1 Bhando bhoha bhuku Ichilahele, kuhumi kila chehemo ngabhahika ku Dane ade kachekachine jhiku Bele Sheba, pamonga na bhando bhikilambo chuku Geleade, bhando bhoha ngabhakongana ku Misipa nu kubhehe kilebhe chimo, nnonge jha Bhambo Chapanga. 2 Ilongoche yoha ya makabila ghuku Ichilahele ngabhaika nnonge jha ngongano jha bhando bha Chapanga. Akakomana ngondo bhina chilaha bhakibha lake ncheche. 3 Na bheniya bhando bhoha bha likabila lya Benjamine, ngabhajhoha kubhehe Akaichilahele bhange bhakonganike ku Misipa.

Akaichilahele ngabhankonya munalome jwenio, Nnawe, "Mutulobholele ubhoho gwenio utendika bhole?"

4 Nnawe jwenio, munalome jwa kilaghe ngajhangwila, "Nenga pamonga na kilaghe chango ngutuika kukilambo chuku Gebeya, kilambo cha likabila lya Benjamine kupala tugholoke peniya kilo. 5 Nambo bhando bhikilambo chuku Gebeya ngabhaika kilo kunnyingilii nenga ngibhiitindila nyumba jhinikibha ng'olwike. Bhapata kungoma, ngibhikilimba kilaghe chango ade kuwegha. 6 Ne ngandohila ntuhe gwake ngahekitina ipande nukupeleka kukila likabila lya Akaichilahele kipande chimo. Mana bhateii kilebhe cha hone chikipalwajhe na ukokotoko pi Ichilahele. 7 Ngohe mangota Makaichilahele nnongela na mpiya luhadabulo lwino."

8 Bhando bhoha kwa lilobhe limo ngabhajhema nu kulonge, "Abhii jhe mundo pakate jhito jwapakubhujha ku lihema lyake amu kajhake. 9 Yene ndi chitupakutenda kunhwalo gwa bhando bhuku Gebeya. Tutenda kiumbuumbu nnobhole kupala twamanye likabila lilipakujhenda kwabula. 10 Twahaghuu bhando kome kila pakate jha bhando miya jhimo bha Akaichilahele, bhando miya jhimo kila pakate jha bhando elufo jhimo, bhando elufo jhimo kila pakate jha bhando elufo kome. Bheniya bhibha nilihengo lya kwalete chakulya ajhabhe bhibhabhii nilihengo lya kwahadabuu bhando bhuku Gebeya kilambo chuku Benjamine kwa ubhoho gwabhe ghubhatei pikilambo chuku Ichilahele." 11 Yene akakomana ngondo bhoha bhuku Ichilahele ngabhakongana pamonga kwajhingilii bhando kumuche gwa ku Gebeya.

12 Bhando bha makabila ghuku Ichilahele ngabhatuma bhando kujhenda kila chehemo pighabhii makabila gha Benjamine kulonge, "Bho, ubhoho ghane ghongo ghunteilingine ajhito? 13 Ngohe mutulobholele bhando bhibhateii ubhoho nkolongwa ghongo pikilambo chuku Gebeya kupala twakome nu kukomelekeya njwenjwe pa Ichilahele pano." Nambo bhando bha likabila lya Benjamine bhakajhokanikii jhe akalongo mundo Akaichilahele. 14 Nambo bheniya ngabhabhoka ku miche jhabhe yoha ya Benjamine nukongana ku Gebeya, kupala kubulana na bhando bhuku Ichilahele. 15 Bhando bhi likabila lya Benjamine ngabhakonganicha akakomana ngondo elufo ichiline na chita kubhoka mu miche jhabhe bhukuhoto kutumi upanga, na ajhito akolo kilambo bhuku Gebeya ngabhakonganicha bhando miya chaba bhangajhoghopa ngondo. 16 Pakate jha akakomana ngondo bheniya bhoha, bhakibha akakomana ngondo miya chaba bhibhatumii lubhoko lwangejha. Bheniya bhakibha kila mundo jwahoto kutumii ngumbelo nu kupema lijhunjo pangakotowa. 17 Akaichilahele changabhalangila likabila lya Akabenjamine, ngabhakonganicha bhando lake ncheche bhibhamanye kutumii chilaha, bhoha bhakibha bhangajhoghopa mungondo.

18 Akachilahele ngabhajhenda ku Betele chehemo pukunnyinamii Chapanga, kupala bhamanye likabila lyakujhenda kutumbuu kubulana ni likabila lya aka Benjamine.

