1 Peniya, Yoshuwa ngaghakonganicha makabila ghoha gha Akaichilahele ku Chekemo, ngabhakemita ighogholo na ilongoche na akakenga na akanahota bha ku Ichilahele, nabhene ngabhahika palonge jha Chapanga. 2 Yoshuwa ngabhalobholila bhando bhoha, "Bhambo Chapanga, Chapanga gwa Akaichilahele ilonge naha, makacho, akahokolo bhino bhatamita kwiye jha lukemba lwa Efulate, ngabhaijhinamila ichapanga henge. Kihoko chimo, jwakemitwa Tela, tatemundo Ulahimo na Nahole. 3 Nenga Chapanga ngannimmohita hoko gwino Ulahimo, tate gwino kuhumi kwiye jha lukemba Efulate, nganninetita pamba mu kilambo chenje cha ku Kanaane, nganimpila ibheluko twe hake. Ngannimpila Ichaka, 4 na jwene Ichaka nganimpila Yakobu na Echau. Echau nganimpila kilambo cha itombe ya Seile kibhehe chake. Nambo Yakobu na yana mundo ngabhahelila ku Michile. 5 Peniya, nganatuma Mucha na Alune, nganetita mabulo mu kilambo chu ku Michile, paligha nganimmohita mangota mu kilambo chenie. 6 Nganabhohita akahoko bhino kuhumi mu kilambo chu ku Michile, na kwaleta umbwane jha Chamo. Akamichile ngabhakengimila akahoko bhino na mutuka ya ngondo jhihutwa na maponda na akakomana ngondo bhibhahobhokii falache. 7 Akaichilahele ngabhannelila ne Bhambo Chapanga, ngamekita lubhendo tyoo pakate jhabhe na Akamichile, nu kuitenda mbwane jhayekelele Akamichile. Mangota mabhene ngamalola ghinatendii Akamichile.

"Ngantamita ku njenga kwa yaka twe."

8 Peniya, nganinongwicha ade ku kilambo cha Akaamole, bhibhatamita kwiye jha upandi ghulihumii lyobha mwa lukemba Yoludane. Ngabhakomina na mangota, nambo nenga nganintenda mahotole bheniya, ngamakomelikiya nu kutola kilambo chabhe. 9 Balake, mwana gwa Sipole, jwakibha munahota nkolongwa jwa ku Moabo, ngaika na kwajhingilila Akaichilahele. Nganalika Baalamo, mwana jwa Beole, ahike kumpe likoto mangota. 10 Nambo nenga nikannyokaniki jhe Balaamo, nganinkombwila mangota nu kuntenda ampe mota badala jhukumpe likoto. 11 Peghapetita gheniya, ngannyombwika lukemba Yoludane, ngamaika ku kilambo chuku Yeliko. Bhando bha ku Yeliko ngabhakomina na mangota. Helahela ngankomina na Akaamole na Akapeliche na Akakanaane na Akahite na Akagiligache na Akahive na Akayebuche, na mangota ngabhahotwila bheniya. 12 Punyingila mu kilambo chela nganatenda bhannyoghope kupala mabhenge akanahota akakolongwa bhabhele bha Akaamole. Makatehi jhe ghanga kwa kuyenge mapanga amu mipinde jhino. 13 Nganimpila mighonda mukalemite jhe, na miche mukachengite jhe, mwenio ngohe mitama na kulye michabibo na micheitune na mikongo jha micheitune jhangapanda mangota.

14 Yoshuwa ngajhendilila kulonge, "Ngohe, munyinamii Bhambo Chapanga na kuntumikii kwa mwojho ghoha na kukuhobholeka. Mangajhinamii jhe ichapanga, ibhajhinamila akahoko bhino, kwiye jha lukemba Efulate, mu kilambo chuku Michile. Mutumikila kanjika ndo Bhambo Chapanga! 15 Anda mpahi jhe kuntumiki Bhambo Chapanga, bhahe, deleno nhaghule ghane jhumpakutumikila. Ichapanga hela ibhajhinamila akahoko bhino, kwiye jha lukemba Efulate, amu ichapanga ya Akaamole, ngohe mitama mu kilambo chabhe. Nambo nenga na nyumba jhango, natunyinamila Bhambo Chapanga."

