1 Abimeleke mwana jwa Gideone, ngabhajhende akalongo bha majhemundo kubomane kwenio ku Chekemo kwalobholela, 2 "Unnobholele pambano pano palonge jha akakolo kilambo chiku Chekemo, ‘Cho chambone kwino, kubhehe yana inalome yoha chabine ya Gideone innongocha amu mwana jhumo? Nkomboka kubhehemangota na nenga ndi myahi jhino.’ " 3 Akalongo bha majhemundo ngabhatangicha malobhe gheniya ku Chekemo jhoha kwa nhwalo jha jwenio, na bhando bhoha bhuku Chekemo ngabhankengama Abimeleke nhwalo akibha nnongo gwabhe. 4 Ngabhampila ipande chabine ya madine gha feza yenio yatoila munyumba jha kichapanga gwabhe, jwakemitwa Baale Belite, Abimeleke yenio atumila kwalepe bhando bhina milomo na mambyeta bhankengame jwenio. 5 Abimeleke na bhando bhake ngabhajhenda kukilambo chuku Ofula kwa tatemundo, kwenio ngabhakoma akakolomundo chabine yana inalome ya Gideone palighanga limo. Nambo ngaighalika Yotamo mwana nchokombe jwa Gideone akomitwe jhe, nhwalo akatei kujhobha. 6 Peniya akakolo kilambo bhoha bhuku Chekemo pamonga na bhuku Bete Milo ngabhakongana pamonga pahe jha nkongo nkolongwa gwa mwalone ku Chekemo, peniya ngabhanhagwila Abimeleke kubhehe munahota nkolongwa gwabhe.

7 Yotamo pajhoina gheniya, ngajhenda kujhema panane jhikitombe cha Gelizimo, na kulonge kulilobhe likolongwa, "Unyokanikiye mangota bhando bhuku Chekemo anda mipala Chapanga annyokanikiye. 8 Lichiko limo, mikongo ngikongina kukipalakiya munahota nkolongwa. Bhahe, nginnobholila nkongo ncheitune, ‘Mme makilongoche bhito!’ 9 Nambo nkongo gwa ncheitune ngaujhangwaila, ‘Mihambuka nihoto kulileka lihengo lyango likujhenga mahuta, ghighapalwa hake na ichapanga na bhando, peniya nyende kukichumbuya kwilongocha mikongo?’ 10 Peniya mikongo ngijhenda kulongele nkongo nkojho, ‘Nhwike mme makilongoche bhito.’ 11 Nambo nkojho ngaujhangwila, ‘Bho, mihambuka ne nihoto kulileka lihengo lyango lyukupambika uhohe gwambone nu kunogha, nikichumbuya kwilongocha mikongo?’ 12 Peniya mikongo jhenio ngaghulobholila nchabibo, ‘Nhwike kongo mme makilongoche bhito.’ 13 Nambo nchabibo gwenio ngaujhangwila, ‘Mihambuka ne nihoto kulileka lihengo lyango likuminya divaye jhihanganicha miojho ichapanga na bhando, nyende kukichumbuya kwilongocha mikongo?’ 14 Kujhomolela mikongo jhoha ngiijhenda kunkongo gwa mibha nukulonge, ‘Mwe nhwike mutulongoche twenga.’ 15 Nkongo gwa mibha gwenio ngaujhangwila, ‘Anda chakaka umbakumbe unahota nkolongwa, nhwikengane ntame pahe jha nhwile gwango. Nambo anda mikana kutenda yene, bhahe, mwotu ubhokela umibha jhango kwiikomelekeya mieleze jhiku kwenio ku Lebanone.’ "

16 Peniya Yotamo ngajhendele kulonge, "Bho, mihambuka mtei Abimeleke kubhehe munahota nkolongwa kwa mwojho gwambone nu kukuhobholeka? Na mihambuka ntei ghambone kwa Gideone na akalongomundo chiipalwa, tela na itendwa yabhe? 17 Mikomboka kubhehe tategwango akakomanila na kunkombola kubhoke ku Midiane changajhoghopa kukomwa! 18 Nambo deleno majhingilii akalongo bha tate gwango na kwakoma yana inalome chabine pilighanga limo, peniya ngammeka Abimeleke kubhehe munahota nkolongwa mwana jwa mmanda mwikeghe jwa tategwango, abhe munahota nkolongwa jwa akakolo kilambo bhiku Chekemo nhwalo tu jhulungolo lwino. 19 Ngohe bhahe, anda ntei yene kwa mwojho gwambone nuichima Gideone pamonga ichapanga yake, bhahe, nhwanganila pamonga na Abimeleke, na jwenio Abimeleke ahangana pamonga na mangota. 20 Anda ibhii yene, bhahe mwotu upita kubhoka kwa Abimeleke gwakakomelekeya bhando bhuku Chekemo na Bete Milo, peniya mwotu ubhoke kubhando bheniya bhuku Chekemo, na bhando bhuku Beti Milo gwakomelekeya Abimeleke." 21 Peniya Yotamo nganyogholwika nu kutila ngajhenda ku muche ghuku ku Beele, ngatama kwenio kukunnyoghopa Abimeleke. nnongomundo.

