1 Machiko gheniya pakibha jhe na munahota nkolongwa mu kilambo chuku Ichilahele. Yene bhando bha likabila lya Dane ngalipaliya chehemo jhake jhukutama mu kilambo chenio, nhwalo ade machiko gheniya, likabila lya Dane lipaliya chehemo jhabhe pakate jha makabila ghaku Ichilahele. 2 Yene bhando bha likabila lya Dane ngabhahagwila bhando panakate jhabhe bhangajhoghopa, ngabhatuma akakomana ngondo nhwano kubhoka kwenio ku Sola nu ku Eshitaole ngabhalaghila bhajhende bhakakiingukiye kilambo. Na bhando bheniya ngabhajhenda kuilambo ibhii na itombe yuku Efulaimo, kajhake Mika ngabhatama kwenio. 3 Pibhaika kajhake Mika, ngabhalimanya lilobhe lya kangombo Nnawe. Ngabhannyendilaa nukunkonya, "Gwe annetite ghane kongone? Mihenga lihengo ghane kongone?"

4 Jwenio ngabhajhangwila, "Mika alaghine kilebhe nanenga, ambekii mme nampiya litambiko jwake."

5 Na bhene ngabhalonge, "Chonde mutukonyekeye kwa Chapanga anda mwanja gwito ghone natupata chitupala."

6 Peniya mpiya litambiko jwenio ngabhalobholila, "Nnyende kwa uteeke. Bhambo Chapanga abhii kulolela kupata chimighana."

7 Bhando bheniya nhwano ngabhajhenda ku Laishi. Ngabhabhona bhando bhibhatama kwenio na pibhatama kwa uteeke ngita bhando bhuku Chidone. Bhakibha bhando bhanuu na bhangakiholo, kabhele chaobhita jhe kilebhe chochoha, ibhaipalita yoha ikibha mu kilambo chabhe. Kabhele bhakibha kutale na bhando bhuku Chidone na bhakibha jhe lihengo na bhange bhando. 8 Bhahe, akalingukii bheniya ngabhabhujha kakalongo bhabhe kukilambo chuku Sola nuku Eshitaole. Bheniya ngabhakonya, "Mukibhwene kilebhe ghane kwenio." 9 Bhene ngabhajhangwila, "Jhinuka tujhende tukabule bhando bhikilambo chenje, chakaka kilambo chenio kihalii hake kulema nu kukoleka. Bho, mitama pamba tu changahenga lihengo? Mangabhe jhe nikiyoto kujhenda kukitenda kilambo chenie kibhehe chito. 10 Pumpakuika kwenio namakolela bhando bhangakiholo chochoha. Kilambo chenio kikolongwa, kibhii jhe kilebhe chochoha chikipungokiwe na Chapanga antangatile kutola kilambo chenie."

11 Bhahe, bhando miya chita bha likabila lya Dane kongo bhabhii na chilaha yabhe ya ngondo, ngabhabhoka ku Sola nu ku Eshitaole kujhenda kukomana ngondo. 12 Ngabhajhenda kubheka kighono chabhe okwe Kiliate Yealimo mu kilambo chuku Yuda. Ndi nhwalo upande gwenio kulitipikii lyobha gwa Kiliate Yealimo pikemwa Mahane Dane yane kighono chu ku Dane ade deleno. 13 Kubhoka kwenio ngabhajhenda kukilambo chuku itombe yuku Efulaimo, kajhake Mika.

14 Bhando nhwano bheniya ngibhajhenda kuilingukii kilambo chuku Laishi ngabhalobholila akalongomundo kubhehe, "Bho, umanye kubhehe pakate jha majhumba agha kibhii kizibao na inyagho yukajha na kinyagho chukubhacha chibhakilime madine gha feza? Na helahela ibhii inyagho henge ichapanga. Naumanya mabhene nantenda bhole." 15 Peniya akalingukii bheniya ngabhajhenda ukajha kwa Mika, ngabhajhingii nkate nukunkonyekeya nhwalo gwa kangombo jwa likabila lya Lawe. 16 Kipinde chenio bhando miya chita bha likabila lya Dane bhibhakibha na chilaha yabhe ya ngondo bhakajhemite pannyango nkolongwa gwa muche. 17 Bhando nhwano bheniya bhibhajhenda kulingukiya kilambo bhala ngabhajhingii nkate unyumba, ngabhatola kinyagho kubhacha na kizibao pamonga na inyagho henge ichapanga. Kipinde chenio mpiya litambiko jwenio akibha ajhemite pannyango pamonga na bhando miya chita bhina chilaha ya ngondo.

