1 Munahota nkolongwa Adoni Sedeki jwaku Yeluchalemo ngajhoha malobhe kubhehe Yoshuwa chakipukila muche gwaku Ai na kukomelekeya njwenjwe ngita chautendila Yeliko na munahota nkolongwa gwake. Helahela ngajhoha kubhehe akakolo kilambo bhuku Gibeone, bhatei lilaghano lya uteeke na Akaichilahele na ngohe mitama pakate jhabhe. 2 Malobhe gheniya ngaghaletila kiholo kikolongwa ku Yeluchelemo, nhwalo Gibeone ukibha muche ghumanyikina hake pakate jha miche jhikibha jha akanahota akakolongwa. Muche ghongo hele ukibha nkolongwa hake kuliku muche gwaku Ai na akanalome bhake bhakibha akakomana ngondo bhangalendema. 3 Yene, munahota nkolongwa Adone Sedeki jwa ku Yeluchalemo ngapelika lilobhe kwa munahota nkolongwa Hoamu jwaku Ebulone, na munahota Pilamu jwaku Yalumute na munahota nkolongwa Yafiya jwaku Lakishe na munahota nkolongwa Debile jwaku Egulone, 4 ngabhalobholila, "Nhikangane undangatile kwakoma Akagibeone, nhwalo bhatei lilaghano lya kutama kwa uteeke na Yoshuwa pamonga na Akaichilahele." 5 Peniya, akanahota bheniya nhwano bha Akaamole ngabhabheka kighono kukitindii kilambo chenio, ngabhakijhingilila. Akanahota bheniya bhakibha munahota nkolongwa jwaku Yeluchalemo na munahota nkolongwa jwaku Ebulone na munahota nkolongwa jwaku Yalumute na munahota nkolongwa jwaku Lakishe na munahota nkolongwa jwaku Elugone.

6 Akagibeone ngabhatuma lilobhe kwa Yoshuwa kwenio ku Giligale, ngabhannobholila kubhehe, "Chonde tanjii kuwegha, akatumiche bhino, nhwike kajhombe mututangatile nu kutughombo nhwalo gwa Akanahota bha Akaamole kubhoka kwiitombe bhakonganike pamonga kutujhingilila."

7 Peniya, Yoshuwa pamonga na akakomana bhake bhoha na bhando bhangajhoghopa ngabhabhoka ku Giligale. 8 Bhambo Chapanga ngannobholila Yoshuwa kubhehe, "Mangajhoghopa jhe hilu pandina, nhwalo bhabhii pahe jha ulongoche gwino, abhii jhe hilu jhumo jwapakunhotola." 9 Uhiko ghoha Yoshuwa ngakelwiya kutyanga kubhoka ku Giligale, yene ngabhajhingilila Akaamole kwa upwitikililo. 10 Bhambo Chapanga ngabhatweleya bhoghoye na mbwelelo palonge jha Akaichilahele, ngabhakomita bhando twe kwenio ku Gibeone kongo bhabhutwiya mundela jha ku Bete Holone jhibhii pakate jha itombe ade ku Azeka na ku Makeda, helahela ngabhakoma bhando twe hake. 11 Pibhatilita Akaichilahele muluhelelo lwa Bete Holone, Bhambo Chapanga ngabhatepetiya ula jha maghanga makolongwa kuhumii kunane kongo bhabhii undela ade ku Azeka, ade pibhakoma kwa maghanga gheniya ngabhabhila ngoo kuliku bhibhakomita kwa chilaha ya Akaichilahele.

12 Kipinde Bhambo Chapanga pabhabhekita Akaamole pahe jha ulongoche gwa Akaichilahele, Yoshuwa ngannyopa Bhambo Chapanga palonge jha Akaichilahele bhoha, ngalonge,

"Lyobha, nnyeme nuu kwa Akagibeone,

na mwehe, nnyeme paling'engo lyuku Ayalone."

