1 Pighapetita machiko ghamahele, Bhambo Chapanga ngabhapila Akaichilahele uteeke kwa kwaghombola na akamakoko bhabhe pandi yoha. Kipinde chene Yoshuwa akibha kighogholo jwa yaka twe. 2 Yoshuwa ngabhakemita Akaichilahele bhoha pamonga na ilongoche na akahoko bhabhe na akakenga na akatumiche bhabhe, ngabhalobhalila naha, "Ngohe ne nakighogholo na mmi yaka twe. 3 Mangota nnolite mambu ghoha Bhambo Chapanga, Chapanga gwino yatendile ilambo yene yoha kwa nhwalo gwino. Bhambo Chapanga, Chapanga gwino ndi jwankomanile. 4 Nkomboka ilambo ihighilike na yela yangaikomelekeya nimmaghulile kubhehe chehemo jha makabila ghino, ilambo inihotwile. Kuhumi ku Yoludane ade mbwane jha Meditelaniya, upande ghulitipikii lyobha. 5 Bhambo Chapanga, Chapanga gwino, nabhabhoya palonge jhino na kwabhenge kutale, na mangota nammujhila kilambo chabhe ngita Bhambo Chapanga, Chapanga gwino, chalaghila. 6 Yene mma nganganga na kukamuu ghoha ghighajhandikwe mu kitabo cha lilaghalikilo lya Mucha, chonde mangaghaleka jhe. 7 Mangatangatilana jhe na bhando bheniya bhibhaighilike pakate jhino. Nkoto kuikonya ichapanga yabhe amu kulapila kwa mahina gha ichapanga yabhe, hilu kuijhinamila. 8 Bhahe, nnombane pamonga na Bhambo Chapanga, Chapanga gwino, ngita chimitenda ade deleno. 9 Nhwalo Bhambo Chapanga aibhengite palonge jhino ilambo ikolongwa ina makakala, na abhii jhe mundo jwahotwi kwanhibhilikiya mangota ade deleno. 10 Mundo jhumo pakate jhino ndi jwahoto kwabhenga akamakoko maelufo, nhwalo Bhambo Chapanga, Chapanga gwino ndi jwankomanila ngita chalaghila. 11 Bhahe, mipalwa mma miho mu kumpala Bhambo Chapanga, Chapanga gwino.

12 "Nhwalo anda munnekite Bhambo Chapanga, kulombana na ilambo henge iighalike pakate jhino, na kutolela kwabhe na bhene kutolela kwino, 13 mmanye chakaka kubhehe Bhambo Chapanga, Chapanga gwino, najhendelela jhe kwabhenga bhando bhange palonge jhino, nambo nabhabha kwino ingobhahe na mitambo. Kwino naibha yato yukumbulila na mibha yukuchwapuli kumiho ade pimpa kukomelekelwa nu kubhoka mu kilambo chenje chikihalile kubhehe, Bhambo Chapanga, Chapanga gwino, ampilingine.

14 "Ngohe kipinde chango chukujhomoka ngita chibhii kwa bhando bhange kiheghalile, nambo mangota mmanye hotuhotu kubhehe umwojho gwino na uchakaka ghoha kubhehe Bhambo Chapanga, Chapanga gwino alenganikiye ghalaghila, kibhii jhe ata chimo changalenganikiya. 15 Nambo ngita hela Bhambo Chapanga, Chapanga gwino, chalenganikiya ilebhe yoha yambone yalaghila, helenaha ahoto kunnetela mabhoho ghoha ade ankomelekeye mabhoha kuhumi mu kilambo chenje chamaha champilingine. 16 Anda mulitwekwii lilaghano lya Bhambo Chapanga, Chapanga gwino, lyanaghila mulikamule, kwa kuijhinamila ichapanga, bhahe, lilaka lya Bhambo Chapanga, Chapanga gwino nalijhaka panane jhino, na mangota nankomelekelwa pulutu kajhombe, kuhumi mu kilambo chenje chikihalile champelingine."