1 Pubhakibha kwenio ku Shilo ku kilambo cha ku Kanaane ilongoche ya ngolo jha Akalabhe ngabhannyendila mpiya litambiko Eleazale na Yoshuwa mwana gwa Nune, na ilongoche ya ngolo jha makabila yoha ya Akaichilahele, 2 ngabhannobholila, "Bhambo Chapanga akannaghalikiye Mucha tipelwa miche jha kutama na chehemo jhambone jhakukoleka inyama hito." 3 Yene, ngita Bhambo Chapanga chalaghila, Akaichilahele ngabhapila Akalabhe chehemo jha kutama na chehemo jhambone jhukukoleka.

4 Lukolo lwa kutumbula kupelwa muche kwa kiumbuumbu nnobhole lukibha lukolo lwa Akakohate. Panakate jhabhe bhabhelukwa bha mpiya litambiko Alune, ngabhapilwa kwa kiumbuumbu nnobhole, miche jhikibha chehemo jha makabila gha Yuda na Chimeone na Benyamine. Miche jhibhapilwa ikibha kome na mitato. 5 Bhando bha lungolo lwa Akakohate bhubhahighilike ngabhapilwa miche kome jhikibha chehemo jha makabila gha Efulaimo na Dane, na chehemo jha nucho jha likabila lya Manache upandi ghulitipiki lyobha.

6 Bhando bha lungolo lwa Gelishone ngabhapilwa kwa kiumbuumbu nnobhole miche kome na mitato, chehemo jha makabila gha Ichakale na Ashele na Nafutale upandi ghulitipikii lyobha, na chehemo jha nucho jha likabila lya Manache kwenio ku Bashane upandi ghulihumi lyobha.

7 Lungolo lwa bhando bha Melale ngabhapilwa miche kome na mibhele, chehemo jha makabila jha Leubene na Gade na Zebulone.

8 Akaichilahele ngabhapila Akalabhe miche jhene pamonga na chehemo jha kukoleka inyama, ngita Bhambo Chapanga channaghalikiya Mucha.

9 Ghanga ndi mahina gha miche kuhuma chehemo jha likabila lya Yuda na Chimeone ghighapilwa kwa, 10 kibheluko cha mpiya litambiko Alone, bhubhakibha bhando bha lungolo lwa Kohate jwakibha jwa likabila lya Labhe. Chehemo jhabhe bhakalongolile kupata, nhwalo kiumbuumbu nnobhole chabhe kikibha chukutumbula. 11 Ngabhapilwa Kiliate Aliba hele ikemitwa Hebulone, pamonga na chehemo yukukoleka inyama jhitindile mu kilambo cha itombe yuku Yuda. Aliba akibha tate gwake Anake. 12 Nambo nng'onda gwa muche gwene pamonga na chenda jhitindile, ngapilwa Kalebo, mwana gwa Yefune ibhe yake.

13 Yene kibheluko cha mpiya litambiko Alune, ngabhapilwa ku Hebulone hele ukibha muche gwa kubhutukila, helahela ngabhapilwa muche gwa Libina pamonga na chehemo jhake jhukulekela inyama, 14 ku Yatile pamonga chehemo jhake jhukulekela, Eshitemoa pamonga na chehemo jhake jhukulekela inyama, 15 ku Holoni pamonga chehemo jhake jhukukoleka inyama, ku Debile pamonga na chehemo jhake jhukukoleka inyama, 16 Aini pamonga na chehemo jhake jhukukoleka inyama, Yuta pamonga na chehemo jhake jhukukoleka inyama na Bete shemeshi pamonga na chehemo jhake jhukukoleka inyama. Miche yoha jhibhii jha makabila gha Chimeone na Yuda, ikibha ticha. 17 Kuhumi mu likabila lya Benyamine mu kibheluko cha Alune, ngabhapilwa miche jhenje, Gibione na Geba pamonga na chehemo jhake jhukulekela inyama, 18 ku Anatoti pamonga na chehemo jhake jhukulekela, Alimone pamonga na chehemo jhake jhukulekela. Miche jhoha jhibhapilwa ikibha ncheche. 19 Miche jhoha jhibhapilwa ibheluko ya Alune bhibhakibha akapiya matambiko, ikibha miche kome na mitato, pamonga na chehemo jhake jhukulekela.

20 Ngolo henge ya Akakohate, hele Akalabhe, ngabhapilwa miche kuhumi mu likabila lya Efulaimo. 21 Kuhumii mu kilambo cha itombe yaku Efulaimo, ngabhapilwa Chekemo, muche gwa kubhutukila, pamonga na chehemo jhake jhukulekela inyama, na ku Gezele pamonga na chehemo jhake jhukulekela inyama, 22 ku Kibusaimo na Bete Holone, pamonga na chehemo jhake jhukulekela, miche jhoha jhibhapilwa ikibhe ncheche. 23 Pa likabila lya Dane ngabhapilwa Eliteke pamonga na chehemo jhake jhukulekela, na Gibetone pamonga na chehemo jhake jhukukolekela inyama, 24 Aiyalone pamonga na chehemo jhake jhukulekela inyama na Gate limone pamonga na chehemo jhake jhukulekela inyama. Miche jhoha jhibhapilwa ikibha ncheche. 25 Panucho jha likabila lya Manache upandi ghulitipiki lyobha, ngabhapilwa Taanake pamonga na chehemo jhake jhukukoleka inyama na Gate Limone pamonga na pukukoleka inyama. Miche yoha jhibhapilwe ikibha mibhele. 26 Bhahe, miche jhoha ngaipilwa ngolo ya Akakohate, yihighilike ikibha kome pamonga na chehemo jhake jhukukoleka inyama.

