1 Peniya Bhambo Chapanga ngannobholila Yoshuwa, "Nkoto kujhoghopa hilu kupwelela chochoha, tola akakomana ngondo bhoha na nnyende nabho kukijhingilila kilambo chuku Ai. Nhwalo munahota nkolongwa jwenio nimekite njwe pahe jha ulongoche gwino pamonga na bhando bhake bhoha na muche gwake. 2 Mkomelekeya muche gwa ku Ai pamonga na munahota nkolongwa gwake ngita chimukomilikiya muche gwa ku Yeliko pamonga na munahota nkolongwa gwake. Ilebhe yake pamonga na ipugho yake impakupukila naibhaha hino. Majhobhila kuhumi chukuyeto muche gwenio."

3 Peniya Yoshuwa ngabhoka pamonga na akakomana ngondo bhake bhoha kujhenda ku Ai. Ngahagwila bhando elufo selasine bhangajhoghopa na kwalobholela nabhalongolela kipinde cha uhiko. 4 Yoshuwa ngabhalaghalikiya naha, "Mangota namujhobhela muche gweno chukuyeto, namajhingilila. Nkoto kubhehe kutale nambo mma miho. 5 Ne pamonga na akakomana ngondo bhumbakubheniyabho, natubhaha tomitomi na muche gwenio. Bhando pibhapakubhehe tomitomi ngita chibhateila pibhatumbwila, twenga natwatila. 6 Yene bhene nabhachocha kutukengamila ade bhabha kutale na muche gwabhe, nabhawachila bhatubhutwiye ngita chibhateila pala pukutumbula. Twenga natwaleka bhutubhutuye. 7 Peniya mangota napwitukila pwitu kuhumii kola kumajhobhila na kuupukila muche gwenio, nhwalo Bhambo Chapanga, Chapanga gwino, namubheka muche gwenio pahe jha ulongoche gwino. 8 Pumupakupukila muche gwenio, namukomelekeya kwa mwotu ngita chanaghalikiya Bhambo Chapanga. Gheniya ndi malaghalikilo ghukukamula." 9 Peniya Yoshuwa ngabhalobholila bheniya bhajhende chehemo jhabhe jhukujhobhela, na bhene ngabhajhenda upandi ghulitipikii lyobha lya muche gwenio gwa ku Ai na ku Betele. Nambo Yoshuwa uhiko gwenio ngagholwika mu kighono cha Akaichilahele.

10 Yoshuwa ngalabhita kujhimwika, ngabhakonganicha Akaichilahele nu kujhenda ku muche gwaku Ai, kongo alongohine na ihokolo. 11 Akakomana ngondo bhakalongoine nabho ngabhaubhandikila muche gwenio na ngabhabheka kighono upandi gwa kachikachine mwa muche gwenio, kwiye jha ling'engo lya ku Ai. 12 Yoshuwa ngabhatoila bhando ngita elufo nhwano na kwatenda bhajhobhela pakate jha ku Betele na ku Ai, upandi ghulitipikii lyobha mwa muche gweno gwa ku Ai. 13 Lilongo likolongwa lya akakomana ngondo bhakilenganikiye kwa ngondo upandi gwa kachikachine mwa muche na bhibhahighile na bhakilenganikiye upandi ghulitipikii lyobha gwa muche. Nambo uhiko gwenio Yoshuwa ngagholwika mu lulambo. 14 Munahota nkolongwa jwa muche gwa ku Ai palola gheniya, ngajhenda kajhombe lulambo lwa lukemba lwa Yoludane kupala akomane ngondo na Akaichilahele. Nambo akamanyii jhe kubhehe muche gwake bhakaujhobhii mandae kuhumi chukuyeto. 15 Yoshuwa na bhando bhakibha nabho ngabhatenda ngita bhatei kulepelela, ngabhatumbwila kubhutukila kunjenga. 16 Akakomana ngondo bhoha bha muche gwa ku Ai, ngabhalaghilwa bhakengemile Akaichilahele, pibhakengemila bheniya, Yoshuwa kajhenda kutale na muche gwenio. 17 Pakibha jhe na mundo jwakahighalile ku muche gwaku Ai amu ku Betele, milyango jha muche tu ngauhighalika ngabhajhenda kwakengamila Akaichilahele.

