1 Milyango jha kujhingilila ku muche gwa ku Yeliko ngaidinditwa nganganga na kulondwa kupala kuhibhikiliya Akaichilahele bhakoto kujhingila mweno. Akibha jhe mundo jhojhoha jwajhingila hilu kupita. 2 Bhambo Chapanga ngannobholila Yoshuwa, "Ngohe muche gwa ku Yeliko pamonga na munahota nkolongwa gwake na akakomana ngondo bhoha nabhabha mulongoche gwino. 3 Mwenga na bhando bhala bhubhabhii na chilaha, namuuntindila muche gwenio mala jhimo kila lichiko kwa machiko chita. 4 Na akapiya matambiko chaba kongo bhabhii na mapenenga ghabhe gha manyelo gha limbelele lyankambako, nabhalongolela palonge jha Lichanduko lya Lilaghano. Mu lichiko lya chaba namtindila muche gwenio mala chaba na akapiya matambiko bhapeta kujhemba mapenenga. 5 Pibhapa kujhemba mapenenga gheniya kanonowa na papa pumpakujhoha lilobhe lyenio, bhando bhoha nabhachobhela kanonowa na mapamanda gha muche gwenio naghatilukila pahe. Peniya kila mundo nabhaujhingilila muche gwenio kubhoka kila chehemo pabhile."

6 Yene Yoshuwa mwana jwa Nune, ngabhakema akapiya matambiko na kwalobholela, "Ntolangane Lichanduko lya Lilaghano na akapiya matambiko chaba bhatole mapenenga gha manyelo gha lipongo lya limbelele, bhalongolele palonge jha Lichanduko lyenio." 7 Yoshuwa ngabhalobholila bhando, "Nnyendengane nnonge, mutindila muche, na akakomana ngondo bhandina bhina chilaha bhajhenda nnongi jha Lichanduko lya Lilaghano lya Bhambo Chapanga."

8 Na Yoshuwa pajhomolila kulonge na bhando, akapiya matambiko bhala bhibhabhii na mapenenga chaba palonge jha Bhambo Chapanga, ngabhalongolila palonge, kongo bhakijhemba mapenenga ghabhe na Lichanduko lya Lilaghano lya Bhambo Chapanga lyakengima. 9 Bhando bhala bhubhabhii na chilaha ngabhalongolila nnonge jha akapiya matambiko bhibhajhembita na akalonda bhange bhakengima unyuma jha Lichanduko lyenio, na mapenenga ngaghakolimbina hake. 10 Nambo Yoshuwa ngabhalaghalikiya bhando, "Nkoto kukema mlete gwa ngondo amu kulonge chochoha ade lichiko limbakunnobholela nchobhela, peniya nachobhela." 11 Yene Yoshuwa ngabhateila bhando bhala bhautindila mala jhimo muche gweno kongo bhajheghite Lichanduko lya Lilaghano lya Bhambo Chapanga na kubhujha kukighono kugholoka kilo.

12 Putepute lukela Yoshuwa ngajhimwika na akapiya matambiko ngabhaligheghita Lichanduko lya Lilaghano lya Bhambo Chapanga. 13 Akapiya matambiko chaba ngabhatoila mapenenga chaba ngabhalongolila palonge jha Lichanduko lya Lilaghano lya Bhambo Chapanga kongo bhikijhemba mapenenga. Bhando bhubhabhi na chilaha ngabhalongolila palonge yabhe na akalonda unyuma bhalikengima Lichanduko lya Lilaghano lya Bhambo Chapanga kongo akapiya matambiko ngabhajhendelila kukolimbana kujhemba mapenenga. 14 Lichiko lilikengima ngabhautindila kabhele mala jhimo na kubhujha kukighono chabhe. Ngabhateila yene kwa machiko chita.

15 Lichiko lya chaba, ngabhajhimwika putepute na ngabhautindila muche gwenio ngita chibhatindila machiko chita. Nambo mulichiko lya chaba ngabhatindila muche gweno mala chaba. 16 Pibhatindila mala jha chaba, akapiya matambiko pibhajhembita mapenenga kwa lilobhe likolongwa, Yoshuwa ngabhalobhalila bhando kubhehe, "Nchobhelele, nhwalo Bhambo Chapanga ampekiye muche ghongo! 17 Muche ghongo pamonga na ilebhe yoha ibhii mwenio naikomelekelwa njwe kubhehe litambiko kwa Bhambo Chapanga. Nambo Laabo tugha, nngongola jhola ndi nalekwa pamonga na bhando bha pakajhake, nhwalo akabhahihite bhando bhito bhibhatumita akalingukiya. 18 Nambo mangatola jhe kilebhe chochoha chikipalwa kukomelekelwa kwa Bhambo Chapanga. Anda ntoi kilebhe chikipiitwe litambiko kwa Bhambo Chapanga, namukitenda kighono cha Akaichilahele kukomelekelwa na yene nannyambulila mang'ahe. 19 Madine ghoha gha feza na chaabo na yombo jha shaba na choma ndi ibhekitwe pakanjika kwa Bhambo Chapanga, ipalwa iletwa mukihukilo cha Bhambo Chapanga."

20 Yene akapiya matambiko bhakahona mapenenga. Bhando pibhajhohina lilobhe likolongwa lya mapenenga ngabhachobhila kanonowa na mapamanda gha muche ngaghatilukina. Papa bhando ngabhaujhingilila muche gweno kila jhumo kwahumile ngaupukila. 21 Peniya ngabhakomilikiya kila kilebhe chikibhii mwenio kwa upanga, akanalome kwa akakeghe na yana na ihokolo pamonga na ng'ombi na mambelele na maponda.

22 Yoshuwa ngabhalobholila bhala akalingukiya bhabhele kubhehe, "Nnyende munnete mwikeghe nngongola jhola na akalongo mundo bhoha ngita chimunapila." 23 Ngabhajhenda na kunneta Laabo na tate gwake na majhe gwake na akahacha mundo na akalongo mundo na bhando bhoha bhubhakibhe pakajhake, ngabhabhekitwa pahina nakighono cha Akaichilahele. 24 Peniya ngabhautiniya mwotu muche gwa ku Yeliko na kila kilebhe chikibhii mweno, nambo madine gha feza na chaabo na yombo ya shaba na ya choma, yene ikabhekwitwe mu kichukilo mu nyumba jha Bhambo Chapanga. 25 Nambo Laabo nngongola jhola pamonga na bhando bhoha bha nyumba jha tate gwake, Yoshuwa akaghombwi ughome gwabhe. Laabo itama panakate jha Akaichilahele ade ngohe, nhwalo akabhahihite bhala akalingukiya bhibhakatumitwe na Yoshuwa ku muche gwa ku Yeliko.

26 Kipinde chene Yoshuwa ngabhalaghila bhando, alongila, "Jwapala kuchenga ku Yeliko kabhele abhaha na likoto lya Bhambo Chapanga.

Mundo jhojhoha jwapala kuchenga nchinge gwa muche gweno, mwana jwa litibho nahwa.

Jhojhoha jwapala kuchenga litangala lya kujhingilila lya muche gweno, nakomwa mwana mundo jwa kujhomolela."

27 Yene Bhambo Chapanga akibha pamonga na Yoshuwa, na malobhe ghake ngaijhenila mu kilambo choha.