1 Kilabho putepute lukela Yoshuwa na bhando bhoha bhuku Ichilahele ngabhatumbwila mwanja kuhuma Shitimo. Pubhahikita palukemba lwa ku Yoludane, ngabhabhekita kighono kabula jha kujhomboka lukemba. 2 Pughapetita machiko matato ilongoche ngabhapetita pakate jha kighono chenie, 3 ngabhalobhalila bhando, "Pumpa kulibhona Lichanduko lya Lilaghano lya Bhambo Chapanga, Chapanga gwino, ligheghitwe na akapiya matambiko kuhuma mulungolo lwa Akalabhe, mupita panja nu kulikengama, 4 ndi namuimanya ndela jha kupeta nhwalo munapeta jhe ndela jhenio kabula. Nambo mangalibhandikii jhe Lichanduko lya Lilaghano, mma kutale kilometa jhimo."

5 Yoshuwa ngabhalobhalila bhando, "Chonde mukijhelebhule kupala nnyeketelwe kunnyinamila Bhambo Chapanga, nhwalo kilabho Bhambo Chapanga nahenga nginyililo pakate jhino." 6 Peniya Yoshuwa ngabhalobhalila akapiya matambiko, "Ntole Lichanduko lya Lilaghano, nnongolele nako nnonge jha bhando." Na bheniya bhakatohi na kulongolela nako nnonge jha bhando.

7 Bhambo Chapanga ngannobholila Yoshuwa, "Kuhumii deleno, nandumbula kwalangiya Akaichilahele kubhehe mwenga ndi kilongoche nkolongwa na mmi pamonga na mwenga ngita chimila na Mucha. 8 Mwalaghile akapiya matambiko bheniya bhibhajhegha Lichanduko lya Lilaghano bhajheme muupele jha lukemba lwa Yoludane."

9 Bhahe, Yoshuwa ngabhalobholila Akaichilahele, "Ngohe nheghele pamba kujhokanikiya malobhe gha Bhambo Chapanga, Chapanga gwino." 10 Yoshuwa ngajhendelila kulongela, "Chakaka Chapanga jwabhii ghome nanabhenga Akakanaane na Akahite na Akaive na Akapeliche na Akagilgache na Akaamole na Akayebuche. Namangota naumanya kubhehe Chapanga jwabhii ghome abhii pakate jhino, 11 pala Lichanduko lya Lilaghano lya Bhambo jwa pannema ghoha, libhii pahina kujhomboka palonge jhino na kujhingii mulukemba lwa Yoludane. 12 Ngohe, nhaghule munalome jhumo jhumo kuhumi mu makabila kome na mabhele gha Akaichilahele, kila likabila mundo jhumo. 13 Kipinde njajho jha akapiya matambiko bhibhajhegha Lichanduko lya Lilaghano lya Bhambo Chapanga, Bhambo jwa pannema poha, pipakulebhata mu lukemba lwa Yoludane, mache ghighakokwa ghajhakulundikana."

14 Bhahe, bhando ngabhoka muighono yabhe nukujhenda kujhomboka lukemba lwa Yoludane, akapiya matambiko bhakalitwekii Lichanduko lya Lilaghano na kwalongolela bhando. 15 Kipinde chenio ndi kikibha kipinde cha mahuno na lukemba Yoludane lukibha lutwelii hake, nambo papa tugha bhibhajhegha Lichanduko lya Lilaghano pubhahikita lukemba lwa Yoludane na njajho yabhe pilebhita muupele jha lukemba lwenio, 16 mache gheniya ghighakokwila kuhumii kundumba na ghajhakulundikana pahina na muche gwa Adamo ghubhii pahina na kubomane jhu ku Saletane. Mache gheniya ghighakokwa kujhenda ku mbwane jha lulambo lwa lukemba lwa Yoludane, yane mbwane jha Mwinyo. Bhando bhajhakujhomboka kujhenda pahina na muche gwa ku Yeliko. 17 Kipinde Akaichilahele pibhajhombwika, akapiya matambiko bhibhagheghita Lichanduko lya Lilaghano bhajhakujhema mulukemba chehemo nyomo ade pibhajhomolila kujhomboka bhando bhoha palukemba lwono.