1 Lichiko limo Samusone ngajhenda ku muche ghu ku Gacha, ngakongina na nngongola jhumo, ngagholwika nako kelu ndaa. 2 Bhando bhu ku Gacha pibhajhoa kubhehe Samusone abhii kwenio, ngabhantindikiya chehemo jhenio nu kunyobhela pannyango nkolongwa gwa kilambo keluu ndaa. Ngibhannyobhila pannyango gwenio kilo jhoha bhahambwika yene, ngabhatama peniya ade pukuchila kupala bhankome. 3 Nambo Samusone ngajhendelele kugholoka ade nhwiko. Puhwiko ngajhimuka ngakamwila lifelemo lyoha lya nnyango ghu kilambo, ngajhikwila pamonga na makomeo ghake, ngabhokita nu kujhenda nako ade pa kitombe pahina nu ku Ebulone.

4 Pughapetita gheniya, Samusone ngang'anita mwikeghe jhumo liina lyake Delila, jwatamita muling'engo lyaku Soleki. 5 Akanahota akakolongwa nhwano bha Akafilichite ngabhanyendilila Delila nu kunnobholela, "Mpembelekeye Samusone ade mmanye chile jha makakala ghake twe, kupala tumpukile nukuntabha. Anda ntei yenie, kila mundo pakate jhito nampela ipande elufo jhimo na miya jhimo ya madine gha feza."

6 Delila ngannobholila Samusone, "Chonde, unnobholele chile jha makakala ghino, na mundo ipalwa atenda bhole, ade kunhotola nuku ntabha pyee?"

7 Samusone ngannyangwila, "Anda bhandabhite kwa ngojhe chaba mbehe yupende, mbakubhe naleghalabho ngita bhange bhando."

8 Ilongoche ya Akafilichite ngabhannetila Delila ngojhe yenie chaba mbehe yu pende na Delila ngantabha ngojhe yenio Samusone pyee. 9 Delila akibha bhabhekite bhando bhannyobhele Samusone kuchumbe chenge. Peniya ngankema Samusone kanonoya, "Samusone! Akafilichite bhitenda kuika!" Samuone ngatopwila ngojhe yene ngita luche ya litonje pulunywimwu mwotu. Akibha jhe mundo jwahotwii kumanya chile jha makakala ghake.

10 Delila ngannobholila Samusone, "Mwe undendii ubhiche, ntei kungolowa. Chonde unnobholele chikipalwa kuntabha nganganga mwenga."

11 Samusone ngajhanguu, "Anda bhandabhite kwa ngojhe nhyono yangatumbu kutumika mbakubhe naleghelebho ngita mundo jhojhoha."

12 Peniya, Delila ngatola ngojhe nhyono, ngantabha Samusone. Kubhoke peniya Delila ngankema kulilobhe likolongwa, "Samusone! Akafilichite bhitenda kuika kunyingilila!" Kipinde cheche bhando bhateila kunnyobhela kuchumbi chenge. Samusone ngatopwila ngojhe yenio ngita luche.

13 Delila ngannobholila Samusone, "Ade ngohe undende ubhiche, undenda kungolowa!"

Samusone ngannobholila, "Anda nchukite nyenja chaba ya majhunjo ghango mulutando lwa ngobho nukubhehe nganganga munng'omba gwapumbache ghukukobeke ngobho, mbakubhe naleghelabho ngita bhange bhando."

14 Samusone pakibha mulughono Delila ngaichuka pamonga nyenja ya majhunjo gha Samusone ngaitabha mulutando lwa ngobho nganganga mpumbache. Peniya ngannobholila Samusone, "Samusone! Akafilichite bhitenda kuika kunnyingilila." Samusone ngajhimuka mulughono ngajhikwila mpumbache gwenio nukujwepula lutando lwa ngobho yenio.

