1 Kipinde chene, Yoshuwa akibha aghogholwike hake, Bhambo Chapanga ngannobholila, "Mwe ngohe ng'ogholwike hake, ihighilike ilambo ikolongwa yangatolwa kwa makakala. 2 Ilambo yene ndi henge, kilambo choha cha Akafiliste na Akageshuri, 3 yane chehemo jhoha jhibhatamita Akakaanane, kutumbuli ku kulukemba lwa Shihole ade ku Michile upande ghulihumii lyobha, na chehemo jhoha jha muche gwa ku Ekilone jhoha jhibhii upande gwa kuchine. Chehemo jhoha jhibhatamita akanahota nhwano bha Akafiliste ndi ku Gacha na ku Ashidode na ku Ashikelone na ku Gate na ku Ekilone pamonga na kilambo cha ku Ave. 4 Akakaanane bhange bhakibha bhamela bhitama upande gwa kachikachine kutumbuli ku Ala jha ku Akasidone ade ku Afeka ku mpaka gwa Akaamole, 5 helehela kilambo cha Gebale, na ku Lebanone kwa upande kulihumii lyobha mwa ku Bale Gade pahe jha kitombe cha ku Elimone ade ku Lebo Hamate, 6 hele kilambo cha ku itombe chikibhii pakate jha ku Lebanone na ku Mishilefote maimo, kubhitama ku Akasidone. Ne namwete nanabhenga bhando bheniya palonge jha Akaichilahele bhoha. Mwe mipalwa kwabhaghuli Akaichilahele ilambo yene ibhehe yabhe, ngita chininnaghalikiye. 7 Ngohe mmaghana chehemo jhene kwa makabila ticha, na nucho jha likabila lya Manache kubhe chehemo jhabhe."

8 Bhando bha likabila lya Leubene na likabila lya Gade na nucho jha likabila lya Manache, bhakapatite kilambo chikikibha upande ghulihumii lyobha mwa lukemba lwa Yoludane kubhe kilambo chabhe ngita Bhambo Chapanga channaghalikiya Mucha, ntumiche gwake. 9 Chehemo jhabhe kutumbulii Aloele muupele jha lulambo lwa kipela pamonga na lulambo lwoha panakate jha Medeba ade Dibone, 10 pamonga na kilambo cha munahota Sihone jwa Akaamole, jwalongwicha kola ku Heshibone ade kumpaka gwa bhando bha Akaamole. 11 Pamonga na kilambo cha ku Gileade, Akageshule na Wamaakati, ku kitombe cha Helimone na ku Bashane jhoha ade ku Saleka, 12 na unahota gwoha gwa Ogu jwa Akalefae bhubhahighilike, jwene jwalongwicha ku Ashitalote na ku Edilei na ku Bashane. Mucha ngabhahotwila bheniya bhoha na kwabhengee kutale na kutola kilambo chabhe. 13 Nambo Akaichilahele bhabhengitejhe bhando bhu ku Geshule na bhando bha ku Maaka, yene bhijhendelela kutama pamonga na Akaichilahele ade deleno.

14 Mucha akabhapii jhe kilambo bhando bha likabila lya Akalawe kubhehe chabhe. Nambo bhene bhakampikii Bhambo Chapanga litambiko lya kukomelekeya Bhambo Chapanga, Chapanga jwa Akaichilahele, gweno ndi chehemo jhabhe, ngita Bhambo Chapanga channaghalikiya Mucha.

15 Chehemo jha kilambo chabhapila Mucha likabila lya Leubene tela na ngolo yabhe, 16 kilambo chabhe kikatumbulii ku Aloele muupele jha ling'engo lya kipela na muche ghubhii muupele pamonga na kilambo choha cha pandika jha ku Medeba. 17 Ikibha hele pamonga na ku Heshibone na miche jhake jhoha jhikibha pandika. Yane ku Dibone na ku Bamote Baale na ku Beti Baale meone, 18 na miche jha ku Yahasa na ku Kedemote na ku Mefaate, 19 miche jha ku Kiliataimo na ku Sibuma na ku Selete Shahale kwenio ku kitombe chikibhi ku lulambo, 20 muche gwa ku Bete Peole na mihelelo jha itombe jha Pisiga na ku Bete Yeshimote. 21 Na miche jhoha jha pandika, kilambo choha cha munahota Sihone jwa Akaamole, jweno ngalongwicha kwenio ku Heshibone. Mucha nganhotwila munahota Sihone pamonga na ilongoche bha ku Midiane, yane Evi na Lekemo na Sule na Hule na Leba, ilongoche bhamba bhalongwicha kopete kwa munahota nkolongwa Sihone. 22 Balaamo mwana jwa Beole nnondole, ndi jhumo panakate jha bhando bhibhakomitwe. 23 Mpaka gwa kilambo cha likabila lya Leubene kwa upandi gwa kulitipikii lyobha ukibha Yoludane. Miche jhenio jhilongilwe pamba ndi chehemo pulubhii lungolo lwa likabila lya Leubene.

24 Henge ndi ilambo Mucha yabhapila bhando bha likabila lya Gade tela na ngolo yabhe, 25 ikibha ku Yazele pamonga na chenda jhake yuku Gileade na nucho jha kilambo cha Akaamole mumpaka gwa ku Aloele kwa upande gulihumii lyobha mwa Laba, 26 helahela kutumbulii ku Heshibone ade ku Lamate Misipe na ku Betonime, kabhele kuhumii Mahanaimo ade mupaka gwaku Lode Bale. 27 Kabhele ilambo jhiikibha mu lulambo lwa lukemba Yoludane ndi ku Beti halamo na ku Betinimula na ku Sukote na ku Zafone na kilambo chikihighilike cha munahota nkolongwa Sihone jwa ku Heshibone. Kwa upande kulihumi lyobha mulukemba lwa Yoludane, na kujhendelela upande gwaku kachekachine mwa kumbwane jha Kinelete. 28 Ilambo yene na chenda yake ndi ngabhapilwa bhando bha likabila lya Gade tela na ngolo yabhe.

29 Mucha ngabhapila chehemo jhenje nucho jha likabila lya Manache kilambo kubhehe chabhe tela na ngolo yabhe. 30 Kilambo chabhe kitumbuli ku Mahanaimo ade kujhakanikii kukilambo choha chikibha chu munahota nkolongwa Ogu, jwaku Bashane pamonga na ilambo makome chita yuku Yaile, 31 nucho jha ku Gileade, na ku Ashitalote na ku Edilei na ilambo ikibha ya munahota nkolongwa Ogu ku Bashane. Yenio ikibha kwa nhwalo jha ibheluko ya Makile mwana jwa Manache, na kwa nhwalo jha nucho jha yana ya Makile, tela na ngolo yabhe.

32 Mucha ngabhaghabhila chehemo jhene makabila gheniya gha Akaichilahele kilambo chene upande ghulihumii lyobha Yeliko na Yoludane, kipinde pakibha pandika jhaku Moabo. 33 Nambo likabila lya Akalawe, Mucha akalipii jhe kilambo chabhe, chehemo jhabhe ndi kumpiikiya Bhambo Chapanga litambiko lya kukomelekeya Bhambo Chapanga, Chapanga jwa Akaichilahele.