1 Mucha ngabhakemita pamonga Akaichilahele bhoha na kwalobholela, "Mangota Makaichilahele mijhokanikiya mihilo na malaghalikilo ghinilonge deleno nnonge jhino. Mikibhole gheniya nukughahenge lihengo ngita chiipalwa. 2 Bhambo Chapanga, Chapanga gwino, ngatenda lilaghano pamonga natwenga kukitombe cha Holebo, liina lenge kikemwa Chinae. 3 Bhambo Chapanga kabhekite jhe lilaghano lyenie na ighogholo bhito tu jhe nambo ngabheka pamonga natwenga hele tutubhii ghome pamba deleno. 4 Bhambo Chapanga ngalongila na mangota miho kwa miho kwenio kukitombe panakate jha mwotu. 5 Kipinde chenie nenga nakajhemite pakate jhino mangota na Bhambo Chapanga, nganintangachila malobhe ghalongila Bhambo Chapanga, nhwalo mangota mujhoghopa mwotu na makahobhwike jhe pikitombe.

"Bhambo Chapanga ngalongila naha, 6 ‘Nenga ndi Nabhambo Chapanga, Chapanga gwino, jhunimmohita ku Michile kwamakibha makabhanda.’ "

7 "Mangajhinamii jhe ichapanga henge nambo ne tugha.

8 "Mangatendekeyajhe inyagho jha ichapanga yukubhacha kunhwalo gwa Chapanga, hilu jhukulandanikiya nikilebhe chochoha chikibhii kunane kwa Chapanga, amu chikibhii pahe pannema amu chikibhii umache pahe jha nnema. 9 Mangajhinami jhe hilu kuitumikila, nhwalo nenga ndi Nabhambo Chapanga, Chapanga gwino, Chapanga jhumii nulupemelo. Kwahadabuu yana kwa malemwa gha ibheluko bhabhe, kutumbulii kibheluko chatato na cha ncheche na bhoha bhibhangana. 10 Nambo nalangi upalo gwango bhando maelufo bhibhambala nu kukamuu malaghalikilo ghango.

11 "Mingililonge jhajhe jhe liina lya Bhambo Chapanga, Chapanga gwino, nhwalo ne Nabhambo Chapanga naninneke jhe mundo kunhadabula jwaitenda yenie.

12 "Muikamula Lichiko li Kupomolela nikukibheka kubhehe nyahinyahi ngita chininaghila Nenga Nabhambo Chapanga gwino. 13 Machiko chita nhwenga mahengo ghino ghoha nu nhwenga mihalo jhino jhoha, 14 nambo lichiko lya chaba ndi Lichiko li Kupomolela, lyenie libhekwitwe kwa nhwalo gwango. Lichiko lyenie mangota mangahenga jhe lihengo lyolyoha hilu mwana gwino munalome amu mwana gwino mwikeghe, amu ng'ombi jwino amu liponda lino amu kinyama chino chochoha na nng'ene jwabhii pakajhino na mangota, kupala mmanda gwino munalome nu mwikeghe bhapomolela hele ngita pimipomolela mwenga. 15 Mangajhewa jhe kubhehe namangota mukibha makabhanda hele ku kilambo chuku Michile, Bhambo Chapanga, Chapanga gwino, ngammohita kwenio kwa makakala ghulubhoko na lubhoko luluhandambwile, ndi nhwalo ninhwamulicha kulikamula Lichiko li Kupomolela.

16 "Maichimu tategwino na majhegwino ngita Nabhambo Chapanga, Chapanga gwino chanaghalikiya, ntenda yene kupala nname machiko ndiii ni ilebhe ino inyendela telatela pikilambo chammpela Bhambo Chapanga gwino."

17 "Mangakoma jhe.

18 "Mangatenda jhe ngongola.

19 "Mangajhibha jhe.

20 "Mangapiya jhe uchaide ghuwange kwa nnyino.

21 "Mangannoghe jhe nhwana gwa nnyino hilu mangahuti jhe nyumba jhake amu nng'onda gwake amu mmanda gwake munalome amu mwikeghe hilu ng'ombe jwake amu liponda lyake hilu kilebhe chochoha chakwete.

22 "Ghanga ndi malaghalikilo ghannobholila Bhambo Chapanga kulilobhe likolongwa kuhumii pamwatu na pilihunde tyoo, nu lubhendo tyoo kipinde chimikibha nkonganike pikitombe hilu ibhii jhe mihilo jhenge. Kuhumii peniya ngajhandika mwiibao ibhele ya maghanga, ngambila."

23 "Kipinde kitombe choha pikijhakita mwotu na pimijhohina lilobhe kuhumii pulubhendo, ilongoche bhino na akanahota bhino bha makabila ngibhanhikilila, 24 nu kulonge, ‘Nnola! Bhambo Chapanga, Chapanga gwito atulaite twenga ung'alicho na makakala gwake nkolongwa putujhohina akalongela kuhumii pamwotu! Deleno nnolite kubhehe Chapanga ulonge na bhando bhakawi jhe nambo ngabhajhendelela kubhehe ghome. 25 Nambo ngohe kunike tupala kuwegha? Nhwalo mwotu ogho nkolongwa upakutukoma, anda tujhohine kabhele lilobhe lya Bhambo Chapanga, Chapanga gwito tupakuwe. 26 Bho, abhii mundo jwajhohine lilobhe lya Bhambo Chapanga abhii ghome akilongela kuhuma pamwotu ngita chitujhohine twenga nu kujhendelela kulama? 27 Mbaha mwe ma Mucha, nnyende mukannyokanikiye ilebhe yoha yalonge Bhambo Chapanga, Chapanga gwito, kubhoke peniya, mmujha mutulongolela ilebhe yoha ghalongile. Twenga natunnyokanikiya nukuhenge lihengo.’ "

28 "Na Bhambo Chapanga ngajhoha malobhe ghino, nganobholela nenga, ‘Nyohine malobhe ghibhalonge bhando abha, bhalonge ghambone. 29 Machiko ghoha ngabhatenda ngita naha kwa mwojho gwenio gwa kunyokonikiya nu kughahenge mahengo malaghalikilo ghango, ghoha angota pamonga na yana yabhe ilebhe yabhe ngayajhendii telatela machiko ghoha ghangapeta. 30 Na ngohe nyende makalobholele bhabhujhe mu mahema ghabhe. 31 Nambo mwe ma Mucha ntame pamba na nenga, na nenga mbakumpe mihilo jhango na malaghalikilo na hadabulo yango yoha impa kwabhola bhakamule kukilambo chimbakwape kibhehe chabhe.’ "

32 "Mabhando bhuku Ichilahele mma miho kukila kilebhe chahamulicha Bhambo Chapanga, Chapanga gwino. Ntenda kila kilebhe ngita chilaghilwe. 33 Maghakamula ghoha kupala ilebhe ino inyendela telatela na kupala nnyendelela kubhehe ghome, mu kilambo champii Bhambo Chapanga kubhehe chino."