18 Bhambo Chapanga ngannobholila Yoshuwa, "Nnenge nkowa gwino kwenio ku Ai, nhwalo muche gwenio nubhaha pahe jha ulongoche gwino." Yoshuwa ngateila ngita chalobholilwe. 19 Papa tu Yoshuwa pateila yene, lilongo lenge lilijhobhila upande ghonge ngalipitila nu kujhingii muche, ngaliupukila muche nu kukomelekeya kwa mwotu likituu. 20 Akakomana ngondo bha ku Ai pibhaghalambwika unyuma, ngabhalibhona lyoi lihukita tututu kujhenda kunane. Nambo bhene ngabhakibha chwapuu kubhii jhe kukutilila, nhwalo Akaichilahele bhala bhibhatilila kunjenga ngabhaghalambukila bhala bhibhakengima. 21 Yoshuwa na akakomana ngondo pibhalolita kubhehe lilongo lilijhobhila liupukii muche na lyoi likahuka tututu kuhumii umuche gwenio, ngabhaghalambwikila na kutumbuu kwakoma bhando bha ku Ai. 22 Bhala akakomana ngondo bhibhakomalikiya muche ngabhabhokita ku Ai na kulombana na Akaichilahele ajhabhe, yene bhando bha ku Ai ngabhatindilwa na Akaichilahele, na bheniya ngabhakomita akahighililke jhe hilu mundo jhumo pakate jhabhe, 23 nambo munahota nkolongwa jwa ku Ai ngabhampukila ghome, ngabhampelika kwa Yoshuwa.

24 Akaichilahele pibhajhomolila kwakomilikiya kwa upanga bhando bhoha bhuku Ai kola kunjenga kubhakengemila, ngabhabhujhita ku muche na kwakoma bhoha bhibhahighalile kwenio. 25 Bhando bhoha bhuku Ai bhibhakakomitwe lichiko lyenio, akanalome na akakeghe bhakibha ngita elufo kome na mbili. 26 Yoshuwa akanhulwii jhe lubhoko lwake lwakakamwii nkowa gwake kulenga ku Ai, ade pala pabhakomita akolo muche bhoha bha muche gwenio. 27 Akaichilahele ngabhapukila inyama kukolekwa na ilebhe henge ngita hela Bhambo Chapanga channaghila Yoshuwa. 28 Yene, Yoshuwa ngaukomelekeya muche gwa ku Ai kwa mwotu na kuutenda kubhehe lilundo ngita mahundo na ukebha ade deleno. 29 Peniya munahota nkolongwa jwa ku Ai ngabhankomita na kunhoma na kunnyenjela pankongo, pipitotolo ade kimiye. Nambo lyobha pulitumbila kutipika, Yoshuwa ngalaghalikila malelo ghake bhahuluwe na bhataghila pa litangala lya muche na peniya bhalundika maghanga ngoo panane jhake. Lilundo lyenio libhii ade deleno kwenio.

30 Peniya Yoshuwa nganchengila kachangwale kanyahinyahi ka litambiko Bhambo Chapanga, Chapanga jwa Akaichilahele, kukitombe ku Ebale. 31 Yoshuwa ngachengita kachangwale jhenio ngita Mucha ntumiche jwa Bhambo Chapanga, chabhalaghila Akaichilahele, tela na chiijhandikwe mu kitabo cha Mucha cha Malaghalikilo kubhehe, "Naibhaha njangwale ichengwitwe kwa maghanga ghangabhachwa hilu kupapaywa na chombu chochoha cha choma. Panane jha njangwale jhenio jha maghanga ngabhampihikiya Bhambo Chapanga matambiko ghukomelekewa na matambiko ghange gha uteeke." 32 Kwenio, nnonge jha nchambe gwa Akaichilahele, Yoshuwa ngalenganikiya lighanga nu kujhandika Lilaghalikilo lya Mucha panane jhake. 33 Akaichilahele bhoha na ilongoche yabhe na ighogholo na akakenga na akaghene bhoha bhubhakibha pakate jhabhe, gabhajhema kila upandi tomitomi na Lichanduko lya Lilaghano palonge jha akapiya matambiko Akalawe bhubhakibha bhagheghita Lichanduko lyenio lya Bhambo Chapanga. Nucho jhabhe ngabhajhema palonge jha kitombe Gilizimu na nucho jhenge ngabhajhema palonge jha kitombe Ebale, ngita hela Mucha, ntumiche jwa Bhambo Chapanga, chalaghilwa kwape mota Akaichilahele. 34 Peniya, Yoshuwa ngabhachomila malaghalikilo ghoha pamonga na mota na likoto ngita chiijhandikwe mu kitabo cha Lilaghalikilo. 35 Yene malobhe ghoha ghalaghilwa na Mucha, Yoshuwa ngachomita palonge jha nchambe gwa Akaichilahele na pakate jha akakeghe na yana na akaghene bhubhatamita pamo nabho.