1 Lichiko limo Yerubaale yane, Gidione na akakomana ngondo bhake bhoha ngabhajhimuka putepute nu kubheka kighono pahina na chembwe cha mache chuku Halode. Kighono cha Akamidiane kikibha upande gwa kachikachine pahina na mu lulambo pahina ni kitombe chuku Mole.

2 Bhambo Chapanga ngannobholila Gidione, "Akakomana ngondo bhumii nako bhajholwike hake ku kwahoto aka Midiane. Mwichilahele angakikweya jhe kubhehe, makakala ghake jwenio kulonge ndi ghankombwii. 3 Ngohe matangachila bhando kubhehe, ‘Mundo jhojhoha jwajhoghopa nu kulendema chonde mbaha akalebhuka ukajha, abhoke pakitombe cha Gileade.’ " Yene bhando elufo ichiline na mabhele ngabhakelebhuka na ngabhaighala bhando elufo kome ndo.

4 Bhambo Chapanga ngannobholila Gidione, "Makambako ghamela twe, matumbukiye umache kupala najhighe. Peniya naninnobholela jhukujhenda nako. Na anda ninnobholile mangajhenda nako, bhahe, mangajhigha jhe kujhenda nako." 5 Bhahe, Gidione ngabhalongwiya bhando kuloche na Bhambo Chapanga ngannobholila, "Mabheke pakanjika bhando bhoha bhibhalapulii mache ngita ghimbwa, na bhando bhala bhibhanywe kone bhachutwime hele pabhe mabheka." 6 Akakomana ngondo bhibhanywila kwakulapulii anda ghimbwa bhakaiki miya itato, nambo bhibhakaighilile bhanywila kwa kuchutama. 7 Bhambo Chapanga ngannobholila Gidione, "Kwa akakomana ngondo bhamba miya itato bhubhanywii anda ghimbwa, nanakombola aka Ichilahele na mangota namahotola aka Midiane. Bhange akakomana ngondo bhibhaighalile maleke bhakelebhuka kila mundo ukajhake." 8 Yene, Gidione ngabhelekita aka Ichilehele bhange akakomana ngondo bhala bhakelebhuke ukajha. Ngaighala nabho miya itato bhala, bheniya ngabhatoila yakulya na mapenenga ghala bhibhakelebhuke ukajhabhe. Akamidiane kighono chabhe kikibha pahina nu pululambo.

9 Uhiko ghogho, Bhambo Chapanga ngannobholila Gidione, "Nnyende makajhingilile mwighono yabhe, nhwalo nantenda mahotole bheniya. 10 Nambo anda mipwelela, bhahe, nnyenda pamo na ntumiche gwino Pula. 11 Namajhoha chibhabombolokana kwenio, na mwe ma Gidione nankola makakala gha kwajhingilila." Bhahe, Gidione ngalongohana na ntumiche mundo Pula ade kuighono ya ulonda ya Akamidiane. 12 Akakomana ngondo bha Akamidiane na aka Meleke na bhando bhake bhuupande ghulihumii lyobha bhapechengine kila chehemo pululambo. Bhakibha mbwe ngita madidima na ngamiya yabhe ibhalangika jhe, kujholoka kwake ngita ncheke gwa muupele jha mbwane.

13 Gidione pukiikita kipinde chenio, nganyoina mundo jhumo anchimulila nnyake maloto kubhehe, "Nnotii naha libumunda lya chayile likibhilingika ade pakighono cha Akamidiane, ngalibhulita lihema nu kulipendengulila hoko, ngakipechukila pahe."

14 Ajhake ngabhakonyita, "Kilebhe chenje chengii jhe nambo ilangii upanga gwa Gidione mwana jwa Yoashi, mundo jwahumii ku Ichilahele. Bhambo Chapanga antehi kwahotola aka Midiane na akakomana ngondo bhoha."

15 Gidione pajhohina maloto gheniya na mana ghake, ngannombita Chapanga. Yene ngabhujhita pakighono cha Akaichilahele nu kulonge, "Jhimuka, Bhambo Chapanga atutangatii kwahotola akakomana ngondo bha aka Midiane!" 16 Yene, ngabhabhaghanicha akakomana ngondo bhala miya itato mu ikunde itato, ngabhakamwiya mapenenga na ibhegha na mambolembole, 17 ngabhalobholila kubhehe, "Putubhandikii kighono, ntenda tela ngita chimbakutenda nenga. 18 Pumbakuhona lipenenga nenga na nchambe gwango, na mangota nhona mapenenga ghino kila upande nu kulonge kanonowa kubhehe, ‘Tutenda naha kwa nhwalo jha Chapanga na Gidione helahela!’ "

19 Pubhandikila uhiko gwa kilo, Gidione na lilongo lyake lya bhando miya jhimo ngabhaika pukijhomokii kighono. Peniya ndi pukutumbulii kipinde cha akakomana ngondo bhibhajhanganana chamu jha ulonda. Ngabhahonita mapenenga nu kubhakajwila ibhegha ibhakibha nayo, 20 na malongo ghange ghala ngaghateila hele naha. Kongo bhakamwii mambolembole mulubhoko lwa ngejha nu lubhoko lwelo bhabhii na mapenenga bhahonita, na kongo bhalongila kanonoho kubhehe, "Upanga kwa nhwalo jha Bhambo Chapanga na kunhwalo jha Gidione!" 21 Bhoha ngabhajhema kutindi kighono choha cha Akamidiane. Akamidiane bhoha ngabhatila kone bhakemita mulete. 22 Akakomana ngondo bha Gidione pibhakibha bhahonita mapenenga ghabhe, Bhambo Chapanga ngabhateila Akamidiane kudodana bhene chika pakighono. Bhala bhangakomwa ngabhatilila ku Selela pahina nu ku Bete Shita mupakane mwa Abele Mehola pahina nu ku Tabate.

23 Akakomana ngondo bhange bha Akaichilahele bhibhahumila mu makabila gha ku Nafutale nu ku Ashele nu ku Manache, ngabhakengima Akamidiane. 24 Gidione ngatuma lilobhe kwa bhando bhibhatama muitombe ya ku Efulaimo kulonge, "Mwaibhilikiye Akamidiane mukapenganikiye mulijhomboko lya ku Bete Bala na helahela kulukemba lwaku Yoludane." Yene, bhando bhoha bhaku Efulaimo ngabhalupenganikiya lukemba Yoludane ade ku Bete Bala. 25 Ngabhapukila ilongoche ibhele ya aka Midiane Olebo na Zeebo. Olebo ngakomilwa pala palindalabho lya Olebo na Zeebo ngakomilwa pala pikilibha chukuminyii divaye yaku Zeebo. Akakomana ngondo bhaku Efulaimo ngabhadumwila mitwe jha ilongoche ibhele ya aka Midiane nu kunkamuya Gidione kwiye jha lukemba Yoludane.