15 Delila ngannobholila Samusone, "Mwe mihoto bhole kulonge mimbala nakongo minongole jhe chile jhino? Undende ubhiche mala patato. Ade ngohe unongilii jhe chile jha makakala ghino." 16 Delila ngajhendilila kunghaghalila hake Samusone ku malobhe twe kila lichiko, ade ngatotokila umwojho papipi nu kuwe, 17 akahotwi jhe kuimbilila Samusone ngalonge hotuhotu chile jhake, "Majhunjo ghango ghinachekulilwa jhe. Nenga mbangitwe na Chapanga kubhoke mulutumbo lwa majhe gwango. Anda njekwii majhunjo ghango, makakala ghango naghabhoka namma ngita mundo jhojhoha."

18 Delila pamanya kubhehe Samusone alongii chile jhake jhoha, ngabhakengima ilongoche ya Akafilichite ngabhalobholila, "Nhwikengane kabhele mwanja ghongo nhwalo Samusone anongolile hotuhotu chile jhake ilongoche ya Akafilichite ngabhanyendila Delila kongo bhajheghite feza ibhannaghila." 19 Na Delila ngantenda Samusone aghoche lughono pamajhogha ghake, ngankema mundo anchekule nyenja chaba ya majhunjo ghake. Peniya Delila ngatumbu kunchumbua Samusone kupala ajhimuke nambo Samusone akibhajhe na makakala kabhena. 20 Delila ngannobholila Samusone, "Samusone! Akafilichite bhitenda kuika kunnyingilila!" Samusone ngajhimuka mulughono ahambwika kubhehe ngita makacho. Amanyii jhe kubhehe Bhambo Chapanga akibha annekite. 21 Akafilichite ngabhampukila, ngabhantochwila miho ghake, ngabhampelika ku Gacha, kwenio ngabhantabha pingo jha shaba, na kunchokolekeya kuhenga lihengo likuyagha ngano mukipungo. 22 Nambo majhunjo ghake ngaghatumbu kukola kabhele kubhoke pukuchekula.

23 Ilongoche ya Akafilichite ngabhakongana pamonga kupala kuina unyagho gwaku nnomba chapanga jwabhe jwakemitwa Daghone. Peniya ngabhajhemba, "Chapanga gwito atutehi tunhotole likoko gwito Samusone." 24 Bhando pibhammona Samusone ngabhannomba chapanga jwabhe Daghone kulonge, "Chapanga gwito atutehi tunhotole likoko gwito Samusone, jwakihangabhina kilambo chito na kwakoma bhando bhito ndi." 25 Pibhahanganila kumwojho hake, ngabhalonge, "Munnete Samusone atei tuhangane kumwojho." Peniya ngabhampiya Samusone mukipungo, ngabhanneta na jwenio ngakinita palonge jhabhe. Ngabhammeka panakate jha heke. 26 Samusone ngannobholila kangombo jwantandiya, "Uneke mbapaye heke ya nyumba jhenje kupala kujheghemela." 27 Peniya, nyumba jhenie ikibha ihindimine bhando akanalome na akakeghe. Na ilongoche bhoha ya Akafilichite bhakibha mwenio na padale pakibha na bhando elufo itato akanalome na akakeghe, bhannolokiya Samusone akaina.

28 Peniya Samusone ngannyopa Bhambo Chapanga, "Bhambo Chapanga ninnyopa ungomboke. Umbe makakala kipinde chenje tugha, chonde Bhambo, kupala nalepechele kwa Akafilichite bheniya bhaghatuchwii miho ghango." 29 Samusone ngaikamu heke yoha ibhele ya panakate ndi ikamulila nyumba jhenio. Ngabheka lubhoko lumo kongo na longe kongo. 30 Ngalonge, "Nhwe tugha pamonga na Akafilichite." Ngatenwila kwa makakala ghake ghoha. Lijhumba lyenie ngilyatenwikila ilongoche yoha ya Akafilichite bhibhakibha mulijhumba lyenie. Yene ngabhakoma bhando twe kipinde chenio kupeta pakoma kipinde cha ughome gwake.

31 Akahacha mundo pamonga na akalongo mundo ngabhaika kuntola, ngabhanchika panakate jhi kilambo chuku Sola na kilambo chuku Eshitaole umambe jha Manowa, tatemundo. Samusone akibha kilongoche jwaku Ichilahele kwa kipinde cha yaka makome mabhele.