1 Pajhomwika Yochuwa, Akaichilahele ngabhankonyita Bhambo Chapanga kubhehe, "Ngohe likabila ghane lilipakutumbula kujhenda kwajhingilila Akakanaane?"

2 Bhambo Chapanga ngajhangwila, "Likabila lya Yuda ndi nalitumbula, nhwalo kilambo chenio kibhii mu kindendeke gwabhe."

3 Bhando bha likabila lya Yuda ndi ngabhalobholila bhando bha likabila lya Chimeoene, "Tutangatane na twenga kukijhingilila kilambo chatupekii Chapanga mu kilambo cha Akakanaane. Na twe hele natuntangatila mangota." 4 Bhahe, bhando bha likabila lya Yuda na Chimeone ngabhakijhingilila, na Bhambo Chapanga jwenio ngabhatangatila kwahotola Akakanaane na Akapeliche. Ngabhakomita bhando elufo kome kwenio ku Bezeke. 5 Ku muche gwenio ngabhankolila munahota nkolongwa Adone Bezeke, ngabhakomina nako na kwahotola Akakanaane na Akapeliche. 6 Munahota nkolongwa Adone Bezeke ngatilita, nambo Akaichilahele ngabhankengimila nu kukamula. Ngabhanhekita maghumba gha mulubhoko nu mulugholo. 7 Adone Bezeke palongila, "Chapanga anjwapwilwe kunhwalo, makacho nakakamwii akanahota akakolongwa chabine na kwaheketa maghumba gha mumabho na mumagholo nu kwachokolekeya bhalye imbolopolo ya pahe jha mecha jhango." Yene ngabhampelika ku Yeluchalemo, ngawelila koko kwenio.

8 Peniya, bhando bha likabila lya Yuda ngabhaijhingilila Yeluchalamo nu kuipukila. Ngabhakomita bhando nu kuujhocha mwotu muche gwenio. 9 Pughajhomwikila gheniya, bhando bha likabila lya Yuda, ngabhajhenda kukomana na Akakaanane bhibhatamita mu ilambo ya itombe na mu ilambo yumu njenga ya kuchine na kilambo chandika upandi gwa kulitipikii lyobha. 10 Peniya, bhando bhuku Yuda ngabhajhenda kwajhingilila Akakaanane bhibhatamita ku muche gwaku Hebulone, kwa liina lenge ukemitwa Kilihate Aluba, kwenio ngabhaihotwila bhando bha ngolo ya Sheshai na Ahimane na Talumai.

11 Bhahe, bhando bha likabila lya Yuda, ngabhajhenda kuujhingilila muche gwa Debele, makacho umanyikina Kilihate Sefele. 12 Peniya Kalebo palongila, "Jhojhoha jwapakujhingilila nu kuhotola muche gwaku Kilihate Sefele, nantolela nchikana gwango jwakemwa Akicha." 13 Bhahe, Otiniele, mwana gwa Kenache unnung'una mundo Kalebo, ngabhaupukila muche gwenio, yene Kalebo ngantolikicha nchikana gwake Akicha. 14 Puupetita unyagho gwabhe gwa ndowa, Akicha ngannobholila Otiniele, annyope nkohano mundo Kalebo nng'onda. Akicha pahulwika tu muliponda, tate mundo ngankonyita, "Bho, nimpeke kilebhe ghane?" 15 Akicha ngannyangwila, "Mbala umbele hupo jhenge, umbekii njwe chehemo jhomo upande gwa kuchine." Ngohe umbeke chehemo jhina ipela. Yene Kalebo ngampila chehemo jha ipela yuku ndumba na chehemo jha ipela ya pahe.

