1 Likabila lyuubhele kupelwa kilambo chabhe kwa kiumbuumbu nnobhole likibha, likabila lya Chimeone, kilambo chabhe kikatindilwe na kilambo cha likabila lya Yuda. 2 Likabila lya Chemione ngaipilwa miche jha Beeli Cheba na Sheba na Molada, 3 Hasale Shuale na Bala na Esemu, 4 Elitolade na Betule na Holima, 5 Ku Sikilaghi na Bete malekabote na Hasale susa, 6 ku Bete Lebaote na Shaluhene, yenio ikibha miche kome na itato pamonga na chenda yake.

7 Kabhele muche gwaku Aine nuku Limone nuku Etele na Ashane, miche ikibha ncheche pamonga na chenda yake, 8 pamonga na chenda yoha itindii miche jhenio ade ku Baalate Beele, hele ukemwa Lama, mu kilambo kijhomo chuupandi gwaku kuchine. Yenio yoha ndi miche jhibhapilwa likabila lya Chimeone lungolo kwa lungolo. 9 Nhwalo kilambo chibhapilwa bhando bha likabila lya Yuda kikibha kikolongwa kupeta chibhaghanita. Chehemo jhenge ghabhapilwa bhando bha likabila lya Chimeone jhikibhii nkate mwa kilambo cha Yuda.

10 Likabila lyuutato kupelwa kilambo chabhe kwa kiumbuumbu nnobhole likibha, Chabulone kukengama lungolo lwabhe. Kilambo chabhe ngakijhenila ade ku Salide, 11 kuhumii kwenio mupaka gwake ngujhenda upandi kulitipiki lyobha ade ku Maleale, ngupeta muupele jha Debeshete nu kujhendelela ade kikemba cha mache pahina na Yokineamo. 12 Kubhoke ku Salide, mupaka gwenio ngaughalambuka kujhenda ade kulihumii lyobha ku kilambo chuku Kisilote Tabole nu kujhenda ade ku Dabelate kuhobhoke ku Jafiya. 13 Peniya ngujhenda upandi ghulihumii lyobha mwa Gatehefele nu kuika ku Etikasine, ngupeti ku Limone nu kughalambukii kujhenda ku Neya. 14 Kwenio mupaka ngautindila upandi gwa kachikachine mupaka ku Hanatone nu kujhomoke mu likemba lya Ifutaele. 15 Miche jhenge ndi Katate nuku Nahalale nuku Shimulone nu ku Idala nu ku Betelehemo. Kukibha na miche kome ni ibhele pamonga na chenda yake. 16 Yenie ndi miche ibhatamita ngolo jha bhando bha likabila lya Chabulone pamonga na chenda yake.

17 Likabila lya ncheche kupelwa kilambo chabhe kwa kiumbuumbu nnobhole likibha lya likabila lya Ichakale, nhwalo gwa yana ya Ichakale kukengama ngolo yabhe. 18 Na ilambo yabhe ikibha na miche jha Yezileele na ku Kesulote na Shunemo, 19 ku Hafalaimo na ku Shione na ku Anahalate, 20 ku Labite nu ku Kisheone nu ku Ebese, 21 ku Lemete nuku Eneganimo nuku Ene Hada nuku Bete pasesi. 22 Mupaka nguika ku Tabole, ku Shahasuma, nuku Beteshemeshe, ngujhomokila kulukemba lwa ku Yoludane. Miche jhoha jhibhapilwa ikibha kome na chita, pamonga na chenda yake. 23 Miche jhenie pamonga na chenda yake ndi jhibhapilwa bhando bhi likibila lya Ichakale, lungolo kwa lungolo.

