1 Uhotolo gwa Akaichilahele ukamanyikine na akanahota akakolongwa bhoha bhubhakibha kwiye jha lukemba lwa ku Yoludane upandi gwa kulitipikii lyobha. Akanahota bheniya bhatamita mu ilambo ya itombe na katombe na mundika na muupele mwa mbwane jha Meditelaniya ade ku Lebanone ku upandi gwa kachikachine. Akanahota bhamba bhakibha Akahite na Akaamole na Akakaane na Akapeliche na Akahive na Akayebuche. 2 Gabhakongina pamonga kupala kukomana ngondo na Yoshuwa na Akaichilahele.

3 Nambo bhando bhu ku Gibeone bhubhakibhe Akahive pibhajhoha malobhe gha Yoshuwa chaitendii muche gwaku Yeliko na ku Ai, 4 ngabhateila nginyika. Ngabhalenganikiya yakulyegha na ngabhakwelicha maghunila ghighatukutwike panane jha maponda ghabhe na mahako ghalalite nu kuchonwa. 5 Ngabhawalita maghubache na ngobho itundungile na yakulya yabhe yoha ikibha ijhomo ichonilii ukongwa. 6 Bhahe, ngabhannyendila Yoshuwa kukighono chuku ku Giligale, ngabhannobholila jwenie na Akaichilahele kubhehe, "Twe tuhumii ku kilambo chukutale, chonde tujhopa mmeke lilaghano na twenga."

7 Nambo Akaichilahele ngabhajhangwila Akahive bhamba kubhehe, "Natubheka bhole lilaghano na mangota? Pange mangota mitama pahina na twenga."

8 Na bheniya ngabhannobholila Yoshuwa kubhehe, "Twe ngita akatumichi bhino."

Na Yoshuwa ngabhakonya, "Mangota meneke, na mibhoke kojhe?"

9 Bhene ngabhanyangwila, "Twenga ngita akatumiche bhino, tuhumii kukilambo chukutale na tuikite nhwalo tujhohine malobhe gha Bhambo Chapanga, Chapanga gwino. Tukajhohine malobhe ghoha ghateii mu kilambo chuku Michile, 10 na ghoha ghabhatendii akanahota akakolongwa bhabhele bha Akaamole bhubhakibha kwiye upandi ghulihumi lyobha mwa lukemba Yoludane. Akanahota bheniya Sihone jwa ku Heshibone na munahota nkolongwa Ogu jwa ku Bashane, jwatamita kwenio ku Ashutalote. 11 Yene ighogholo hito na akolo kilambo bha kilambo chito, ngabhatulobholila, tulenganikiye machulupo gha mwanja na tuike tukongane na mangota na kunnobholela twenga ndi ngita akatumiche bhino, chonde mmeke lilaghano na twenga. 12 Dola, mabumunda ghanga ghakibha mapyoo pitugheghita pitutumbwila mwanja, nambo ngohe ijhomite nakumelela ukongwa. 13 Mahako ghanga ghakibha mayono pututweliya, nambo ngohe ghatukutwike. Ngobho na maghubache ghito ghatundingii, nhwalo mwanja utei kulipa hake."

14 Yene, Akaichilahele ngabhalingukiya yakulya yabhe, changankonya Bhambo Chapanga kilebhe chenio. 15 Peniya Yoshuwa ngabhekita lilaghano lya uteeke lyakutama nabho. Ilongoche ya Akaichilahele ngabhakamula lilaghano lyenio.

16 Pighapetita machiko matato gha lilaghano lyenio, Akaichilahele ngabhamanya kubhehe bhando bheniya bhakibha pahina jhabhe na bhitama pahina jhabhe. 17 Yene, Akaichilahele ngabhatenda mwanja na lichiko lyuutato ngabhaika mu ilambo ya bhando bhena, ilambo yene ndi Gibeone na ku Kefila na ku Beelote na ku Kiliate Yealimu. 18 Nambo Akaichilahele bhakabuliti jhe, nhwalo ilongoche ya Akaichilahele bhakalapi kwa liina lya Bhambo Chapanga, Chapanga jwa Akaichilahele. Yene, Akaichilahele bhoha ngabhalongwima ilongoche yabhe. 19 Nambo ilongoche ya Akaichilahele ngabhalongila, "Nhwalo twalapii kwa liina lya Bhambo Chapanga, Chapanga jwa Akaichilahele, ngohe tuhoto jhe kwabhengwa. 20 Yene, natwaleka bhatame kupala tukoto kuhadabulwa kwa kutweku kilapo chitubhekite. 21 Chonde mwaleke bhatame, bhena nabhatutumikila kwatinii hanjo na kwateke mache." Naha ndi ilongoche ya Akaichilahele chibhalongila.

22 Yoshuwa ngabhakema Akagibeone na kwakonya, "Bho, kwanike mutukolwii mihuma kutale kone mangota mitama pahina jhito? 23 Ngohe mukipalii likoto mabhene na machiko ghoha namma makabhanda bha kutina hanjo nu kuteka mache kunhwalo jha nyumba jha Chapanga gwango."

24 Ngabhanyangwila Yoshuwa kubhehe, "Chakaka, tukamanye kubhehe Bhambo Chapanga, Chapanga gwino akannobholile Mucha ntumiche gwake kubhehe, abhakomelekee akolo kilambo bhoha na kilambo chenje, kibhaha kilambo chabhe Akaichilahele. Yene, ngatuupwelila ughome gwito na ndi nhwalo ngatuteila kilebhe chenje. 25 Ngohe twe tubhii mulongoche gwino, mutendela mwenga chimikipala." 26 Yene, Yoshuwa chabhatendila ndi kwakombola kwa Akaichilahele bhakoto kwakoma. 27 Nambo kuhumii lichiko lyenio, Yoshuwa ngabhateila Akagibeone bhatina hanjo na kutekele mache kwa nhwalo gwa Akaichilahele bhoha na kwa nhwalo gwa kanjangwale kukupikii litambiko lya Bhambo Chapanga, popoha pala Bhambo Chapanga papahagwii ade deleno.