1 Machiko gheniya ku Ichilahele pakibha jhe na munahota nkolongwa, pakibha na Nnawe jhumo jwatamita ngita nng'ene kutale pikilambo chiitombe ya ku Efulaimo. Mundo jwenio ngatola kilaghe ku Betelehemo ku kilambo chuku Yuda. 2 Nambo kilaghe chenio nganchimwa Nnawe jwenio, nganneka nukujhende kajhake kwa tate mundo ku Betelehemo, kwenio mwikeghe jwenio ngatama myehe ncheche. 3 Lichiko limo nnganamundo ngatola ntumiche jwake na maponda mabhele nu kujhenda ku Betelehemo. Ajhenda kulonge nako kunnyopa abhujhe bhatame nako kabhele. Mwikeghe jwenio nganneka nkate mwa tate mundo, nkohanomundo palola ngampokela kukuhengwa mwojho. 4 Nkohanomundo ngampokila, peniya ngatama kwenio kwa machiko matato, Nnawe jwenio pamonga na ntumiche jwake ngabhalila nu kunywelekeya ngabhagholwika kweno. 5 Lichiko lya ncheche ngabhajhimwika putepute, ngabhakilenganikiya kwa mwanja, nambo tate jwa mwikeghe jwenio ngannobholila, "Nnabhuke hote nkola makakala kubhoka peniya nnyendangane."

6 Bhahe, bhando bhabhele bheniya ngabhatama, ngabhalila nu kunywelekeya pamonga. Peniya nkohanomundo ngannobholila, "Chonde nng'oloke pamba kilo jhenje nu kukihanganila."

7 Nnawe jwenio pajhinwika kupala kubhoka, nkohanomundo ngampembilikiya atame, jwenio ngaighala. 8 Lichiko li nhwano nnabhe jwenio ngajhimwika putepute, kupala ajhende. Nambo tatemundo mwikeghe jwenio ngannobholila, "Nkomalile hote nkola makakala, peniya nnenda lyobha lihenamuka nnyenda." Bhoha bhabhele ngabhajhenda kulye pamonga.

9 Nnawe jwenio pamonga na kilaghe chake na ntumiche jwake pibhajhemita kupala kujhenda, nkohanomundo ngannobholila Nnawe jwenio, "Ngohe mui ujhomwokile na kimiye kibhandikile. Nng'oloke pamba kukukihanga. Kilabho putepute ntumbula mwanja gwino ghukukelebhuka kajhino."

10 Nambo nnabhe jwenio ngakana kugholoka kwenio kilo jhenio. Bhahe, ngajhema kubhoka ngaika pahina nu kubomane ku Yebuse, liina lenge Yeluchalemo. Akibha na maponda ghake mabhele ghighatandikwe, kabhele akibha pamonga na kilaghe chake. 11 Pibhabhandikila kukilambo chiku Yebuse, lichiko libhandikila kujhomoka, ntumiche ngannobholila munahota gwake, "Ngohe mbaha tujhingii mu kilambo cha aka Yebuse tugholoke mwenio kilo jhenje."

12 Munahota gwake nganyangwila, "Tujhigha jhe kujhingii mu kilambo cha akaghene bhangabhe aka Ichilahele. Tujhendelele na mwanja ade ku Gebeya. 13 Tughaghe tukagholoke ku Gebeya amu ku Lama." 14 Bhahe, ngabhajhendilila na mwanja ade lyobha pilitipika ngabhabhe pahina nu kuika ku Gebeya, kilambo cha likabila lya aka Benjamine. 15 Ngabhajhingila pabomane kupala kugholoka peniya kilo. Pibhaika pabomane ngabhajhenda kutama pikibhanja cha pabomane pakongoloo, nhwalo akibhajhe mundo jwabhapokile pakajhake.

16 Pibhakibha peniya, okolo jhumo ngaika pena ahumila kung'onda gwake. Hokolo jwenio akibha nkolo kilambo cha itombe yuku Efulaimo na atamita ku Gebeya ngita nng'ene. Akolo kilambo bhuku Gebeya bhakibha bha likabila lya Benjamine. 17 Hokolo jwenio palola nu kummona mundo jwenio abhii kwenio kukibhanja, ngankonya, "Gwe, mibhoka kojhe na mijhenda koo?"

18 Nnawe jwenio ngajhangwila, "Tuhumita ku Betelehemo kukilambo chuku Yuda na tujhenda kutale kuilambo ina itombe yuku Efulaimo. Kwenio ndi kunitama na ngohe nikelebhuka ku Betelehemo yuku Yuda, mujha ukajha apitii jhe mundo jwambokile pamba kujhenda kajhake. 19 Nambo tukwete kila kilebhe, twe akatumiche bhino tubhii na manyahe ghukulye maponda ghito. Helahela tubhii na mabumunda na divaye yukulye nenga na kilaghe chango na ntumiche jwango."

20 Hokolo jwenio ngannobholila, "Uteeke ubhaha na mangotamwe, eghelela pakajhango! Ne nanimpela kilebhe chochoha chimipala. Nambo mangagholoka jhe palubhanja pano." 21 Yene, hokolo jwenio ngabhapelika kajhake na ngaghapila maponda gheniya manyahe ghukulye. Na bheniya ngabhapila mache ghukukuwa makongono ngabhalila nu kunywelekeya.

22 Pibhakibha bhikihangana mwojho, papa tu akangongola bhapabomane ngabhaika nukuitindii nyumba jhenio nukukong'onda nnyango kanonoo. Ngabhannobholila hokolo nkolo nyumba, "Mupiye panja munalome jwaiki pamba tupala kugholoka nako."

23 Nambo hokolo jwenio nkolo nyumba ngapita panja, ngalonge, "Yene jhe akalongo bhango, ne ndenda kunnyopa mangatenda jhe ubhoho gwenio. Ojho nng'ene jwango, mangatenda jhe kilebhe chahone chenio. 24 Pamba ngwete nchikana jwangammanya munalome helahela abhi kilaghe cha nng'ene jwenio nanapiya panja matola bheniya matendela chimikipala, nambo mundo ojho mangantendela jhe kilebhe chochoha changanandela ngita chenio." 25 Nambo akanalome bheniya bhakannyokanikii jhe. Nambo Nnawe jwenio ngakipiya kilaghe chake chela ngabhakamwiya na akanalome bheniya ngabhantola, ngabhannimba kelu ndaa pahina nukuchegha ngabhanneka ajhende.

26 Lukela putepute mwikeghe jwenio ngakwabhila kubhujha ade pannyango gwa nyumba jhabhii unganamundo, ngagwila pahe nu kutama ade pukuchila. 27 Unganamundo pajhimwika lukela, ngajhogwila milyango jha nyumba ngapita panja kupala bhajhendele na mwanja. Kukuchitukila ngakibhona kilaghe chake kigholwike pannyango, mabhoko ghake ghakamulii nkolokote gwa nnyango. 28 Ngalonge, "Nnyinuke tujhende." Nambo jwenio ajhangwii jhe kilebhe. Ngantola nukuobhokeya muliponda lyake nukumpeleka kajhake. 29 Paikita kajhake, ngatola kihembe nukunheketana ipande kome na ibhele. Kila kipande chimo ngapelika mu kila likabila lya ku Ichilahele. 30 Bhando bhoha bhibhalolita kilebhe chenio ngabhalonge, "Oko! Kilebhe kibhoho ngita chenje tunakibhona jhe kutumbulii putubhoka kukilambo chuku Michile ade ngohe! Tukiwachii, tulonge pamonga natutenda bhole?"