1 Henge ndi chehemo ibhabhujhila Akaichilahele mu kilambo chuku Akakanaane. Jwakibha mpiya litambiko jwa Chapanga Eleazale na Yoshuwa, mwana gwa Nune na ilongoche ya ngolo ya likabila lya Akaichilahele ngabhabhaghulila Akaichilahele. 2 Kilambo chene bhakabhaghanichilwe kwa kiumbuumbu nnobhole ngita Bhambo Chapanga channaghalikiya Mucha akabhabhaghulile makabila ticha na nucho. 3 Mucha ngaghaghabhila ghala makabila mabhele na nucho chehemo jhabhe upandi ghulihumii lyobha mwa Yoludane, nambo Akalawe akapekii jhe chehemo jhabhe pakate jha bheniya, 4 yana ya Uchupo ikibha makabila mabhele, Manache na Efulaimo. Akalawe bhakapatite jhe kilambo chabhe nambo bhakibha na chehemo jha kutama pamonga nu kuluchila inyama yabhe, mambelele na mbuhe na ng'ombi. 5 Yene Akaichilahele ngabhakibhaghina kilambo chene, ngita Bhambo Chapanga channaghila Mucha.

6 Lichiko limo bhando bha likabila lya Yuda bhakannyendile Yoshuwa kwenio ku Gilegale. Jhumo pakate jhabhe akibha Kalebo, mwana gwa Yefune lungolo jwa Akenize ngalongila, "Mwe umanye kilebhe Bhambo Chapanga channobholile Mucha, ntumiche jwa Chapanga, jwa ku Kadeshe Belinea nhwalo gwino mwenga na nenga. 7 Pinikibha na yaka makome ncheche, Mucha ntumiche jwa Bhambo Chapanga ngandumita kuhuma Kadeshe Balineya, kujhenda kukilingukiya kilambo chenje. Na nenga pamujhita nganinchimulila ilebhe ya kwenio ngita chinolita tela umwojho gwango. 8 Bhando bhala bhinongohina nabho ngabhahengelecha bhando miojho, nambo nenga nganinkengima Bhambo Chapanga, Chapanga gwango kwa mwojho gwoha. 9 Yene, lichiko lela Mucha ngannapiya kubhehe, ‘Chakaka kilambo chinnebhite magholo ghino nakibhaha chino pamonga na yana hino machiko ghoha ghangapeta, nhwalo munkengime Bhambo Chapanga, Chapanga gwango kwa mwojho gwino gwoha.’ 10 Nambo ngohe, Bhambo Chapanga Mucha ammekite ghome kwa yaka makome nchenche na nhwano, kuhuma kipinde palongila Mucha kilebhe chenje, kipinde Akaichilahele pibhatindilatindila kunjenga. Ne ngohe mmi na yaka makome nane na nhwano. 11 Nambo namela na makakala ngita kipinde chela pandumita Mucha. Ata ngohe mmi na makakala gha kuhoto kukomana ngondo amu kuhenga chochoha. 12 Ngohe umbekehe kilambo chenje cha itombe ngita Bhambo Chapanga channaghila lichiko lela. Mwe mabhene makajhoine lichiko lela kubhehe Akaanake, bhitama kwenio kukilambo kikolongwa china mapamanda makolongwa, pange Bhambo Chapanga nabhaha pamonga na nenga, na nenga mbala kwabhenga ngita Bhambo Chapanga chalongila."

13 Peniya Yoshuwa ngampekiya mota Kalebo, mwana jwa Yefune, na kumpe Hebulone kubhe muche gwake. 14 Yene, muche gwa Hebulone ngaubhila gwa Kalebo, mwana jwa Yefune jwa lungolo lwa Kenize ade ngohe, nhwalo Kalebo akankengime Bhambo Chapanga kwa mwojho gwake gwoha. 15 Muche gwa ku Hebulone mandahe ukemitwa muche gwa Kiliate Aluba. Aluba akibha mundo jwamanyikina kuliku bhando bhoha pakate jha Akaanake.

Yene kilambo choha kikibha teeke changa ngondo.