1 Pajhomwika Mucha ntumiche gwa Bhambo Chapanga, Bhambo Chapanga ngannobholila Yoshuwa mwana gwa Nune, ntangatila jwa Mucha, 2 ngalongila, "Ntumiche gwango Mucha ajhomwike, ngohe mwenga pamonga na Akaichilahele bhoha nnyomboke lukemba lwa ku Yoludane, ade ku kilambo chela chambakwape Akaichilahele. 3 Kila pimipakulebhata lwajho lwino napabhaa pino ngita chininnaghila Mucha. 4 Mipaka jha kilambo chino naitumbulila kunjenga upandi gwa kuchine ade kachikachine mwa itombe ya ku Lebanone. Kwa upandi kulihumii lyobha ndi lukemba lola lukolongwa lwa ku Efulate, na kilambo choha cha Akahite, ade ku mbwane jha Meditelaniya kwa upandi ghulitipikii lyobha. 5 Napitii ng'o mundo jwakunhotola mu ughome gwino ghoha. Namma pamonga na mwenga ngita chamila na Mucha, machiko ghoha naninneka jhe hilu pandina. 6 Mangalendema jhe na mma nganganga, nhwalo mwenga ndi namalongocha bhando bhamba kutola kilambo chinalaghii kwapela akahoko bhabhe. 7 Nambo mma nganganga na mangalendema jhe na mukilolokehe kwa kulikamu lilaghalikilo lyoha lyannaghila Mucha ntumiche gwango. Kila lilaghalikilo mulikamule na mwenga namma na mota popoha pumijhenda. 8 Dolokeya nkoto kukileka kitabo chenje cha lilaghalikilo, nambo kila lichiko namukibhola kilo na muhe kitabo chenje, kupala kuhenga ghoha ghighajhandikwe mwenio, na mwenga nankonda hake popoha pumijhenda. 9 Nkomboka nenga ndi jwanongila mangalendema jhe! Mma nganganga mangajhoghopa hilu kuhechuka, nhwalo nenga ndi Bhambo Chapanga, Chapanga gwino mi pamonga na mwenga popoha pumijhenda."

10 Bhahe, Yoshuwa ngabhalaghila ilongoche ya akakomana ngondo, 11 Nnyende mu ighono ya bhando na malobholela, "Bhalenganikiya machulupo, kunhwalo pighapeta machiko matato nannyomboka lukemba lwa ku Yoludane, nu kujhenda kutola kilambo chela Bhambo Chapanga, Chapanga gwino, ampekii kubhehe kilambo chino."

12 Yoshuwa ngalongila kwa bhando bha likabila lya Leubene na likabila lya Gade na nucho jha likabila lya Manache kubhehe, 13 "Nkomboka malobhe ghala ghalongila Mucha ntumiche jwa Bhambo Chapanga, Chapanga gwino, nampela chehemo pa kupomolela, natutola kilambo chenje upande ghulihumii lyobha mwa lukemba lwa Yoludane. 14 Akaana bhino na yana hino na inyama hino yukolekwa nabhahighilika mu kilambo chenje champela Mucha upande ghulihumi lyobha mwa Yoludane, nambo akakomana ngondo kongo bhabhii na chilaha yabhe nabhatangatila akalongo bhino kujhomboka, 15 namatangatila ade Bhambo Chapanga papakwapela akalongo bhino chehemo jha kupomolela helahela, ngita champi mangota, na bhene hele nabhatola kilambo chibhapala kupelwa na Bhambo Chapanga, Chapanga gwino. Peniya nankelebhuka mu kilambo chimpilwa na Mucha ntumiche jwa Bhambo Chapanga, upande gwa kulihumii lyobha mwa Yoludane."

16 Bhene ngabhannyangwila Yoshuwa kubhehe, "Chimilonge chochoha natuhenga, natujhenda popoha pimitutuma. 17 Ngita hele chitunnyokanikiya Mucha, ndi chitupa kunnyokanikiya mwenga. Bhambo Chapanga, Chapanga gwino abhaha pamo na mwenga ngita chabhila na Mucha. 18 Mundo jhojhoha jwangajhokanikiya malobhe ghino, nakomwa. Mwenga mme nganganga na mangalendema jhe!"