18 Mpiya litambiko jhola ngabhabhona akalingukii bhakajhingila unyumba jha Mika nu kutola kinyagho chukubhacha pamonga na kihukilo chukunkonyela ghapala Chapanga na kinyagho chukuyana, jwenio ngabhakonya, "Nike mihenga?"

19 Bhene ngabhajhangwila, "Nkotoke, nhumbate nnomo gwino, nnyende pamonga na twenga, mme mapiya litambiko bhito na ngita matate bhito na mpiya litambiko gwito. Amu mwe milola bho? Mwe nnola kilebhe chambone kubhe mapiya litambiko bhi likabila limo amu kubhehe mapiya litambiko bhi likabila lyoha lya Ichilahele?" 20 Mpiya litambiko jwenio ngahekalila hake, ngatola kihukilo na kinyagho chenio, pamonga na ichapanga yukuyana, ngajhenda nabho.

21 Bhahe, ngabhabhoka ku muche gwa Mika ngabhajhendelila na mwanja gwabhe. Kone ngabhailongwicha yana na ipugho yabhe pamonga na ilebhe yabhe yoha. 22 Pibhaika kutale na nyumba jha Mika, Mika ngamanya kubhehe ilebhe itoilwe, yene ngabhakemita bhando bhake bhibhakibha pahina na ngabhakongina pamonga, ngabhakengima bhando bhi likabila lya Dane ngabhakolela. 23 Peniya, ngabhachobhalila, na bhando bha likabila lya Dane ngabhaghalambukila nu ngabhankonya Mika, "Bho, nnolite kilebhe ghane ade kutukema nilinchambe ngita lende?"

24 Mika ngalonge, "Mangota ntolingine ichapanga yango jhindengeniche namwete, kabhele mutoii mpiya litambiko jwango, ngauneka changakilebhe chochoha. Ngohe mingonya mmi na malola ghane?"

25 Bhando bha likabila lya Dane ngabhannobholila, "Mbaha maghaleke mayele ghino, amu bhange pakate jhito bhina lilaka bhahoto kumbula, namwe mihoto kuhobheya ghome gwino na ghome gwa akalongo bhino." 26 Mika palolita bhampetite makakala ngabhatabhuka ngabhujha kajhake, na bhando bha likabila lya Dane ngabhajhendilila na mwanja gwabhe.

27 Bhando bheniya bha likabila lya Dane ngabhatola ilebhe yoha ya Mika yatendikiya jwene, ngabhantola na mpiya litambiko jwakibha antumikila Mika. Peniya ngabhajhenda kukijhingilila kilambo chuku Laishi na kwakoma bhando bha kwenio bhibhakibha bhatamita kwa uteeke na changakiholo, na ngabhatiniya kila kilebhe mu kilambo chenio. 28 Bhando bha kilambo chenio bhakibha jhe na mundo jwakwaghombola nhwalo bhakibha kutale na ku muche gwaku Chidone, kabhele bhakibha jhe na akakoche na bhando bhange kupala bhatangatilwe.

Kilambo chenio kikibha chehemo jhululambo lwa Bete Leobo. Bhando bha likabila lya Dane ngabhachenga kabhele kilambo chenio nu kutama mwenio. 29 Ngabhaghalambwiya liina lya muche gwa Dane, ngabhakema liina lya okomundo jwakibha mwana jwa Yakobu helahela akemitwa Ichilahele. Nambo kilambo chenio makacho kikemitwa Laishi. 30 Bhando bha likabila lya Dane ngabhajhemika kinyagho chukubhacha, Yonathane mwana jwa Gelishomu, nchokolo jwa Mucha, ngabhe mpiya litambiko jwabhe. Ibheluko yabhe helahela ngabhila ipiya litambiko ya likabila lya Dane ade bhando bha kilambo chenio pibhatoilwa kujhenda kuluamo ku Babeli. 31 Kipinde choha Lihema lya kuntumikila Bhambo Chapanga pikibha ku Shilo, bhando bha likabila lya Dane bhakibha bhajhendilila kuitumikila inyagho yu kubhacha ya Mika.