1 Peniya, Yoshuwa ngabhakemita bhando bha likabila lya Leubene na likabila lya Gade na nucho jha bhando bha likabila lya Manache upandi ghulihumii lyobha, 2 ngabhalobholila, "Mangotamwe mighajheketile ghoha Mucha, ntumiche jwa Bhambo Chapanga, ghannaghalikiya na kukamu malaghilo ghanninaghalikiye. 3 Wala malekitii jhe akalongo bhino Akaichilahele kwa kipinde chene choha ade deleno, nambo nkengamii maha mihilo jha Bhambo Chapanga, Chapanga gwino. 4 Ngohe Bhambo Chapanga, Chapanga gwino abhapi akalongo bhino uteeke, ngita chanaghila. Bhahe, nkelebhuke mu kilambo chino chimpii Mucha, ntumiche gwa Bhambo, kubhehe chino, kwiye jha lukemba lwa ku Yoludane. 5 Mma miho kukamu mihilo na malaghalikilo ghoha ghannobholila Mucha, ntumiche jwa Bhambo Chapanga. Mupala Bhambo Chapanga, Chapanga gwino, nkamula nu kunkengama mihilo jhake, ntama nako pamonga na kuntumikila kwa mwojho gwino ghoha na kwa makakala ghino ghoha." 6 Bhahe, Yoshuwa ngabhapila mota, na kwalekekeya bhakelebhuke kajhabhe. 7 Mucha akibha abhapii njwe chehemo jhabhe nucho jha likabila lya Manache, kwenio ku Bashane. Helahela Yoshuwa jwene ngabhapila nucho jhenge jha likabila lyene lya Manache, kwenio kulitipiki lyobha mwa lukemba lwa Yoludane, pamonga na akalongo mundo. Yoshuwa ngabhapila mota na kwaleka bhajhende kajhabhe. 8 Ngabhalobholila, "Nkelebhuke kajhino kongo mmi na ilebhe mbwe, na nchambe nkolongwa gwa inyama yukukolekwa na hele mmi na madine gha feza, na chaabo na shaba na choma na ngobo yamahena hake. Mkabhaghane na akalongo bhino ilebhe yene yoha impokita kwa akamakoko bhino."

9 Bhahe, bhando bha likabila lya Leubene na Gade na nucho jha likabila lya Manache ngabhalekana na bhando bha makabila ghange gha Ichilahele kwenio ku Shilo, ku kilambo chaku Kanaane. Ngabhabhujha kwabhe ku kilambo cha ku Gileade, kilambo chabhe bhene kwa nhwilo gwa Bhambo Chapanga ngita channaghila Mucha.

10 Pubhahikita ku Gelilothi pahina na lukemba Yoludane ku kilambo cha ku Kanaane, ngabhachenga kachangwale chikupiikiya litambiko kikolongwa hake pahina na lukemba lwono. 11 Bhahe, ngaghahikilila malobhe gha bhando bha makabila ghange gha Ichilahele, kubhehe makabila gha Leubene na Gade na nucho jha likabila lya Manache ghakibha ghachengite kachangwale kikolongwa chikupikiya litambiko pahina na lukemba lwa Yoludane, ku kilambo cha ku Kanaane, upandi gwa Akichilahele. 12 Pibhajhohina gheniya Akaichilahele, ngabhakonganika pamonga kwenio ku Shilo kujhenda kukomana ngondo na makabila gheniya.

13 Bhahe, bhando bha ku Ichilahele ngabhantumita Finehache, mwana gwa mpiya litambiko Eleazale, kwenio ku Gileade kwa makabila gha Leubene na Gade na nucho jha likabila lya Manache. 14 Finehache ngajhenda pamonga na ilongoche kome, kila jhumo akibha nkolo jwa lungolo lwa likabila lya Akaichilahele upandi ghulitipiki lyobha. 15 Na bhene ngabhajhendila bhando bha makabila gha Leubene na Gade na nucho jha likabila lya Manache, kwenio ku Gileade ngabhalobholila, 16 "Nchambe gwoha gwa Bhambo Chapanga ukonya naha, ‘Ndi uhwange ghane ghongo ghumunkolwii Bhambo Chapanga jwa ku Ichilahele? Mboni munemwii Bhambo Chapanga kukuchenga kachangwale kukupikiya litambiko ngita kangano? 17 Bho, uhakaho ghututehi kwenio ku Peoli ukwela jhe? Bho, mmi kulola jhe kubhe tunakijhelebhula jhe na kulagha kongo twamela tuchumbuwa nchambe gwa Bhambo Chapanga? 18 Kilebhe ghane ngohe chinkotwike kunkengama Bhambo Chapanga? Anda munemwiye Bhambo Chapanga deleno, na kilabho nauyomela hake nchambe gwoha gwa Akaichilahele. 19 Ajha, anda kilambo chino kijheketelwa jhe kukujhopela, nhwikangane kongo mu kilambo cha Bhambo Chapanga, kwenio lihema lya Chapanga libhile, na mangota ntole chehemo, nambo chonde mangannemuya jhe Bhambo Chapanga hilu panane jhito twenga kwa ku kukichengela njangwale hele yukipiikiya matambiko kupeta kachangwale kakupikiya litambiko kala ka Bhambo Chapanga, Chapanga gwito. 20 Bho, Akane mwana gwa Zela palekita kuhobholeka mu ilebhe yakanikilwa, luhadabulo lwagwelii jhe nchambe gwoha gwa Ichilahele? Kabhele Akane akahwi jhe kanjika ndo kunhwalo gwa uhakaho gwake.’ "

