1 "Kipinde Bhambo Chapanga, Chapanga gwino papakwakomelekeya bhando bhala bha mu kilambo champela kibhehe chino, nu kutama munyumba yabhe na miche jhabhe, 2 kwenio mihaghula miche mitato mu kilambo chenie chapakumpe Bhambo Chapanga, Chapanga gwino, kibhehe chino. 3 Namaghana kilambo chenie champela Bhambo Chapanga, Chapanga gwino chehemo itato na kila chehemo jhimo nhaghula muche gwa kutilila. Peniya ntendekeya ndela jhipakwatenda bhando kuika kwenio kajhombe. Kupala mundo ankomite nnyake ahoto kutilila pakate jha miche jhenio abha njelembo. 4 Mundo anda nkomite nnyake changanamii, najwenio akibha likoko jwake jhe, ahoto kutilila ku muche ghumo pakate jha miche jhenio, nu kughombola ughome gwake. 5 Tulonge, mundo ahoto kujhenda na nnyake kuliheghejha kutina hanjo, nikipinde chikupenguu luhanjo, libhagho likolike mumoko gwake, nu kunkoma nnyake, mundo jwenio ihoto kutilila pakate jha muche ghumo kughombola ughome gwake. 6 Nambo anda muche gwenio ngaubhe ghumo tuu ghu kutilila na ubhii kutale hake, nnongo jwapakubhujhichila, ahoto kunkengama kwa lilaka likolongwa hake nu kumpukila mundo jwenio jwakomite, pamo akwete jhe luhadabulo lwa kunkoma jwakomite na bheniya bhabhele bhakibha jhe na bhulo pu kutumbula! 7 Ndi nhwalo ninnaghalikiya mmaghaniche miche mitato."

8 "Kabhele anda Bhambo Chapanga, Chapanga gwino, anda ajhonjekii mipaka jha kilambo chino, ngita palaghina na akahoko bhino, nukumpelengana mangota kilambo choha chalaghila, 9 peniya nahuaghula miche mitato jhenge. Bhambo Chapanga, Chapanga gwino najhonjekeya mipaka jhino, nu kukamuu mihilo yenie jhoha jhanaghalikiya deleno na kumpala Bhambo Chapanga, Chapanga gwino nu kutama tela na mabholo ghake, 10 kupala bhando bhangamalemwa bhangakomwa jhe mu kilambo chino champe Bhambo Chapanga, Chapanga gwino, kubhehe chino, nu kubhalangilwa mabhoha kubhehe malemwa ghu kukoma."

11 "Nambo mundo anda abhii likoko jwa nnyake, anda annyobhile nu kunnyingilila nu kunkoma, peniya kutilila muche ghumo pakate jha miche jhenio, 12 peniya ighogholo ya muche gwino bhituma bhando bhakammoye umuche gwenio ghu kutilila nu peniya mundo jwenio apela kulepechela kunhwalo ghu kukoma, na jwenio ahoto kunkoma. 13 Mangamone jhe kiya, nambo muibhilikiya ukokotoko gwa kukoma mundo jwangalemwa mu Ichilahele, kupala ntama njelembo."

14 "Pumpakujhingii mu kilambo chenie champe Bhambo Chapanga, Chapanga gwino, mangahegheke jhe mipaka jha nnyino jhibhekwite na bhala bhibhatumbwile kuhumii makacho."

15 "Uchaile gwa mundo jhumo ukwela jhe kunhadabuu mundo nhwalo gwa lilemwa lyolyoha amu ubhoho ghoghoha gwateile. Nambo ipalwa ubhaha gwa bhando bhabhele amu bhatato tu ndi ghupalwa. 16 Anda nalongela uwange kupala kuntakalila mundo jhojhoha kunhwalo ghu lilemwa lyolyoha, 17 bhahe, jwenio na mundo jwantakalile kunhwalo gwenio bhijhenda jhukunyinamila Bhambo Chapanga na nnonge jha mpiya litambiko na akakenga bhibhabhii kuhumii mu lihengo kipinde chenie. 18 Akakenga nabhalingukiya maha nhwalo gwenio na anda mundo jwalolite nu kujhoha nhwange na antakalile nnyake kuwange, 19 peniya muntenda ngita chapata kuntendela nnongomundo. Yene ndi chimpakuibhilikiya ubhoho panakate jhino. 20 Bhando bhange pibhapakujhoha nu kujhoghopa, nu ubhoho ngita gwenio nautendeka jhe panakate jhino. 21 Mangabhone jhe kiya bhando ngita bheniya. Malepo ghake ghanga, Jwapakukoma najwenio hele akomwa na jwapakummoha liho nnyake na jwenio hele akolopolwa liho na jwapakung'onyola lukongono lwa nnyake na jwenio hele akolong'olwa lukongono."