1 Pighapetita gheniya, Bhambo Chapanga ngannobholila Yoshuwa, 2 malobholele Akaichilahele naha, "Bhakihaghulila miche jha kubhutukila, ngita chaninnaghalikiya Mucha. 3 Mundo jhojhoha jwapakunkoma mundo changanamiye, ahoto kutilila kwenio, na yene kummambala mundo jhola jwapakulepecha kwa nhwalo gwa myahe. 4 Jwakoma natilila pakate jha muche ghumo na kujhema pa litangala lya kujhingilila lya muche, na kwalobholela ighogholo ya muche gwenio mihalo jhake. Ighogholo yene nabhampokela umuche na kumpe chehemo jha kutama pamonga nako. 5 Anda abhii mundo jwapa kulepechela ankengime ade pa muche gwenio, ighogholo ya muche nabhampiya jhe mundo jwenio jwapa kulepechela. Nhwalo akankomite jhe nnyake kwa namiye, na hilu bhakibha jhe na bhulo kuhumi makacho. 6 Jwakomita najhendelela kutama mwenio ade papakuhadabulwa palonge jha bhando bhoha bha ku Ichilahele na helehela ade mpiya litambiko nkolo jwakibha na ukindendeke kipinde chene ahwile. Pighapetita gheniya mundo jhono ahoto kukelebhuka kajhake ku muche ghola gwatolwika."

7 Bhahe, kwa nhwalo ghono ngabhabheka miche jha Kadeche jha ku Galilaya ku ilambo ya itombe ya Nafutale, na Chekemo ku itombe jha Efulaimo na ku Kiliate Aliba hele ikemwa Hebulone ku muche gwa itombe ya ku Yuda. 8 Upandi gwa kwiye jha lukemba lwa Yoludane, kulihumi lyobha ku muche gwa ku Yeliko, ngabhakahagwila muche gwa Bezeli ghubhii ku njenga jhandika na muche gwene ndi gwa likabila lya Leubene. Helahela ngabhakahagwila Lamote, kwenio ku Gileade muche gwa likabila lya Gade na Golane kwenio ku Bashane, chehemo jha likabila lya Manache. 9 Mwichilahele jhojhoha amu nng'ene jhojhoha jwatamita panakate jhabhe, jwankomite mundo changanamiye, ahoto kutilila kwenio, ku miche jhibhekwitwe kupala akoto kukomwa na jwapala kulepechela, kabula jha kuhadabulwa palonge jha bhando bhoha.