Bhambo Chapanga ngalijhanguu, "Likabila lya Yuda litumbule."

19 Peniya aka Ichilahele ngibhalabha lukela lichiko lilikengima kujhenda kubheka kighono chabhe pahina na muche gwa ku Gebeya. 20 Akaichilahele ngabhajhenda kubulana na bhando bha likabila lya Benjamine, ngaleganikiya akakomana ngondo bhabhe kila jhumo ngajhema chehemo jhake kubulana kwenio ku muche gwa ku Gebeya. 21 Bhando bha likabila lya Benjamine ngabhapita panja jha muche gwa ku Gebeya ngabhabulana na aka Ichilahele, ngabhakoma bhando bhuku Ichilahele elufo ichiline niibhele lichiko lyenio. 22 Nambo aka Ichilahele ngabhakwimichina miojho, ngabhakilenganikiya kabhele kwa ngondo chehemo jhela pibhajhemita makacho. 23 Kabula jha gheniya, aka Ichilahele ngabhajhenda chehemo jhukunnyinamila nukupipikiya nnonge jha Bhambo Chapanga ade kimiye. Peniya ngabhajhopa kujheketelwa na Bhambo nukonya, "Bho, kabhele tujhenda kubulana na akalongo bhito bha likabila lya Benjamine?"

Bhambo Chapanga ngajhangwila,

"Ajha, nnyendengane makakomane nabho."

24 Yene lichiko lyubhele aka Ichilahele ngabhabhandikila pahina kubulana na bhando bha likabila lya Benjamine. 25 Lichiko lyenio bhando bha likabila lya Benjamine ngabhabhoka ku Gebeya na kwajhingilii aka Ichilahele ajhabhe, ngabhakomita akakomana ngondo bhu ku Ichilahele elufo kome na nane, bhibhamanye kubulana. 26 Bhando bhoha bha akakomana ngondo bha aka Ichilahele bhibhaighilii ngabhajhenda kumuche gwa ku Betele. Lichiko lyenio ngabhapipikiya kwenio mukunnelela Bhambo Chapanga pamonga nukupunga ade kimiye. Ngabhapangii Bhambo Chapanga matambiko ghukukomelekeya na matambiko gha uteeke. 27 Akaichilahele ngabhannyopa Bhambo Chapanga bhape malango kwenio ku Betele. Kipinde chenio Lichanduko lya Bhambo Chapanga likibha ku muche ghu ku Betele. 28 Finehase mwana jwa Eliazale, nchokolo jwa Alune akibha mpiya litambiko jwatumika nnonge jhabhe. Akaichilahele ngabhannobholila Finehase ankonye Bhambo Chapanga, "Bho, kabhele tujhende tukabulane na akalongo bhito bha likabila lya aka Benjamine?"

Bhambo Chapanga ngajhangwila, "Nnyendengane. Kilabho namatenda manhotole bhando bheniya."

29 Yene Akaichilahele ngabhabheka akakomana ngondo muijhobho kutindii bomane jha ku Gebeya. 30 Lichiko lyuutato Akaichilahele ngabhajhenda kubulana na bhando bhilikabila lya Akabenjamine. Ngibhikilenganikiya kutindii mubomane jhuku Gebeya ngabhajhema chehemo jhabhe pukutumbula. 31 Peniya, bhando bha likabila lya Akabenjamine pibhabhoka ku muche jhuku Gebeya kutumbu kubulana na Akaichilahele, nambo ngabhatilila panja jha muche na akakomana ngondo bha Akabenjamine ngabhakengamila. Ngibhipitii kabhele ngita chibhapitila makacho, Akabenjamine ngabhakoma Akaichilahele mundela ngolongwa jhijhenda ku Betele pamonga nuku Gebeya ade kunjenga. Ngabhakomwa Akaichilahele makome matato. 32 Akakomana ngondo bhuku Benjamine ngabhawacha kulonge, "Twabulite ngita makacho."

Nambo Akaichilahele ngabhalonge, "Twenga tutile, kupala twautii panja jha muche ade kundela ngolongwa."