27 Ngolo jha Gelishone kuhumi mu likabila lya Akalabhe, ngabhapilwa miche mibhele, pamonga na chehemo jhake jhukukoleka inyama, kubhoke mu nucho jha likabila lya Manache, upande ghulihumii lyobha. Miche jhene ikibha ndi Golane, muche ghukubhutukila, kwenio ku Bashane, pamonga na chehemo jhake jhukukoleka inyama na Beshitala, pamonga na chehemo jhake jhukukoleka inyama, 28 kuhumi muchehemo jha likabila lya Ichakale, ngabhapilwa, Kisheone pamonga na chehemo jhake jhukulekela inyama, na Dabelate pamonga na chehemo jhake jhukukolekela inyama,

29 ku Yelumuti pamonga na chehemo jhake jhukukoleka inyama na Eni Ganimo pamonga na chehemo jhake jhukukoleka inyama. Miche jhoha jhibhapilwa ikibha ncheche. 30 Kuhumi mu chehemo jha likabila lya Achele ngabhapilwa, Mishale pamonga na chehemo jhake jhukukoleka inyama, na Abidone pamonga na chehemo jhake jhukukoleka inyama, 31 Helikate pamonga na chehemo jhake jhukulekela inyama na Lehobu pamonga na chehemo jhake jhukulekela inyama. Miche jhoha jhibhapilwa ikibha ncheche. 32 Kuhuma mu chehemo jha likabila lya Nafutale ngabhapilwa, Kadeshe, muche gwa kubhutukila ghubhii kwenio ku Galilaya pamonga na chehemo jhake jhukukoleka inyama, na Hamote Dole pamonga na chehemo jhake jhukukoleka inyama Kalitane pamonga na chehemo jhake jhukukoleka inyama. Miche jhoha jhibhapilwe ikibha mitato. 33 Miche jhoha jhibhapilwa ngolo jha Gelichone ikibha kome na mitato, pamonga na chehemo jhake jhukukolekela inyama.

34 Lukolo lwa Melale kuhuma mu likabila lya Akalabhe, ngabhapilwa miche ncheche kuhumii mu likabila lya Zebulone. Miche jhene ikibha Yokineamo na Kalita, pamonga na chehemo jhake jhukukolekela inyama, 35 ku Dimuna na chehemo jhake jhukukolekela inyama na Nahalale pamonga na chehemo jhukukolekela inyama. Miche jhoha jhibhapilwe ikibha ncheche. 36 Kuhumi mu chehemo jha likabila lya Leubene ngabhapilwa, Bezele pamonga na chehemo jhukukolekela inyama, na Yahaze, na chehemo jhukukolekela inyama, 37 Kedemothi na chehemo jhukukolekela inyama na Mefaathi, na chehemo jhukukolekela inyama. Miche jhoha jhibhapilwe ikibha ncheche. 38 Kuhumi mu chehemo jha likabila lya Gade ngabhapilwa, Lamoti jha Gileade, muche gwa kubhutukila, pamonga na chehemo jhukukolekela inyama, na Mahanaimo, pamonga na chehemo jhukukolekela inyama, 39 Heshibone na chehemo jhake jhukukolekela inyama na Yazele, pamonga na chehemo jhake jhukukolekela inyama. Miche jhoha jhibhapilwe ikibha ncheche. 40 Miche jhoha jhibhapilwa lukolo lwa Melale lwa likabila Akalabhe likibha kome na mibhele. 41 Miche jhoha jhibhapilwa bhando bha likabila lya Akalabhe mu chehemo jha Akaichilahele ikibha makome ncheche na nane pamonga na chehemo jhukukolekela inyama. 42 Kila muche pakate jha jhenio ikatindilwe na chehemo jhukukolekela inyama.

43 Bhahe, Bhambo Chapanga ngabhapila Akaichilahele kilambo chene choha, chabhalaghila akahoko bhabhe kwapela. Nabhene ngabhatola kubhehe kilambo chabhe na kutama mwenio. 44 Bhambo Chapanga ngabhateila bhatame kwa uteeke, kila chehemo mu kilambo ngita chalapila akahoko bhabhe. Abhii jhe likoko jhojhoha jwaghajhighite kwakunyula, nhwalo Bhambo Chapanga nhabhapila kwahotola akamakoko bheniya. 45 Libhii jhe lilaghano lyolyoha lyambone lyalapila Bhambo Chapanga kwa bhando bhuku Ichilahele, lyangalenganikiya. Malaghano ghoha akalenganikiye.