1 Bhando bha likabila lya Manache, jwakibha mwana jwa litibho jwa Uchupo. Helahela ngabhapilwa chehemo jhabhe kwa kiumbuumbu nnobhole. Makile, mwana jwa litibho jwa Manache, tate mundo Gileade, ngapilwa ilambo ya ku Gileade na ku Bashane, nhwalo ajhogwipa jhe ngondo. 2 Bhange bhibhahighilike bha likabila lya Manache ngabhapilwa chehemo jhabhe kulengana na ngolo yabhe. Ngolo yenie ikibha ya Abiezele na Heleke na Asiliele na Shekemo na Hefele na Shemida, bheniya bhoha bhakibha ibheluko inalome ya Manache, mwana jwa Uchupo. 3 Nambo Selofehade, mwana gwa Hefele, mwana gwa Gileade, mwana jwa Makile na mwana jwa Manache, bhakapapite jhe yana inalome, nambo ngabhapapita yana ikeghe tugha, mahina ghabhe ghakibha Mala na Noa na Hogila na Milika na Tiliza. 4 Achikabhale bheniya ngabhannyendila mpiya litambiko Eleazale na Yoshuwa, mwana gwa Nune, na ilongoche bhange ngabhalongolila kubhehe, "Bhambo Chapanga ngannaghila Mucha atubhaghulile na twe twabhoha kilambo ngita chabhabhaghulile akanalome bha likabila lito." Yene nkengama nhwilo gwa Bhambo Chapanga, Yoshuwa ngabhabhaghulila chehemo jhabhe ngita chabhapila akanalome bha likabila lyabhe. 5 Yene ndi likabila lya Manache chilinjonjwikiwa chehemo jhenge yane kilambo cha ku Gileade na Bashane chikibhi upande ghulihumii lyobha mwa lukemba lwa Yoludane, 6 nhwalo achikabhale bhamba bha Selofehade bha likabila lya Manache ngabhapilwa chehemo yabhe ngita akanalome bha likabila lyabhe chibhapilwa. Kilambo cha Gileade ngikipilwa kibheluko chenge cha akanalome bha likabila lya Manache. 7 Kilambo cha likabila lya Manache kikatumbuli ku Ashele nu kujhenda ade ku Mikimetate kwa upandi ghulihumi lyobha mwa Shekemo, kabhele mpaka gwake ngaujhendelila kuchine ade kilambo cha bhando bha ku Ene tapua. 8 Kilambo cha Tapua kikibha cha Manache, nambo muche gwa Tapua, gwenio ukibha mumpaka, ukibha gwa yana ya Efulaimo. 9 Mpaka gwenio gwa Manache ngauhelila ade kukipela cha Kana. Miche jhiikibha kuchine jha Kana, ikibha jha Akaefulaimo pamonga nu kubhehe mu likabila lya Manache. Kabhele mpaka ukapitite upande gwa kachikachine mwa kipela cha Kana nu kujhomoke ku mbwane jha Mediteleniya. 10 Upande gwa kuchine ndi likibha likabila lya Efulaimo na upandi gwa kachikachine ndi likibha likabila lya Manache, mpaka gwake ukibha mbwane jha Meditelaniya ku upandi ghulitipikii lyobha. Likabila lya Ashele likibha upandi gwa kachikachine mwa mulitipikii lyobha mwa Manache na kachikachine upandi gwa kulihumii lyobha mwa likabila lya Ichakale. 11 Helahela mu kilambo cha likabila lya Ichakale na likabila lya Ashele, likabila Manache ngilipilwa ilambo ya lya Betesheane na Ibuleamu pamonga na chenda yake na miche jha Dole na Enidole na Taanake na chenda jhake Megido na chenda jhake. 12 Nambo ibheluko ya Manache bhakahotwii jhe kwabhenga akolo miche bheniya, Akakanaane ngabhajhendelila kutama mwenio, 13 pamonga na Akaichilahele kubhehe na makakala hake, bhakahotwi jhe kwabhenga nambo ngabhahengicha mahengo kwa kwachokolekeya.

14 Bhando bha kibheluko cha Uchupo ngabhannyendila Yoshuwa, na kunnobholela, "Kilebhe ghane mutubhaghuli chehemo jhimo ndo jha kilambo kone twe Bhambo Chapanga atupii mota jhukubhelekana hake?"

15 Yoshuwa ngabhajhangwila, "Anda mmelikine naha, ata kilambo cha itombe ya ku Efulaimo kinkwela jhe kabhele, bhahe, nnyendengane mu chaghila mu kilambo cha Akapeliche na cha Akalefaye, mukakeche chaghila chenie na kitamo chino kibhaha mwenio."

16 Na bhene ngabhannyangwila, "Chakaka kilambo chenje cha itombe kitukwela jhe, ata yene bhala Akakanaane bhoha bhibhatama mundika bhibhabhii na mutuka ghakatengenichwe kwa choma, helahela bhoha bhibhatama ku Bete Sheane pamonga na chenda jhake na bhala bhibhatama mu lulambo lwaku Yezileele."

17 Bhahe, Yoshuwa ngailobholila yana ya Uchupo, yane likabila lya Efulaimo na Manache, "Chakaka mangota nnyolokine na mmi na makakala hake. Ihalala jhe kubhehe na chehemo jhimo tugha, 18 nambo hele kilambo cha itombe nakibhaha chino. Pamo nakubhehe litogholo nakibhaha chino, namukecha nukubhujhii choha kuhuma upandi ghongo ade upandi ghonge. Nhwalo mwe namabhenga Akakanaane, pamo nukubhehe na mutuka itengenichwe kwa choma na makakala."