1 Pibhajhomolila kujhomboka bhando bhoha bha ku Ichilahele, pulukemba lwa ku Yoludane, Bhambo Chapanga ngannobholila Yoshuwa, 2 "Ngohe, mahaghule akanalome jhumo jhumo kuhumi mu makabila kome na mabhele gha Akaichilahele, kila likabila mundo jhumo. 3 malaghila naha, ‘Ntola maghanga kome na mabhele kuhumii pakate jha lukemba Yoludane, pala pibhajhemita akapiya matambiko. Ntola maghanga ghena, na mukabheka pala pumpa kubheka kighono deleno.’ "

4 Yoshuwa ngabhakemita akanalome kome na bhabhele bhala bhabhahagwii pakate jha Akaichilahele, kila likabila mundo jhumo, 5 ngabhalobhalila, "Mulilongolele Lichanduko lya Lilaghano lya Bhambo Chapanga, Chapanga gwino ade pakate jha lukemba lwa Yoludane. Kila jhumo atwekela lighanga palibhegha lyake, kila lighanga kwa nhwalo jha likabila lya Akaichilahele. 6 Maghanga gheniya naghabhaha ukombokelo pakate jhino, na yana hino pipakunkonya machiko ghighahika ‘Nike mana jha maghanga ghanga kwino?’ 7 Mangota malobholela, ‘Lichanduko lya Lilaghano lya Bhambo Chapanga, pilipetichwa mulukemba lwa ku Yoludane na mache gha lukemba lweno ngaghahibhilwa kukokola.’ Yene maghanga ghanga naghabhaha ukombokelo gwa Akaichilahele machiko ghoha ghangapeta."

8 Akanalome bhala ngabhateila ngita chalongila Yoshuwa, ngabhaghegha maghanga kome na mabhele ade pakate jha lukemba Yoludane, lighanga limo lilangii likabila limo lya Akaichilahele ngita Bhambo Chapanga channaghalikiya Yoshuwa, ngabhaghegha ade pala pibhagholwika. 9 Yoshuwa ngajhemeka maghanga ghange kome na mabhele pakate jha lukemba, chehemo jhela jhibhakajhemite akapiya matambiko bhibhagheghita Lichanduko lela. Yene maghanga gheniya ghabhii ade deleno. 10 Akapiya matambiko bhibhagheghita Lichanduko lela, ngabhajhemita pakate jha lukemba lwa Yoludane ade pibhajhomolila kila kilebhe Bhambo Chapanga channaghila Yoshuwa kihengwitwe na bhando bhajhombwike tela. Yoshuwa ngahengita ghoha ghannaghila Mucha! Yene bhando ngabhajhombwika kajhombe.

11 Bhando bhoha pibhajhombwika na bhala akapiya matambiko ngabhalongolila na Lichanduko lela lya Lilaghano lya Bhambo Chapanga. 12 Akanalome bha likabila lya Leubene na likabila lya Gade na nucho jha likabila lya Manache bhakalongalile akalongo bhabhe Akaichilahele bhabhii na chilaha yabhe, ngita chibhalaghalikilwe na Mucha. 13 Bhando elufo alobaine bhibhakibhe na chilaha bhibhakilenganikiye kwa ngondo bhakibhe pamonga na Bhambo Chapanga ade kululambo lwa ku Yeliko. 14 Lichiko lyene Bhambo Chapanga nganteila Yoshuwa kubhehe kilongoche nkolongwa kwa Akaichilahele bhoha, na bhene ngabhannyokonikiya Yoshuwa machiko ghoha gha ughome gwake ngita chibhannyokonikiya Mucha mu ughome gwake.

15 Bhahe, Bhambo Chapanga ngannaghalikiya Yoshuwa, 16 "Mwalobholele akapiya matambiko bhibhaghegha Lichanduko lya Lilaghano, bhabhoke mulukemba lwa Yoludane." 17 Bhahe, Yoshuwa ngabhalobholila akapiya matambiko, "Mmoke mu lukemba Yoludane." 18 Akapiya matambiko bheniya bhubhajheghita Lichanduko lya Lilaghano lya Bhambo Chapanga pibhabhokita pakate jha lukemba lwa Yoludane, na kulebhata pandumba, papa mache ngaghatumbwila kukokwa ngita chighakibha nu kutwelela kabhele.

19 Akaichilahele pibhajhombwika lukemba lwa Yoludane mu lichiko lya kome lya mwehe gwa kutumbula, ngabhabhekita kighono ku muche gwa Giligale, upande ghulihumi lyobha mwa ku Yeliko. 20 Yoshuwa ngajhemika maghanga ghala kome na mabhele ghubhagheghita kuhuma kulukemba lwa Yoludane kwenio ku Giligale. 21 Peniya Yoshuwa ngabhalobholila Akaichilahele, "Yana hino pipakunkonya machiko ghughahika, ‘Nike mana jha maghanga ghanga kwino?’ 22 Mangota mwalobholela naha, ‘Bhando bha ku Ichilahele bhakajhombwike pajhomo mulukemba lwa Yoludane.’ 23 Namalobholela kubhehe Bhambo Chapanga, Chapanga gwino, ngajhomicha mache gha lukemba lwa Yoludane kwa nhwalo gwino, ngajhombwika ngita hele chateila ku mbwane jha Shamu. Ngajhomicha mbwane palonge jhino ngannyombwika. 24 Bhambo Chapanga ateila yene kupala bhando bhoha pannema bhamanye kubhehe lubhoko lwa Bhambo Chapanga luna makakala, na mangota mipalwa munyinamila Bhambo Chapanga, Chapanga gwino, machiko ghoha ghangapeta."