22 Abimeleke ngalongwicha kilambo chuku Ichilahele kwa kipinde cha yaka itato. 23 Peniya Bhambo Chapanga ngabhakomanicha pakate jha Abimeleke na bhando bhuku Chekemo, na bheniya ngabhang'alambwika Abimeleke. 24 Chapanga ngabhakomita bhando bhuku Shekemo, pamonga na akalongo bhake Abimeleke, kubhokana na uhakao bhibhakatei yana chabine bha Gideone. Luhadabulo lwenio ngabhapatite kunhwalo gwa Abimeleke ngabhakomita akalongo bhake kukutangatilwa bhando. 25 Bhando bhuku Chekemo ngabhabheka bhando kuilegheleghe itombe bhajhobhele bhando bhibhapeta mwenio na kwapoka ilebhe yabhe. Gheniya ghoha ngabhannobholila Abimeleke.

26 Lichiko limo Gaale mwana jwa Ebede, pamonga na akalongo bhake ngabhajhenda kutama ku Chekemo, na bhando bha kwenio ngabhanhobholila Gaale. 27 Ngabhajhenda mumighonda jhabhe nu kuhuna chabibo, ngabhaminya divaye nukubheka unyagho. Ngabhajhingila munyumba jhi ichapanga jhabhe. Kipinde chibhalila nu kunywe ngabhannigha Abimeleke. 28 Gaale mwana jwa Ebede ngalonge, "Abimeleke ndi meneke? Twenga pano Chekemo ndi bhando bha namuna ghane ade tuntumikila Abimeleke? Gideone na ntangatila Zebuli ngabhatumikila bhando bha Amole tatemundo Chekemo, kilebhe ghane twe tuntumikila Abimeleke? 29 Kabhele bhando bheniya nalongwicha nenga, kabhele nimoite Abimeleke, ninnobholii Abimeleke, ‘Nnyonjekeye akakomana ngondo bhino, nhwike tubulane palonge jha bhando naninhotola.’ "

30 Zebule, kilongoche jwa muche, pajhoina gheniya gha Gaale mwana jwa Ebede, ngachimwa hake. 31 Bhahe, Zebule ngantumila lilobhe Abimeleke kwenio ku Tolima kulonge, "Gaale, mwana jwa Ebede, pamonga na akalongomundo bhabhii pamba ku Chekemo na bhakwelekeya bhando bhang'alambuke mwenga na bhando bhino ku Chekemo. 32 Deleno mmujhe mwenga pamonga na bhando bhino kilo majhobhela mu yeghejha pahina na muche ghuku Chekemo na kwajhobhela. 33 Kilabho lukela lyobha pilipakupita majhingilila. Gaale papakuika na bhando bhake kubulana na mwenga, namwe mabula chimihotola."

34 Abimeleke ngabhoka pamonga na bhando bhake bhakibha nabho, ngaika ku Chekemo kilo. Ngabhaghina bhando bhake ibhogha ncheche na ngabhajhobha kwenio pahina na pa muche. 35 Bhahe, Gaale mwana jwa Ebede ngapita panja nu kutama pannyango gwa kilambo, kipinde chenio Abimeleke na bhando bhake bhakibha bhapitila chehemo pakibha bhajhobhila. 36 Gaale pabhabhona bhando bheniya ngannobholila Zebule, "Dolokeya, bhando bhihuluka kunane kukitombe."

Zebule ngalonge, "Mwe mibhona iyeka iitombe ngita bhando bhibhatyanga."

37 Gaale ngalonge kabhele, "Dolekeya, bhando bhitenda kuika mu kilambo na kibhogha chenge kibhoke upande gwa nkongo nkolongwa gwa Mwalone gwa nnondola."

