1 Bhahe, Yoshuwa mwana gwa Nune, ngatuma kwakiyepela bhando bhabhele kubhoka ku Shitimo bhajhende bhakalingukiye ku Yeliko, pubhahikita ku Yeliko, ngabhahikila pa nyumba jha mwikeghe jhumo nngongola liina lyake Lahabo, ngabhagholwika pena. 2 Munahota nkolongwa jwa ku Yeliko ngalobholilwa, "Dola, Uhiko ghongo Akaichilahele bhajhingii kulingukiya kilambo chito." 3 Bhahe, munahota jwa ku Yeliko ngatuma bhando kwa Lahabo, alongila, "Bhapiya panja bhando bhubhabhi mu nyumba jhino nhwalo bheniya bhahikite kulingukiya kilambo choha."

4 Nambo mwikeghe jhola akibha abhahihite bhando bheniya, ngalonge, "Chakaka bhakahikite kwa nenga, nambo namanyii jhe kubhahumii. 5 Kabula jha kudinda nnyango gwa muche pulujhingila lubhendo, bhando bheniya ngabhabhokita. Na kubhajhenda ne nikumanyii jhe, makengamile kajhombe, mihoto kwakolela." 6 Nambo Lahabo akibha abhahihite kunane kudale na kwayekelela mapepetae ghukutendekeya ngobho jha kitane panane jhake. 7 Bhahe, bhando bheniya bhibhatumitwa na munahota nkolongwa ngabhakabhokita kwapalaha kopetela ndela jhela jhijhenda mulyomboko lya lukemba lwa ku Yoludane. Papa pibhabhokita ku kilambo chene, litangala lya kujhingilila lijhakudindwa. 8 Lahabo ngabhajhendila akalingukiya bheniya kwenio ku dale kabula jha bhando bheniya kugholoka, 9 ngabhalobhalila, "Ne manye kubhehe Bhambo Chapanga ampekiye kilambo chenje, tubhii na bhoghohe na kuhengeleka mwojho kwa nhwalo gwino. 10 Nhwalo tijhoine Bhambo Chapanga paghajhomicha mache gha ku mbwane jha Chamo pala punhumila ku kilambo cha ku Michile, na mangota chela chimwatendila akanahota akakolongwa bhabhele Sione na Ogu bha Akaamole pibhakibha kwiye jha lukemba lwa ku Yoludane, ngamakomalikiya njwenjwe. 11 Papa pitujhoina tugha gheniya, tujhakubhehe leghele na ngatuhechuka hake kwa nhwalo gwino. Bhambo Chapanga, Chapanga gwino, ndi Chapanga jwa kunane kumahunde na pahe pannema! 12 Yene nnapile kwa liina lya Bhambo Chapanga kubhehe antendi ghambone nenga na akalongo bhango ngita nenga chinintendi ghambone. Mbala umbele nginyililo jha kuhobholeka kwino. 13 Nnaghane kubhehe namwaleka ghome atate gwango na amajhe gwango na akahacha bhango na akalombo bhango na akalongo bhango bhoha, namutukoma jhe!"

14 Bhando bheniya ngabhannyangwila Lahabo, "Chapanga atukoma anda tutei jhe chela chitulongi! Anda nukuhyekujhe tikihikila kuhenga pamba, Bhambo Chapanga papakutupela kilambo chenje natuntendela ghambone."

15 Peniya Lahabo ngabhahulwiya kwa lughojhe kupete palidilicha, nhwalo nyumba jha Lahabo ikachengwitwe kwa kulombana na lipamanda lya muche gwa ku Yeliko.

16 Ngabhalobholila, "Nnyende mukakihiye kukitombe kupala bhala bhibhampalaha bhakoto kummona. Ntame kono kwa machiko matato, ade bhala bhibhampalaha pibhapala kukelebhuka, pena nnyendelela na mwanja."

17 Bhando bhala ngabhannyangwila, "Kilapo chela chitulapiline natuhenga. 18 Chenje ndi chimipa kuhenga. Pitupa kujhingi mu kilambo chenje, ntabha luhunga lukele mulidilicha pala pumutuhulukiya. Mwakonganicha tate gwino na majhe gwino na akahacha bhino na akalongo bhino pakajhino. 19 Nambo mundo jhojhoha anda apitite panja jha nyumba jhino, kunhwe kwake natukokolekelwa jhe. Nambo mundo jhojhoha jwabhi nkate jhino anda bhamengwitwe, kuhwe kwake nakibhaha panane jhito. 20 Yene anda munnobholi mundo jhojhoha mahengo ghituhikila kuhenga, twenga natuhenga jhe kilapo chimutunyopita." 21 Lahabo ngajhangwila, "Naibhaha ngita chinnongile."

Yene ngabhatabhukina, ngabhajhawila. Na jwene ngatabha lughojhe lukele mulidilicha.

22 Akalingukiya bheniya ngabhajhenda ku itombe. Na kwono ngabhatamita kwa machiko matato ade bhala bhubhakibhe bhibhampalaha chehemo jhoha bhakabhakolijhe. 23 Bhahe akalingukiya bheniya bhabhele ngabhahulwika kuhumi ku kitombe, ngabhajhombwika lukemba na kuhika kwa Yoshuwa, mwana gwa Nune na ngabhachimulila ghoha ghibhakongine nagho. 24 Ngabhannobholila Yoshuwa, "Chakaka Bhambo Chapanga atupi kilambo chenje choha. Bhando bhoha bhilendema kwa bhoghohe kunhwalo gwito."