matandamaho ade kulihunde. Kabhele bhalongii kubhehe bhabhwene bhando bhakolonga bha ibheluko ya Akaanake.

29 "Nambo nenga nganongila kubhehe, ‘Mangajhoghopa jhe bhando bheniya. 30 Bhambo Chapanga, Chapanga gwino, jwannongolela, ndi nankomanila ngita hela channolita chankomanila pankombwila kubhoke ku Michile, 31 nu kunjenga. Ngannolita Bhambo Chapanga, Chapanga gwino chabhagheghita kwa mwanja gwino ghoha kila chehemo ngita tate chaghegha mwanamundo ade kuika pamba.’ 32 Pamonga nukwalobholela gheniya ghoha, mangota mukanhobholijhe Bhambo Chapanga gwino, 33 jwenie ndi jwannongwicha mundela, nukumpalikiya chehemo pukubheka kighono. Kilo ngannongwiya ku luheke lwa mwotu na muhe kulihunde kupala kumulikila ndela jhimijhendela."

34 "Bhambo Chapanga ngajhoa kukokoleka kwino nganchimwa, ngalapila kulonge, 35 ‘Abhii jhe mundo hilu jhumo pakate jha kibheluko chenje kibhoho jwapakukibhona kilambo chikibholile chela chanalaghi kwape akahoko bhino. 36 Kalebo mwana jwa Yefune ndo jwapakujhingii kwenio. Nane mbakumpe kilambo chenie chajhawila kulingukii kibhehe chake jwenio pamonga na ibheluko yake kwa nhwalo jhukuhobholeka hake kwango.’ 37 Nhwalo gwino mangota Bhambo Chapanga nganjimwa na nenga hele, ngalongila, ‘Hilu mwenga ma Mucha mijhingii jhe mu kilambo chenie. 38 Nambo Yochuwa mwana jwa Nune ndi ntangatila jwino, naika kwenio. Kwa yene munkwimicha mwojho nhwalo jwenie ndi jwapa kwalongoya bhando bhuku Ichilahele bhakatame kilambo chenie kibhehe chabhe.’

39 "Peniya, Bhambo Chapanga ngatulobholila twe twabhoha kubhehe, ‘Yana ino imipwelela kubhehe nabhakamulwa nu kutolwa kwa makakala na akamakoko bhino, nhwalo yana yenie yanamanya jhe mabhoho na ghambone, bheniya ndi bhibhapa kujhingii mu kilambo chenio, nane naniipela kilambo chenie nabhene nabhakitenda kibhehe chabhe. 40 Nambo mangotamwe, nng'alambuke na nkelebhuke nnyende ndela jhi kunjenga upande gwa Mbwane jha Chamo.’

41 "Peniya, ngunyangwila kubhehe, ‘Twenga tutehi malemwa palonge jha Bhambo Chapanga, ngohe natukomana ngita Bhambo Chapanga, Chapanga gwito chatulaghalikiya.’ Yene, kila mundo ngakilenganikiya tela kukomana ngondo, kongo nhwachilangana kubhehe nakibhaha kilebhe kijhojhoho kukibula kilambo chenie cha itombe."

42 Nambo Bhambo Chapanga nganobholila nenga, "Makanakiya bhando bheniya bhanga jhenda jhe kukomana nhwalo mijhe pamo na bheniya, bhakoto kujhenda nabhachwapulwa na akamakoko bhabhe. 43 Yene ne nganinnobholila gheniya, mangota machikilo majhomo. Nambo ngankana kukengama lilaghalikilo lya Bhambo Chapanga, na kindume chino ngamujhawila kukilambo chi itombe kukomana. 44 Peniya, Akaamole bhibhakibha bhatamita kilambo chenie chi itombe ngibhahelila ngita njuche, na ngabhambulita kuhumii ku Cheile ade ku Olima. 45 Yene, ngankelewika, ngamunelila Bhambo Chapanga, nambo Bhambo Chapanga akannyokanikii jhe hilu kunnyali."

46 "Bhahe, ngantama kwenio ku Kadeshi kwa machiko ghamahele, kipinde choha ngantamita kwenio."