1 Nambo Akaichilahele bhakahobholike jhe kwa ilebhe ipihitwa litambiko ikomelekelwe, nhwalo Akane ngatoila ilebhe yene ilaghilwa ikomelekelwe. Akane akibha mwana jwa Kalime, nchokolo jwa Zabude, jwahumila lukolo lwa Zela, jwa likabila lya Yuda, lilaka lya Bhambo Chapanga ngalijhakita panane jha Akaichilahele.

2 Yoshuwa ngatumita bhando kuhuma ku Yeliko bhajhende ku muche gwa ku Ai, ghubhii pahina na Bete Avena, upandi kulihumi lyobha mwa Betele. Ngabhalobholila, "Nnyende mukalingukiye kilambo."

Na bhene ngabhajhenda kulingukiya Ai. 3 Pubhakelewika kwa Yoshuwa, ngabhalongila, "Bhangajhenda jhe bhoha kukijhingilila kilambo chu ku Ai, nhwalo akolo kilambo bhene ndi bhandina. Bhando elufo ibhele amu itato bhakwela kukijhingilila kilambo chenio." 4 Bhahe, ngabhajhenda bhando ngita elufo itato kukijhingilila kilambo, nambo ngabhabhengitwa na akolo kilambo chu ku Ai. 5 Bhando bha ku Ai ngabhakomita Akaichilaele makome matato na chita na kwabhenga bhange kupeta palitangala lya muche ade Shebalimo, ngabhakomila muluhelelo. Akaichilahele ngabhahengelika mwojho na kujhoghopa.

6 Yoshuwa na ighogholo ya Akaichilahele nganjwepwila ngobho yabhe, bhoha ngagwila mangukama palonge jha Lichanduko lya Lilaghano lya Bhambo Chapanga, ngabhahighilika pena ade kimiye, ngabhakakijhitila lutukunda umuto jhabhe kulangi ungolongonde. 7 Yoshuwa ngalongila, "Natulola choto, mwe Mabhambo Chapanga! Nhwalo ghane mutujhombwiye kwiye jha lukemba lwa Yoludane nu kutubheka mu mabhoko gha Akaamole kupala bhatukomelekeye? Mbaha ngamutuleke kwiye jha ku Yoludane! 8 Ngohe Bhambo nonge nike, kone Akaichilahele bhatilite akamakoko bhabhe? 9 Bhahe, Akakanaane na akolo kilambo pibhapakujhoha malobhe ghena nabhatuyema na kutukomeleke njwenjwe pannema. Ngohe nantenda nike kulonda ichima jhino?"

10 Bhambo Chapanga ngannobholila Yoshuwa, "Ngohe jhinuka! Kilebhe ghane mikitaghii pahe naha? 11 Akaichilahele bhatei uhakaho. Bhalitwekwii Lilaghano lyango linalaghalikiya bhalikamule, bhatoi ilebhe ipihitwa palonge jha Bhambo. Na bhajhibhite na kukopokeya, ngabhahangalina pamonga na ilebhe yabhe. 12 Yene Akaichilahele bhahoto ng'o kwahotola akamakoko bhabhe. Bhatila akamakoko bhabhe nhwalo bhene bhakitei kilebhe chukukomelekelwa! Name jhe pamonga nabheniya kabhele ade mukikomelekeye kila kilebhe chikipalitwa kikomelekelwe. 13 Ngohe nnyeme na malobholele bhando bhakilinganikiye ku nhwalo gwa kunnyinamila Bhambo kilabho, mana ne Bhambo Chapanga, Chapanga jwa Akaichilahele, nilonge naha, ‘Pakate jhino ibhii ilebhe ipalitwa ikomelekelwe. Yene mihoto ng'o kwahoto akamakoko bhino ade ilebhe yene mikangila kutale!’ 14 Yene kilabho lukela bhoha nhika palonge jhango, likabila kwa likabila. Likabila limbakulihaghuu nalijhenda nnonge, na lukolo nandende hele. Lukolo lumbakuluhaghuu nalujhenda nnonge, nyumba kwa nyumba. Na nyumba jhimbakuluhaghula hele nalujhenda nnonge na mundo jhumojhumo. 15 Mundo jhojhoha jwapakukolelwa na ilebhe ipalitwa ikomelekelwe kwa mwotu palonge jha Chapanga, napalwa akomelekelwa, natiniwa kwa mwotu jwenie pamonga na kila kilebhe chake, nhwalo alikamwii jhe Lilaghano lyango ne Bhambo Chapanga, nukutenda kilebhe cha hone ku Ichilahele."

16 Bhahe, Yoshuwa ngalabha kujhimuka, ngabhalaghila Akaichilahele kuika nnonge jha Bhambo Chapanga, likabila kwa likabila, yene likabila lya Yuda ngalihaghulilwa. 17 Ngailetita pahina likabila lya Yuda lijhende nnonge jha Bhambo Chapanga, ngolo kwa ngolo na lukolo lwa Zelai ngaluhaghulilwa. Helahela ngaileta pahina lukolo lwa Zelai, na nyumba jha Zabudi ngaihaghulilwa. 18 Yoshuwa ngailetita nyumba jha Zabudi mundo kwa mundo, Akane mwana jwa Kalime na nchokolo jwa Zabudi na mwana jwa Zela, jwa likabila lya Yuda ngahaghulilwa. 19 Yoshuwa ngannobholila Akane, "Mwanango, mnombe Bhambo Chapanga, Chapanga jwa Akaichilahele, na peniya unnobholela hotuhotu ghunteile, mangahiya jhe."

20 Akane pajhangwila, "Chakaka ne ndei uhakaho palonge jha Bhambo Chapanga, Chapanga jwa Akaichilahele. Chenje ndi chindeile. 21 Puniimwene ngobho alanaho jhimo kubhoka ku Babele na madie gha mbijha ghina utopaho gwa kilo ibhele na nucho na nucho kilo jha chaabo nganogwilanako nukuitola, niwininike wii pahe nkate jha mu lihema lyango na mbijha yenio ibhii pamo momomo." Shekele ndi kipemo chibhapemila Akaebulaniya.

22 Bhahe, Yoshuwa ngatuma bhando, na bhene ngabhajhenda ade mulihema lya Akane. Ku ilebhe ikaiitwe mu lihema lyake na madine gha feza papa pahe pibhii ilebhe henge. 23 Ngabhatola nu kumpeleka Yoshuwa na bhando bhoha bhaku Ichilahele, na bhene ngabhaikutulila pahe palonge jha Bhambo Chapanga. 24 Yoshuwa pamo na Akaichilahele bhoha, ngabhankamwila Akane, mwana gwa Zela, nu kumpeleka mulikemba lya mang'ahe. Ngabhampelika pamonga na madine gha feza ghala na ngobho na chaabo na yana mundo inalome na ikeghe pamonga na ng'ombi na maponda na mambelele ghake, lihema lyake na kila kilebhe chabhii nacho. 25 Peniya Yoshuwa ngankonya Akane, "Nhwalo gwa nike mituletii mang'ahe? Bhambo Chapanga nannetela mang'ahe mabhene deleno!" Akaichilahele bhoha ngabhankong'winda Akane kwa maghanga ade kuwegha. Helahela ngabhakong'winda maghanga akalongo mundo na bhoha ngabhawila, peniya ngabhatiniya bhoha kwa mwotu. 26 Peniya ngabhalundika maghanga ngoo panane jhabhe, gheniya ghabhii ade deleno. Chehemo jhenio ngaikemitwa, Ling'engo lya mang'ahiko ade deleno.

Peniya lilaka lya Bhambo Chapanga ngalipolita.