33 Yene kikunde kikolongwa cha akakomana ngondo bhoha bhuku Akaichilahele ngabhahikita Baale Tamale nu kujhema peniya, ngabhajhema mu chehemo jhabhe kupala kukomana. Kipinde cheche akakomana bhange bhuku Ichilahele bhubhakijhobhite upandi ghulitipikii lyobha mwa Gibeya ngabhapitila kukomana ngondo. 34 Akakomana ngondo bhange elufo kome Akaichilahele bhibhamanya kukomana ngondo maha ngabhajhingilila bhando bhuku Gebeya. Ngondo jhi lichiko lyenio ikibha ngolongwa. Nambo Akabenjamine bhakamanyii jhe kubhehe kukomelekelwa kwabhe kubhandikile. 35 Bhambo Chapanga ngabheka Akaichilahele kwaotola akakomana ngondo bha Akabenjamine. Akaichilahele ngabhakoma bhando elufo ichiline nunhwano na miya jhimo. Akakomana ngondo bhoha bhibhakomitwe bhakibha mapunde bhukubulana kwa upanga. 36 Peniya bhando bhilikabila lya Benjamine ngabhamanya kubhehe bhalepelile.

Akaichilahele ngabhabhujha unyuma anda bhatenda kwatila bhando bha likabila lya Akabenjamine, ngabhahobholila kubhehe ajhabhe bhibhakibha bhajhobhite kupala kwabula bhando bhuku muche gwa ku Gibeya.

37 Bhando bhibhajhobhila ngabhabhoka kajhombe nukujhingilii muche ghuku Gebeya na kwakoma bhando bhoha bhibhakibha mwenio ku upanga. 38 Akakomana ngondo bhu ku Ichilahele na bhala akakomana ngondo bhibhajhobhite kutindii muche, ngabhalaghina kubheka nginyililo. Bhala bhubhajhobhite ngabhajhita mwotu nkolongwa nu lyohe ngaljhenda kunane ngita lihunde. 39 Peniya, akakomana ngondo bhuku Ichilahele ngabhaghalambwika nu kwajhingilila akakomana ngondo bha Akabenjamine. Kipinde cheche, bhando bhi likabila lya Benjamine bhakibha bhakomite Akaichilahele makome matato nu kulongolelana, "Twabulite hake ngita pitabula makacho." 40 Nambo lihunde lela lya malyoe pilitumbwila kuuka mu muche gwenio, bhando bha likabila lya Benjamine pibhaghalambwika unyuma nu kukangacha kulola muche gwabhe ukajhaka mwotu. 41 Ndi Akaichilahele pibhaghalambwika na Akabenjamine ngibhahechwika hake, nhwalo ngabhamanya kubhehe ngohe kujhomwoka kwabhe kuikite. 42 Yene ngabhaghalambwika, ngabhabhatilila Akaichilahele kujhenda kunjenga, nambo ngondo ngajhakolela nukikibhona bhabhii pakate jha ikunde ibhele ya akakomana ngondo ya Akaichilahele, na akakomana ngondo bheniya ngabhaikilila nu kwakoma. 43 Akaichilahele kwapenganikiya kila chehemo Akabenjamine, ngabhakengemila kuhumii mu muche jhuku Noa ade upandi ghulihumii lyobha mwa ku Gebeya kongo kupeta kwakoma bhando pakate jhabhe. 44 Lichiko lyenio bhando elufo kome na nane bha likabila lya Benjamine, bhoha bhakibha akakomana ngondo bhangajhoghopa, ngabhakomitwa. 45 Bhando bhange bhalikabila lya Benjamine ngabhaghalambwika nu kutilila kujhenda kunjenga ade mulindalabho lya Limone. Pakate jhabhe bhando elufo nhwano ngabhakomitwa kundela ngolongwa pibhakibha bhatilita. Akaichilahele ngabhajhendilila kwabhengabhenga Akabenjamine kwa makakala ghoha ade mu muche jhuku Gidomu, kwenio ngabhakoma bhando bhange elufo ibhele. 46 Lichiko lyenio akakomana ngondo elufo ichiline nunhwano bha Akabenjamine bhibhamanye kubulanila mapanga, ngaghakomwa, bhoha bhakibha akakomana ngondo bhakibha mapunde ghukubulana.

47 Nambo akanalome miya chita gha likabila lya Benjamine ngabhaotola kutilii kunjenga ade panane jha kulindalabhalo lyaku Limone, ngabhatama kwenio myehe ncheche. 48 Akaichilahele ngabhaghalambwikila kabhele aka Benjamine, ngabhakoma bhoha, akanalome na akakeghe na yana pamonga ni inyama. Ni ilebhe yoha ibhikolila kwenio ngibhijhocha mwotu.