13 Yene, lyobha ngalijhema nuu na mwehe ngaujhema hele ade kilambo chaka Ichilahele pukilepichila kwa akamakoko bhabhe. Ngita chiijhandikwe mukitabo cha Yashele, lyobha likibha nuu kunane kwa Chapanga, mwanja gwake gwa kutipika ngaubhoghanika. 14 Lichiko ngita lyene linapiti ng'o kabula jha nnema kupanganwa na ade ngohe lyanalipitii jhe kabhele, lichiko Bhambo Chapanga pannyekitila mundo kwa ndela jhenio, nhwalo Bhambo Chapanga jwenie ndi jwabhakomanila Akaichilahele.

15 Peniya, Yoshuwa ngabhujha ku kighono chake kwenio ku Giligale pamonga na Akaichilahele.

16 Bhahe, akanahota akakolongwa nhwano bhala ngabhatila nu kujhobha mulinkwembe kwenio ku Makeda. 17 Peniya, Yoshuwa ngapata lilobhe kubhehe akanahota akakolongwa bheniya bhaumbwilwe pibhajhobhite mulinkwembe lya Makeda. 18 Yoshuwa ngalongila kubhehe, "Mmilimbiye lighanga likolongwa pannyango gwa linkwembe puu na mmeka akalonda papa. 19 Nambo mangota mangata jhe kwenio nambo makengimila akamakoko bhino. Majhingilila kuhumii chukuyeto hilu mangaleka jhe bhajhingila mu miche jhabhe, nhwalo Bhambo Chapanga, Chapanga gwino, antei mahotole." 20 Yene, Yoshuwa na Akaichilahele ngabhakomelekiya na bhandina bhibhahighalika ngabhanyogwila nu kutilila mu miche jhabhe jhitindilwe na mapamanda. 21 Pighapetita gheniya, Akaichilahele ngabhabhujha njelembo kwa Yoshuwa kwenio ku kighono chikibhii ku Makeda,

Akapitii jhe mundo jhukulonge kilebhe chochoha kwa Akaichilahele.

22 Peniya, Yoshuwa ngalongila kubhehe, "Hegheya kiyekelelo cha nkwembe, kuhumii mwenio unnete akanahota akakolongwa nhwano bhala." 23 Ngabhateila yene, ngabhanetila Yoshuwa akanahota nhwano bhala kuhumii mulinkwembe lela. Akanahota bhena nhwano ndi munahota nkolongwa jwaku Yeluchalemo na munahota nkolongwa jwaku Ebulone na munahota nkolongwa jwaku Yalumute na munahota nkolongwa jwaku Lakishe na munahota nkolongwa jwaku Egulone. 24 Akanahota bheniya pibhaletitwa, Yoshuwa ngabhakema Akaichilahele bhoha na akolo bha akakomana ngondo bhakibha nabho kungondo, ngabhalobholila akakolo bha ngondo, "Matimbetimbe pamitandala akanahota akakolongwa bhamba." Na bhene ngabhaheghelela na kwatimbatimba. 25 Peniya, Yoshuwa ngabhalobholila akakolo bha ngondo, "Mangalemdema jhe hilu kuhechuka, nhwalo Bhambo Chapanga chapa kwatenda akamakoko bhino bhoha bhimpakukomana nako. Yene, mma nganganga na nkoto kujhoghopa." 26 Yene, Yoshuwa ngabhakoma na kwahomeka nkongo na kwajhenjeya pankongo akanahota akakolongwa bheniya nhwano, kwenio ngabhabhamba ade kimiye. 27 Lyobha pulibhandikila kutipika, Yoshuwa ngabhalaghila bhakanhuluye mu mikongo na kwataghii mulinkwembe mubhajhobhita. Peniya, ngabhaheghekiya maghanga makolongwa pannyango, maghanga gheniya ghabhii ade deleno.