21 Peniya bhando bha makabila gha Leubene na Gade na nucho jha likabila lya Manache ngabhajhangwila ilongoche bha makabila gha Ichilahele kubhehe, 22 "Bhambo Chapanga jwa ichapanga ndi Bhambo Chapanga! Bhambo Chapanga jwa ichapanga ndi Chapanga Jwabhii na Makakala ndi Chapanga! Jwenie amanya kwanike tutehi gheniya. Na Akaichilahele bhoha nabhamanya hele! Anda ghongo ndi uhakaho amu kuhenemuka kihobholelo kwa Bhambo Chapanga, jwene natuleka ghome mu lichiko lya deleno. 23 Anda twalekite Bhambo Chapanga nukukichenge kachangwale kalitambiko kito tabhete kupala tumpiikiya litambiko lyukomelekeya amu mahuno ama jhe lya uteeke, bhahe, Bhambo Chapanga natuhadabula tela na uhakaho gwito. 24 Nambo nai jhe. Tuteila naha kwa kujhoghopa kubhe pange jhe machiko ghughahika, yana hino nabhailobholela yana hito kubhehe, ‘Mangota mijhelanichwa bhole na Bhambo Chapanga, Chapanga jwa Akaichilahele? 25 Mmi kulola kubhehe Bhambo Chapanga abhekite lukemba lwa Yoludane kubhe mpaka pakate jhino na twenga, Mangota mwe makabila gha Leubene na Gade nkwetii jhe lipungo lyolyoha kwa Bhambo Chapanga.’ Yene yana hino ngabhahotwila kwahibhilikiya yana hito ikoto kunnyinamila Bhambo Chapanga. 26 Ndi nhwalo ngatuamwila kuchenga kachangwale kanga, nambo chi nhwalo gwa kupiikiya panane jhake litambiko amu litambiko lyukukomelekeya hilu matambiko ghange, 27 nambo tupala kachangwale kanga kabhaha ukombocho pakate jhito na mangota na ibheluko hito ipakuika, kubhehe twe tutumikila Bhambo Chapanga kwa matambiko ghito ghukomelekela na matambiko ghange, kwa matambiko ghito gha uteeke kupala yana ino yangaika jhe kuilobholela yana hito kubhehe ikwetii jhe lipungo lyolyoha kwa Bhambo Chapanga. 28 Kabhele ngatuwacha kubhehe anda ibhi ilebhe ngita yenie kilongwii kwito amu jhe kuibheluko ito kwa machiko ghighaika, natulongela, ‘Dolekeya nnandanikilo gwa uchangwale gwa Bhambo Chapanga, yenie akanahota bhito ngabhalonge, nhwalo gha kupiikiya matambiko ghukukomelekeya panane jhake amu matambiko ghange jhe nambo ngita ukombocho pakate jhito namangota.’ 29 Twe tupai jhe kunnemuwa Bhambo Chapanga ata pandina nu kuleka kuchenga kachangwale ka kupiikiya litambiko lyukukomelekeya amu litambiko lya uhembe amu litambiko lenge. Tupai jhe kupiya litambiko chehemo jhenge, nambo panane jha kachangwale ka Bhambo Chapanga tugha, Chapanga gwito jwabhii nnonge jha nyumba jhake."

30 Finehache, mpiya litambiko na ilongoche bha bhando bhoha na ilongoche bha lukolo lwa Akaichilahele pubhajhoina malobhe gheniya gha bhando bha makabila gha Leubene na Gade na nucho jha likabila lya Manache, ngabhaangina umiojho jhabhe. 31 Finehache, mwana gwa mpiya litambiko Eleazale, ngaghalobholila makabila gha Leubene na Gade na nucho jha likabila lya Manache kubhehe, "Deleno tumanye kubhe Bhambo Chapanga abhii pakate jhino nhwalo muntendii jhe uhakaho Bhambo Chapanga. Ngohe makombwile Akaichilahele nabhakomelekelwa jhe na Bhambo Chapanga."

32 Bhahe, Finehache mwana gwa mpiya litambiko Eleazale, pamonga na ilongoche ajhake ngabhatawika bhando bha makabila gha Leubene na Gade ngabhabhokita mu kilambo cha ku Gileade, ngabhajhenda ku Kanaane kwa Akaichilahele na kwachimulila malobhe gheniya. 33 Malobhe gheniya ngaghahalalicha Akaichilahele, ngabhannombita Bhambo Chapanga, nakuleka kukomana ngondo pamonga na mipangu jhabhe jha kuhangabhana kilambo cha makabila gha Leubene na Gade.

34 Bhando bha makabila gha Leubene na Gade, ngabhakema kachangwale cha kakupikiiya litambiko, "Ukombocho," ngabhalonge, "Kachangwale kanga ndi ukombocho gwito twabhoha nnonge jha Bhambo Chapanga."