16 Bhando bheniya ngabhajhangwila, "Tuhoto ng'o kunneka Bhambo Chapanga na kuijhinamii ichapanga henge! 17 Nhwalo Bhambo Chapanga, Chapanga gwito, ndi jwatubhoita twenga pamonga na akahoko bhito, mu kilambo cha ku Michile kutukibha akabhanda, ngatulola kwa miho ghito tabhete mahengo gha kukangacha ghateila. Ngatulondita umwanja gwito na pakate jha bhando bheniya ngatupeta pakate jhabhe. 18 Bhambo Chapanga ngabhabhohita bhando bhoha Akaamole bhutamita mu kilambo chene. Yene twenga natunyinamila Bhambo Chapanga, nhwalo ndi Chapanga gwito."

19 Nambo Yoshuwa ngabhalobhalila, "Mangota mihoto jhe kunnyinamii Bhambo Chapanga, nhwalo jwene ndi Chapanga jwa nyahinyahi na jhuna wiho, jwene ihoto jhe kunekekeya changantembekeya. 20 Anda munnekite Bhambo Chapanga na kuijhinmii ichapanga jha kighene, nanchwapula na kukomelekeya njwe, pamo nu kuntende ghambone ghoha ghano pala pututumbwila."

21 Nambo bhando ngabhannobholila Yoshuwa, "Naha jhe! Twenga natunnyinamila Bhambo Chapanga tugha."

22 Yoshuwa ngabhalobhalila, "Mangota mabhene ndi machahide bha miojho jhino kubhehe nhagwii kunyinamila Bhambo Chapanga."

Na bhene ngabhanyangwila, "Ena, twe ndi akachaide." 23 Jwene ngabhalobholila, "Bhahe, mmohengane ichapanga jha kighene jhiminako, mukankengima Bhambo Chapanga, Chapanga gwa Akaichilahele, kwa mwojho gwino gwoha."

24 Bhando bheniya ngabhannyangwila Yoshuwa, "Natunyinamila na kunnyokanikiya Bhambo Chapanga, Chapanga gwito."

25 Yene, Yoshuwa ngabhekita lilaghano na bhando bheniya, kwenio ku Chekemo, ngabhapila nhwilo na malaghalikilo ghukukamula. 26 Yoshuwa ngajhandika ghanga ghoha mu kitabo cha lilaghalikilo lya Chapanga, peniya, ngatola lighanga likolongwa na kujhemeka pahe jha mwalone, pahina na palihema lya Bhambo Chapanga. 27 Peniya, ngabhalobhalila bhando bhoha, "Lighanga lende nalibhaha uchaide gwito, nhwalo lijhohine malobhe ghoha ghatulobholila Bhambo Chapanga. Nalibhaha uchaide kwino anda namuneka Chapanga gwino." 28 Bhahe, Yoshuwa ngabhalekikiya bhando bhajhende, na bhene ngabhabhujhita kila mundo kajhake.

29 Pughapetita gheniya ghoha, Yoshuwa, mwana gwa Nune na ntumiche gwa Bhambo Chapanga, ngajhomwika kongo akibha na yaka miya jhimo na kome. 30 Bheniya ngabhanchika mu chehemo pibhamaghulila kubhehe pabhe, kwenio ku Timunate sela, mu itombe ya Efulaimo, upandi gwa kachikachine mu itombe ya ku Gaashe.

31 Akaichilahele ngabhantumikila Bhambo Chapanga, kipinde choha cha ughome gwa Yoshuwa, na kipinde choha chibhatamita ighogholo na bhene bhakalolite kwa miho ghabhe kila kilebhe Bhambo Chapanga chabhatendila Akaichilahele.

32 Ihupa ya Uchupo yenie Akaichilahele ngabhailetita kuhumi ku Michile, ngabhaichikita, kwenio ku Chekemo chehemo jhakahemi Yakobu, kwa yana ya Amole, tate mundo Chekemo, kwa ipande miya jhimo ya madine gha feza. Undope gwenio ngaubhila gwabhe ibheluko ya Uchupo.

33 Eleazale mwana gwa Alune, hele ngajhomwika na kuchikwa ku Gibeya, muche gwenio ngapilwa Finehasi, mwana mundo, mu ilambo ya itombe ya ku Efulaimo.