28 Lichiko lyene Yoshuwa pakipukila muche gwa ku Makeda, ngankoma munahota nkolongwa na akakolo kilambo chenio bhoha kwa upanga, akahighii jhe mundo hilu jhumo. Chantendila munahota nkolongwa jwaku Makeda ndi ngita chantendii munahota nkolongwa jwaku Yeliko.

29 Pibhabhokita ku muche gwa Makeda, Yoshuwa ngajhenda pamonga na Akaichilahele bhoha kuujhingilii muche gwa ku Libuna. 30 Bhambo Chapanga ngaubheka muche gwenio pahe jha ulongoche gwa Akaichilahele, ngabhakomita akolo muche gwenio kwa upanga changanneka hilu jhumo. Chibhakantendii munahota nkolongwa jwaku Yeliko na munahota nkolongwa jwaku Libuna, kikankolii cheche.

31 Peniya, Yoshuwa na Akaichilahele ngabhoka ku muche gwa ku Libuna nu kujhenda ku Lakishe, ngabhautindii muche gwenio nu kukijhingilila. 32 Jwene Bhambo Chapanga ngaubheka muche gwenio mukindendeke gwa Akaichilahele, ngabhakipukila mu lichiko lyubhele tugha. Ngabhakoma akakolo muche gwenio ngita hela chibhateila kwenio ku Libuna. 33 Kipinde chenio, munahota nkolongwa Holamu jwaku Gezele ngaika kwatangatila bhando bhuku Lakishe, nambo Yoshuwa nganhotwila jwene pamonga na akakomana ngondo bhake bhoha ade pabhakomalikiya njwenjwe.

34 Peniya, Yoshuwa ngabhoka ku Lakishe na Akaichilahele bhoha, ngajhenda ku muche gwa ku Elugone, ngabhautindila muche gwenio nu kuujhingilila. 35 Ngabhakipukila lichiko lele na kwakoma kwa upanga akakolo muche gwenio bhoha ngita chibhateila kola ku Lakishe.

36 Kubhoke ku Egulone, Yoshuwa na Akaichilahele bhoha ngabhajhenda ku Ebulone, ngabhajhingilila, 37 na ngabhaupukila muche gwenio. Ngabhakoma akakolo muche na akanahota akakolongwa bhabhe kwa upanga, ngabhahangabhina njwenjwe chenda henge jhitindii, helahela ngabhakoma kwa upanga akakolo miche jhene ngita hela chibhateila kola ku Egulone.

38 Peniya, Yoshuwa na Akaichilahele bhoha ngabhaghalambwika kubhujha ku muche gwa ku Debile nu kuujhingilila. 39 Ngabhaupukila muche gwenio na munahota gwake pamonga na chenda yoha itindii na kwa komelekeya kwa upanga bhoha bhubhabhii mwenio changahighala hilu jhumo. Chibhautendila muche gwenio ngita chibhautendii muche gwa ku Hebulone na muche gwa ku Libuna na munahota gwabhe.

40 Bhahe, Yoshuwa ngakipukila kilambo choha na kwahotola akanahota bhoha bha chehemo jha itombe na chehemo jhoha jha itombe ichokoichoko upandi ghulitipikii lyobha na chehemo nyomo upandi gwa kuchine na mu mihelelo jhupandi ghulihumii lyobha. Kikibha jhe chikipomola chikikahighilike nambo ngakomita kila kilebhe ngita Bhambo Chapanga, Chapanga jwa Akaichilahele, chalaghila. 41 Yoshuwa ngabhahotwila bhando bhoha kuhumii Kadeshe Baluneya ade Kugacha na ku Gochene nu ku Gibeone.* 42 Ngakipukila kilambo choha pamonga na akanahota nhwalo Bhambo Chapanga, Chapanga jwa Akaichilahele, akakomanii Akaichilahele. 43 Bhahe, pajhomolila gheniya, Yoshuwa ngabhujha ku kighono chake ku Giligale pamonga na Akaichilahele bhoha.