1 "Peniya, ngatughalambwika kujhenda ku Bashane, munahota nkolongwa Ogu, ngaikita na akakomana ngondo bhake bhoha kukomana ngondo natwenga pahina na muche ghuku Edulei. 2 Nambo Bhambo Chapanga nganobholila kubhehe, ‘Mangannyoghopa jhe, nhwalo namunhotola kumbula na kilambo chake choha. Chamtenda ngita chimintendila Sihone, munahota nkolongwa jwa Akaamole jwalongwicha kukilambo chiku Heshibone.’

3 "Yene, Bhambo Chapanga, Chapanga gwito ngammekita Ogu munahota nkolongwa jwa ku Bashane pamonga na akakomana ngondo bhake bhoha, ngatwakomalikiya, akahighilike jhe ata jhumo. 4 Ngatutola miche jhake jhoha, ubhii jhe hilu ghumo ghutulekite. Miche jhenie jhoha jhituipukile ikibha makome chita, miche jhenie jhoha ikibha muchehemo jha Alugobo jhilongwichwa na Ogu, munahota nkolongwa jwaku Bashane. 5 Miche jhoha ikatindikilwe mapamanda matandamalo, ghighakibha na matangala ghighadinditwa na mikolokote. Helahela pakibha na chenda mbwe yangatindikilwa na mapamanda. 6 Yene, ngatuhangabhina kila kilebhe kwenio, ngatutilulina miche na kwakoma akanalome na akakeghe na yana pyepye, ngita chituteila kwa Sihone, munahota nkolongwa jwaku Heshibone. 7 Nambo ipugho na ilebhe itupukila kungondo ngatutoila.

8 "Kipinde chenie ngatutoila ilambo kuhumii kwa bheniya akanahaota bhabhele bha Akaamole upande ghulihumii lyobha kwiye jha lukemba Yoludane ade pakate jha kipela cha Alunone na itombe ya Helumone. 9 Akachidone bhuukema kitombe chenie cha Helumone Sirione, na Akaamole bhuukema kitombe chenie Senile. 10 Ngatutoila miche yoha yumundika na chehemo jhoha jha Gileade na Bashane ade ku Saleka nuku Edulai, miche ya munahota nkolongwa Ogu, kwenio ku Bashane."

11 Munahota nkolongwa Ogu, kanjika ndi jwakahighalike pakate jha Akalefai. Kindanda chake kikatenganichwe kwa choma, kikibha nuutandamaho gwa fute kome nuubhele na ukendaho gwake fute chita, kwa ipemo yituyobhalile. Kindanda chenio kibhii ku muche gwa Akaamole mwa Laba.

12 "Pututoila kilambo chenie, nganapila likabila lya Leubene na Gade chehemo jhukutumbulii kachikachine mwa muche gwa Aroele pahina na Alunone na nucho jha chehemo jha itombe ya Gileade, pamonga na miche jhake. 13 Chehemo jhihighalike jha Gileade pamonga na Bashane jhoha jhilongwichwa na Ogu, chenio ndi kilambo chikikemitwa Alugobu, nganapila likabila lya Manache. Kipinde chenie Bashane imanyikina ngita kilambo cha Akalefai."

14 Yailu, mundo jwa likabila lya Manache, ngatola kilambo choha cha Alugobo, yane Bashane ade kumpa gwa Geshule na Maaka. Chenda yoha yenie ngaikema liina lyake Hawote Yailu.

15 Bhando bhulukolo lwa Makile bha likabila lya Manache nganapila ku Gileade, 16 na likabila lya Leubene nganapila kuhumii Gileade ade lukemba Alunone. Mpaka gwabhe kwa upande gwa kuchine ukibha lukemba na upande gwa kachikachine ukibha lukemba Yaboke ndi ghupakana na kilambo cha Akaamole. 17 Upande ghulitipikii lyobha kilambo chabhe kikajhenii ade lukemba Yoludane, kuhumii lilabha lya Galilaya upande gwa kachikachine, kikahelelii ade mbwane jha Alaba, yane Mbwane jha Mwinyo, ade mihelelo jha Pisiga kwa upande ghulihumii lyobha.

18 "Kipinde chela nganapeila malaghalikilo ghanga, ‘Bhambo Chapanga, Chapanga gwino, ampekii kilambo chenje kulihumii lyobha mwa lukemba Yoludane kibhehe kilambo chino. Ngohe mangotamwe mmanganganga pakate jha akalongo bhino, ntolangane chilaha nnyomboke lukemba Yoludane kongo mmii nnonge jha akalongo bhino Akaichilahele. 19 Nambo akaanabhino na yana ino na ipugho ino naighalika mu chenda inimpilingine. Manye mmii na ipugho twe hake. 20 Matangatile akalongo bhino Akaichilahele ade Bhambo Chapanga papakutenda bhapomole chehemo jhabhe ngita chummii mangota, bhene helahela nabhabha na kilambo chabhe, Bhambo Chapanga nabhapela kwiye jha lukemba Yoludane. Pighapakupeta gheniya, mihoto kukelebhuka mu kilambo chino chinimpelingine kibhehe chino!’

21 "Peniya, nganinnobholila Yochuwa, ‘Mwe nnolite kwa miho ghino mabhene, Bhambo Chapanga, Chapanga gwino ilebhe yabhatendii akanahota akakolongwa bhabhele bhano, Sihone na Ogu, jwenie nantendela helenaha akanahota bhoha mu ilambo impakupeta. 22 Mangapwelela jhe bheniya nhwalo Bhambo Chapanga, Chapanga gwino nabhakomanila mangota.’

23 "Kipinde chenio nganinyopita Chapanga kulonge, 24 ‘Mwe Bhambo Chapanga, manye unangii ne nantumiche gwino utumbulo tu gwa ukolo na uhotolo gwino. Nhwalo abhii chapanga jhonge kwenio kunane amu pannema jwahoto kutenda ilebhe ikolongwa na ya kukangacha ngita chuteii mwenga? 25 Chonde ninnyopa nyomboke kwiye jha lukemba Yoludane, nakalole kilambo china kuhalala upande ghulitipikii lyobha mwa lukemba Yoludane, ena kilambo kihalanaho cha itombe pamonga na itombe yuku Lebanone.’

26 "Nambo Bhambo Chapanga ngayomila kwa nhwalo gwino mangota, ngakanita kunyokanikiya. Nganobholila kubhehe, ‘Ikwela! Mangalonge jhe kabhele nhwalo gwenio. 27 Nkwela ade kukilegheleghe cha kitombe Pisiga, makalolekehe maha upandi ghulitipikii lyobha na kachikachine na kuchine na upandi ghulihumii lyobha, nukukilola kilambo chenio, nambo mwenga mijhomboka ng'o lukemba Yoludane. 28 Nambo mpela Yochuwa malaghalikilo, nkwimicha mwojho nu kunkangamalicha, nhwalo jwenio ndi jwapakwalongocha bhando bhamba ade kwiye, kukitola kilambo chipa kukibhona.’

29 "Yene, ngatutamita mu lulambo lwa lukemba Yoludane nnonge jha Bete Peole."