1 Chehemo ibhaghulilwa kibheluko cha yana ya Uchupo kwa ndela kiumbuumbu nnobhole ikatumbulii lukemba lwa Yoludane ku Yeliko, pina chembwe cha Yeliko upande gwa kulihumi lyobha, kujhendele ade kunjenga, mpaka ku itombe yaku Yeliko mpaka ku Betele. 2 kuhumi ku Betele ngijhendilila ku Luzu, ngaupetila Atalote kwenio kubhatamita Akaalake. 3 Kwenio nguhelila kulitipiki lyobha ku kilambo chu ku Akaafulete ade ku Bete Holone pahe, jha upande gwa kachikachine na Gezele nu kujhomoke ku mbwane jha Mediteleniya.

4 Nucho jha likabila lya Manache na likabila lya Efulaimo kubhoke kwa Uchupo ngabhapilwa kilambo chenie kubhehe chabhe.

5 Bhando bha likabila lya Efulaimo kulengana na lungolo lwabhe ngabhapilwa chehemo jhabhe, mpaka gwake ukibha upande gwa kulihumi lyobha ngaupeta ku Atalote Adale ade ku Bete Holone jha kunane, 6 na kujhomoke kumbwane jha Meditelaniya. Kwa upande gwa kachikachine, mpaka ngaupeta ku Mikimetati na kujhenda upande gwa kulihumi lyobha ngutindii nu kujhenda ku Taanate shilo na kwenio ngupete upande gwa kulihumi lyobha mwa Yanoa. 7 Kubhoke ku Yanoa ngujhendelila ade ku Atalote na ku Naala, nu kuhika ku Yeliko, kwenio ngujhomolela mulukemba lwa Yoludane. 8 Kubhoke ku Tapua, mpaka ghujhenda upande gwa kulitipiki lyobha ade kulukemba lwa Kana nu kujhomoke kumbwane jha Meditelaniya. Chenio ndi kilambo chibhapilwa bhando bha likabila lya Efulaimo kulengana nu lungolo lwabhe, 9 pamonga na miche jhoha na chenda ibhabhekwila kunhwalo gwa nucho jha likabila lya Manache. 10 Nambo bhando bha Akaefulaimo bhakabhengitii jhe Akaakanane bhibhatama ku Gezele. Akaakanane bheniya ngibhajhenda kutama pakate jha Akaefulaimo ade deleno, ngabhahengita mahengo ngita akabhanda bha Akaichilahele.