1 Pibhakihotwila kilambo chela, bhando bhoha bha ku Ichilahele ngabhakonganika ku Shilo na ngabhajhemika Lihema lya kukonganikila. 2 Peniya ngaghahighilika makabila chaba gha Akaichilahele, gheniya ghakibha ghamela kupelwa chehemo jhabhe jha kilambo. 3 Yene Yoshuwa ngabhalobhalila Akaichilahele, "Bho, nanchelukiya ade ligha kujhenda kutola kilambo kubhehe chino champila Bhambo Chapanga, Chapanga jwa akahoko bhino? 4 Nhaghule bhando bhatato kuhuma kila mu likabila, mbala nantume mu kilambo choha bhakalingukiye nu kuchola lamane jha chehemo jhipala kubhehe jhabhe, kubhoke peniya bhaika bhannobholela. 5 Na bhene nabhabhaghana kilambo chene chehemo chaba. Likabila lya Yuda naliighalika na chehemo jhake kwa upande gwa kuchine na makabila gha Uchupo naghabhaha kwa upande gwa kachikachine. 6 Nnenganikiya mbone nhwalo gwa chehemo chaba na unnetela. Ne nahaghulila kwa kiumbuumbu nnobhole palonge jha Bhambo Chapanga, Chapanga gwito, nhwalo gwa chehemo jha kila likabila lino. 7 Nambo Akalawe nabhapata jhe chehemo jhojhoha panakate jhino, nhwalo chehemo jhabhe ndi kuntumikila Bhambo Chapanga kwa kumpikiya litambiko. Gade na Leubene na nucho jha likabila lya Manache ngabhapatita chehemo jhabhe kwa upandi ghulihumi lyobha mwa lukemba lwa ku Yoludane. Ngabhapilwa chehemo jhenje na Mucha, ntumiche jwa Bhambo Chapanga."

8 Bhahe, bhando bheniya ngabhatumbwila mwanja kujhenda kukilingukiya kilambo chenie. Kabula jha kujhenda, Yoshuwa ngabhalaghila, "Nnyendengane mu kilambo choha nukujhandika malobhe tela kunhwalo gwa kilambo chene, peniya mmujhangana kunjimulila, nanenga nahaghula palonge jha Bhambo Chapanga, papa pa Shilo kunhwalo jha chehemo jhimpakupelwa." 9 Akanalome bheniya ngabhakitindila mu kilambo choha, ngabhajhandika malobhe hotuhotu chehemo chaba pamonga na miche jhake, peniya ngabhabhujhita kwa Yoshuwa kola kukighono chuku Shilo. 10 Kwenio ku Shilo, Yoshuwa ngahagwila kwa kiumbuumbu nnobhole chehemo yene palonge jha Bhambo Chapanga, ngabhabhaghulila Akaichilahele, kila likabila na chehemo jhake.

11 Likabila lyukutumbula kupelwa kilambo chabhe kwa kiumbuumbu nnobhole likibha, likabila lya Benyamine, lungolo kwa lungolo. Kilambo chabhe chibhapilwa kikibha pakate jha likabila lya Yuda na makabila gha Uchupo. 12 Kwa upandi gwa kachikachine mpaka gwake ukatumbulii mulukemba lwa ku Yoludane nu kupetela upandi gwa kachikachine mwa ku Yeliko na kilambo choha chiitombe, kujhendelela upandi ghulitipikii lyobha ade mu njenga jha ku Bete Avene. 13 Kuhumii kwenio, mupaka gwake ghaujhenda upandi gwa kuchine mwa Luzu, hele ikemitwa Betele ade ku Ataloti Adale, mukitombe chikibhii upandi gwa kuchine mwa Bete holone jha Pahe. 14 Upandi ghulitipikii lyobha mwa kitombe chene chikibhi kuchine mwa Bete holone mpaka ngautindila kujhenda upandi gwa kuchine mwa Kiliate baale, hele ukemwa Kiliate Yealimu, muche gwenio ndi gwa likabila lya Yuda. 15 Upandi gwa kuchine mupaka gwake ukatumbulii ku muche gwa Kiliate Yealimu, na kujhenda ade ku chembwe cha mache gha Nafutoa. 16 Peniya, ngauhelila kupete muupele jha kitombe pahina na ling'engo lya mwana jwa Hinomu, lyenio libhii upande gwa kachikachine nkate mwa ling'engo lya Akalefei. Kabhele mupaka nguhelela kujhenda muling'engo lya Hinomu, kuupande gwa kuchine mwa itombe ya Akayebuche, ngujhendilila ade ku Ene Logele. 17 Kwenio mupaka ngautindila kujhenda kachikachine nu kujhendelela ade ku Eni Shemeshi, ngaupetila ku Gelilote pahina na ndela jha ku Adimimo nu kuhelela ade ku lighanga lya Bohane, mwana gwa Leubene. 18 Ngaujhendelila upandi gwa luhelelo lwa kachikachine mwa Bete Alaba nu kupehekeya kwenio ku lulambo mu lukemba lwa Yoludane. 19 Kabhele ngaujhendelila kwa upandi gwa kachikachine mwa kitombe cha ku Bete hogila nu kupehekeya Mbwane jha Mwinyo, chehemo pulujhingilila lukemba lwa Yoludane. Gwenio ndi mpaka gwake kwa upandi gwa kuchine. 20 Lukemba lwa Yoludane ndi ukibha mpaka gwake kwa upandi kulihumii lyobha. Ndi chibhapakina ilambo ibhapatita lungolo lwa likabila lya Benjamine.

21 Miche jha ngolo ya likabila lya Benjamine ikibha ndi Yeliko na Bete hogila na Emeki kesisi, 22 Bete Alaba na Zemalaimo na Betele, 23 Avimo na Pala na Ofula, 24 Kefaleamone na Ofuni na Geba. Miche jhoha jhibhapilwa ikibha likome limo na ibhele pamonga na chenda yake. 25 Miche jhenge ikibha ndi Gibeone na Lama na Beelote, 26 Misipa na Kefila na Moza, 27 Lekemo na Ilipeele na Talala, 28 Zela na Haelefo na Yebuche helahela ukemitwa Yeluchalemo na Gibeya na Kiliate Yealimo. Miche jhoha jhibhapilwa ikibha likome limo na ncheche pamonga na chenda yake. Yene yoha ndi chehemo ibhapilwa bhando bha likabila lya Benjamine na ngolo yabhe.