16 Bhakenane, ndi bhibhakibha ibheluko ya nkohano mundo Mucha, ngabhalongihina na bhando bha likabila lya Yuda bhibhahumila ku muche gwa Mitende, kwa liina lenge ukemwa Yeliko, ngabhajhenda kutama pakate jha njenga jha Yuda upandi gwa kuchine, pahina na muche gwa Alade. 17 Peniya bhando bha likabila lya Yuda na Chimeone ngabhajhingilila Akakanaane bhibhatamita ku Zefati ngabhahotwila. Ngabhaukomilikiya njwe muche gwenio na kughalambula liina nu kubhehe Holima. 18 Helahela likabila lya Yuda ngabhaupukila muche gwa Gaza na chenda yake na Ashikelone na chenda yake na Ekilone na chenda yake. 19 Bhambo Chapanga ngabhatangatila bhando bha likabila lya Yuda, ngabhakipukila kilambo cha itombe. Nambo bhakahotwii jhe kwabhenga akolo kilambo bha pandika nhwalo bhakibha na chilaa yambone na mutuka yabhe ya ngondo iihutitwa na falache ikibha ya choma. 20 Muche gwa ku Hebulone ngabhampila Kalebo ngita chalaghila Mucha. Kalebo ndi jwabhengita ngolo itato ya Anake kwenio. 21 Nambo likabila lya Benjamine bhakabhengitii jhe Akayebuche bhibhatamita ku Yeluchalemo, ndi nhwalo Akayebuche bhitama pamonga na bhando bha likabila lya Benjamine ku Yeluchalemo ade ngohe.

22 Bhahe, bhando bha likabila lya Efulaimo na Manache ngabhajhingilila bhando bha muche gwa ku Betele, na Bhambo Chapanga ngabhatangatila. 23 Pibhatumita akalingukiya ku Betele, makacho umanyikina Luzu. 24 Akalingukiya bheniya, pibhalingukiya muche gwenio, ngapitila mundo na bhene ngabhannobholila, "Mutulangiye ndela jhakujhingila nkate jha muche na twenga natunkomajhe." 25 Mundo jhola ngabhalangiya ndela jhakujhingilila na bhene ngabhakomita kila mundo umuche gwenio, nambo ngabhannekita ghome mundo jhola na akalongo mundo. 26 Mundo jhola ngatilila kukilambo cha Akahite, ngachenga muche gwake na ngaupila liina lya Luzu, ndi liina lyake ade ngohe.

27 Nambo likabila lya Manache bhakabhengite jhe akolo muche bhuku Bete Shane na chenda yake na Tanake na chenda yake na Dole na chenda yake na Ibuleamo na chenda yake na Megido na chenda yake. Akakaanane ngabhajhendilila kutama kwenio. 28 Akaichilahele pibhajhonjekika nukubhehe na makakala, bhakabhengite jhe Akakaanane nambo ngabhachokolikiya kuhenga mahengo ngita akabhanda.

29 Helahela Akaefulaimo bhakabhengite jhe Akakaanane bhibhatamita ku Gezele ngabhajhendilila kutama pakate jhabhe.

30 Ata likabila lya Chabulone lyakabhengite jhe Akakaanane bhibhatamita ku Kitulone hilu bhibhatamita ku Nahalole, bhakajhendilii kutama pakate jhabhe nambo ngabhachokolikiya kuhenga mahengo ngita akabhanda.

31 Hilu likabila lya Ashele lyakabhengite jhe Akakaanane bhibhatamita ku Aka na ku Chidone na ku Alabo na bhuku Akichibo na bhuku Heluba na bhaku Afeka na bhu ku Lehobu. 32 Bhando bha likabila lya Ashele ngabhatamita pakate jha Akakaanane, nhwalo bhakabhengite jhe akolo kilambo chenio.

33 Helahela likabila lya Nafutale lyakabhengitii jhe akolo muche bha ku Bete Shemeshi hilu bhala Bete Anati, nambo Nafutale bhatamita panakate jhabhe. Akolo muche bheniya, ngabhachokolikilwa kwahenge mahengo Akaichilahele ngita akabhanda.

34 Akaamole ngabhabhengila bhando bha likabila lya Dane kwiitombe. Bhakalekitii jhe bhahelele mundika bhatame. 35 Akaamole ngabhajhendilila kutama mwiitombe ya Helesi na Aiyalone na Shalubimo, nambo bhando bha likabila lya Manache na Efulaimo pibhajhonjikika makakala nukubhehe twe ngabhahotwila na kwatenda Akaamole kuhenga mahengo ngita akabhanda.

36 Yene, mpaka gwa kilambo cha Akaamole kikibha upandi gwa kachikachine mwa Seile, chehemo jhukujhomboke pipakemwa kipyelele.