1 Akanahota akakolongwa bha Akaamole bhibhatamita kwiye jha lukemba lwa ku Yoludane, na akanahota akakolongwa bha Akakanaane bhubhakibha muupele jha mbwane jha ku Meditelaniya, pibhajhoina kubhehe Chapanga ajhomiche chwa mache gha lukemba lwa ku Yoludane, nhwalo gwa Akaichilahele bhajhomboke. Ngabhabhila na bhoghohe na kuhengeleka mwojho kwa kujhoghopa kukomana na Akaichilahele.

2 Kipinde chene Bhambo Chapanga ngannobholila Yoshuwa, "Nnenganikiye ihembe inonoho ya lighanga namajhingiya jando Akaichilahele bhangajhingila jando." 3 Yoshuwa ngalenganikiya ihembe ya maghanga manonoho hake na kwajhingiya jando Akaichilahele kwenio ku Gibea Haalalote. 4 Nhwalo gwa kwajhingiya jando Akaichilahele ndi ghongo, akanalome bhoha bha Akaichilahele, bhubhahumita ku kilambo cha ku Michile na yaka yabhe ikibha tela kujhenda kungondo, bhoha ngabhawilila umwanja pibhakibha munjenga kuhumi ku kilambo chaku Michile. 5 Bhando bhoha bhubhabhokila ku kilambo chu ku Michile bhakajhingi jando, nambo bhala bhoha bhubhabhelukwi undela kwenio kunjenga bhakajhingi jhe jando. 6 Akaichilahele ngabhatyangita kunjenga kwa yaka elufo ncheche ku njenga na akanalome bhoha bhubhakibha na yaka tela ya kujhenda kungondo ngabhakomelekelwa, nhwalo bhakannyokaniki jhe Bhambo. Bhambo Chapanga akabhalaghile bhando bheniya nabhajhingi ng'o mu kilambo chambone chikibholile kwakulema nu kukoleka, chabhalaghila akatate bhabhe kubhehe nabhapela. 7 Yene yana ya bhando bheniya Chapanga ngaitunjita pakate jhabhe, bheniya ndi Yoshuwa akabhajhingiye jando, bhajhingii jhe jando nhwalo kipinde chela bhakibha umwanja kunjenga.

8 Akanalome bhoha pubhajhomolila kujhingii jando ngabhatamita mu kighono ade pibhalamita. 9 Bhambo Chapanga pannobholila Yoshuwa, "Deleno nimmohingine hone jha ubhanda jhimukibha najho pumuhumita ku Michile." Yene chehemo jhene ade deleno pikemwa *Giligale mana jhake kubhoka.

10 Akaichilahele pubhabhekita kighono kwenio ku Giligale ngabhabhekita unyagho gwa Pachaka kimiye jha lichiko lya kome na ncheche lya mwehe pandika jha ku Yeliko. 11 Lichiko likengima pupetita unyagho gwa Pachaka, lukela jhake ngabhalila mabumunda ghangalekelwa ngedule na ndolotolo ya mahuno gha kilambo chene. 12 Kuhumi lichiko pibhalila mahuno gha Kilambo, Akaichilahele bhakalii ng'o chakulya chikikemwa mana kabhele. Nambo chaka chene Akaichilahele ngabhalila mahuno gha kilambo cha ku Kanaane.

13 Lichiko limo Yoshuwa pakibha pahina na muche gwa ku Yeliko, pwitu ngammonita mundo ajhemite palonge jhake, akamwiii upanga. Yoshuwa ngannyendila na kunkonya, "Mwe ndi malikoko amu majhito?"

14 Ngajhangwila, "Ne jwii jhe hilu na likoko jhe, nambo nenga ndi nkomana ngondo jwa Bhambo Chapanga, nambo ngohe mmii pamba."

Yoshuwa ngatama makilikite kwa ichima na kunkonya, "Mabhambo gwango, ngohe ne natumiche bhino umbala ndende nike?"

15 Nkomana ngondo jwa Bhambo Chapanga ngajhangwila, "Hula maghubache ghino, pummile panyahinyahi." Na Yoshuwa ngateila yene.