38 Peniya, Zebule ngalonge kabhele, "Kulokaloka kwino kubhii kojhe ngohe? Chi mwe jhe nnongila kubhehe Abimeleke ndi meneke? Nhwalo gwa nike tuntumikile? Bheniya ndi bhando bhimapuchita, nnyende bhakabulane nabho." 39 Gaale ngabhoka na kwalongoya bhando bhuku Chekemo kubulana na Abimeleke. 40 Gaale ngalepilila nu kutila kongo akengimilwa na Abimeleke. Bhando twe ngabhakomilwa undela ade pannyango nkolongwa ghukujhingilii pa muche. 41 Peniya, Abimeleke ngajhenda kutama ku Aluma na Zebule ngammenga Gaale pamonga na akalongomundo bhabhoke pa muche ghuku Chekemo.

42 Lichiko lilikengima, Abimeleke ngajhoha kubhehe bhando bhuku Chekemo bhajhawile kumighonda. 43 Abimeleke ngabhabhaghina akakomana ngondo bhake ikunde ncheche, nu kujhenda kwajhobhela kwenio kumighonda. Pibhabhona bhakabhoka pa muche, ngabhoka pibhajhobhite na kwakoma. 44 Abimeleke pamonga na kikunde chake ngabhajhenda kajhombe kuhibhilila pannyango nkolongwa gwa pa muche gwenio kupala akoto kujhingii mundo nkate. Ikunde henge ibhele ngabhajhingilila bhando bhibhakibha kumighonda na kwakoma. 45 Abimeleke ngabulina na bhando bhikilambo chenio lyobha tipi. Ngabhakoma bhando bhoha ngatola muche gwenio kwa makakala na ngamichita mwinyo pa muche gwenio.

46 Bhando bhoha bhibhatamita pa nnala ghuku Chekemo pibhajhoa malobhe gheniya, ngabhatilila kuliboma lya nyumba jha ichapanga jwakemitwa Eli Belite. 47 Abimeleke pajhoha kubhehe bhando bhoha bhibhakibha pannala ghuku Chekemo bhakonganike pamonga. 48 Abimeleke na bhando bhake ngabhajhenda kukitombe chikikemwa Salimone, ngatola libhagho nukupengu lindabhe lya nkongo ngalighenga pilibhegha lyake. Peniya ngabhepeleke bhando bhakibha nabho, ntenda kajhombe ngita chindei nenga. 49 Kila mundo ngapengu lindabhe ngita Abimeleke. Ngabhatola mandabhe ghabhe nukujhegheka mulipamanda lya liboma, ngabhajhocha mwotu nu kutiniya liboma lyenio, bhando bhoha akanalome na akakeghe ngita elufo jhimo bhibhakibha mwenio, ngabhawila.

50 Peniya Abimeleke na akakomana ngondo bhake ngabhajhenda ku muche gwaku Telesi, ngabhautindila nukupukila kwa makakala muche gwenio. 51 Nambo nkate jha muche gwenio, kukibha na nnala nganganga hake pakate jha muche. Peniya bhando bhoha akanalome na akakeghe na ilongoche yabhe ngabhatilila mwenio nu kukidindila nkate. Ngabhakwelita kunane jha nnala gwenio. 52 Abimeleke ngaika kupala kubula nnala ngajhenda pannyango gwa nnala nambo paheghelila kupala ajhoche mwotu, 53 mwikeghe jhumo ngatagha lwalwa kubhoke kunane ngilimpwechwila Abimeleke umuto gwake menyemenye. 54 Peniya Abimeleke ngankema kajhombe kangombo jwake jwakibha agheghita chilaa jhake, "Ntole upanga gwino ungome, bhando bhangaika jhe kulonge kubhehe ngomitwe na mwikeghe." Kangombo jwenio ngatola upanga gwake ngankoma Abimeleke. 55 Akaichilahele pibhammona Abimeleke ajhomwike, ngabhabhujha kila mundo kajhake.

56 Yene Chapanga ndi channepita Abimeleke nhwalo ghu lilemwa lyabhalimwile akatate mundo kwa kwakoma akalongo mundo chabine. 57 Helahela Chapanga ngabhalekikiya bhando bhuku Chekemo bhachwapulwe kwa ubhoho ghubhateila. Yene likoto lya Yotamo mwana jwa Yelu Baale ndi ngalyapatita.