24 Likabila lya nhwano kupelwa kilambo chabhe kwa kiumbuumbu nnobhole, likibha likabila lya Achele kukengama lungolo lwabhe. 25 Miche jhabhe ikibha, Helikate na Hali na Betene nu ku Akishafi, 26 Ku muche gwaku Alameleke nu gwaku Amade na gwaku Mishale. Upandi ghulitipiki lyobha mupaka ngauika kukitombe Kalimele na muche gwaku Shihole Libinate. 27 Kabhele ngughalambukila upandi ghulihumi lyobha mwa Betedagone, kwenio ngaipakina na Chabulune ade ku ling'engo lya Ifutaele, ngaujhendelila upandi gwa kachikachine mwa Bete Emeke nuku Neyele mpaka ku Kabule upandi gwa kachikachine, 28 ngaujhendelila ade Ebulone nuku Lehobo na gwaku ku Hamone na gwaku ku Kana, ade kumuche nkolongwa gwaku Chidone. 29 Mupaka gwenio ngughalambukila kunyuma kujhenda ku Lama nu kujhenda ade kukilambo chikitindikilwe na mapamanda ku Tilo, ngughalambwika ngujhenda ku Hosa nu kujhomoke ku Mbwane jha Meditelaniya. Miche jhenge ikibha ndi Maalabo na Akizibo, 30 muche gwaku Uma na gwaku Afeke na gwaku Lehobo. Ndi ikibha miche makome mabhele na ibhele, pamonga na chenda yake. 31 Miche jhenio pamonga na chenda yake ngabhapilwa bhando bha likabila lya Achele, kukengama lungolo kwa lungolo.

32 Likabila lya chita kupelwa kilambo chabhe kwa kiumbuumbu nnobhole likibha, likabila lya Nafutale. 33 Mupaka gwabhe ngutumbulila ku Helefe na pankongo nkolongwa gwa mwalone ghubhii ku Sananimo, ngupetila ku Adami Nekebo nuku Yebineele Lakumo nu kujhomoke lukemba lwa ku Yoludane. 34 Mupaka ngujhendilila upandi kulitipiki lyobha kujhendelela ku Azinote Tabole, nu kuika ade ku Hukoke. Nguwika ku Chabulone upande gwaku kuchine, ku Ashele upandi kulitipiki lyobha, na Yoludane upandi ghulihumi lyobha. 35 Miche jhabhe ikatindikilwe mapamanda gha maghanga, ikibha ndi Zidimo na Zele na Hamate na Lakate na Kinelete, 36 muche gwaku Adama na Lama na Azole, 37 Kedeche na Edilei na Ene Hazoli, 38 Yilone na Migidale na Holemo na gwaku Betianati na gwaku Bete Shemeshe. Miche jhibhapilwa ikibhe kome na ticha pamonga na chenda yake. 39 Jhene ndi miche pamonga na chenda jhibhapilwa bhando bha likabila lya Nafutale, kulengana na ngolo yabhe.

40 Likabila lya chaba kupelwa kilambo chabhe kwa kiumbuumbu nnobhole likibha likabila lya Dane, ngolo yabhe. 41 Miche jhabhe ikibha pamonga na Sola na Eshitaole na Ili Shemeshe, 42 Shaalabine na Aiyalone na Yetila, 43 Elone na Timuna na Ekilone, 44 na Eliteke na Gibetone na Balaate, 45 na Yehude na Bene Balake na Gate Limone, 46 Me Yalikone na Lakone na muche ghubhii pahina na Yopa. 47 Bhando bha likabila lya Dane pibhahobhicha kilambo chabhe, ngabhajhenda kuujhingilila muche gwa ku Leshemo. Ngabhaupukila nu kutola, pibhajhomolila kwakoma bhando bhake bhoha, bhajhakutama na kukipela liina lenge muche gwenio kubhehe Dane, liina lyene likibha lya akahoko bhabhe. 48 Jhene ndi chehemo jhibhapilwa ngolo jha likabila lya Dane, miche jhene pamonga na chenda yake.

49 Bhando bhuku Ichilahele pibhajhomolila kubhaghana kilambo choha, ngabhampila Yoshuwa, mwana gwa Nune, chehemo jhake pakate jhabhe. 50 Nhwalo gwa nhwilo gwa Bhambo Chapanga, Akaichilahele ngabhampila Timunati Sela, muche gwahagwila jwene Yoshuwa, ghukibha ku kilambo cha itombe ya ku Efulaimo. Jwenie Yoshuwa ngauchengita kabhele muche gwenio na kutama mwenio.

51 Bhahe, mpiya litambiko Eleazale na Yoshuwa, mwana gwa Nune, pamonga na ilongoche ya makabila gha Akaichilahele ngabhabhaghina chehemo jhene kwa kiumbuumbu nnobhole palonge jha Bhambo Chapanga pannyango gwa lihema lya kukonganikila, kwenio ku Shilo. Yene ngabhajhomolila kubhaghana kilambo chenie.