1 Akaichilahele ngabhatenda kabhele uhakaho palonge jha Bhambo Chapanga, jwenio Bhambo Chapanga ngabhaleka bhalongochwe kukubhonelwa na aka Filichite kwa kipinde cha yaka makome ncheche.

2 Pakibha na mundo jhumo jwaku Sola, jwa likabila lya Dane, liina lyake akemitwa Manowa. Nhwanamundo akibha jhe na mwana nhwalo gwa utonga. 3 Lichiko limo ntumiche jwa kunane kwa Chapanga ngampitila mwikeghe jwenie nu kunnobholela, "Mwe, makahotwii jhe kubhehe na yana, nambo ngohe nampata ndumbo nu kupapa mwana munalome. 4 Ngohe mma miho manganywe jhe divaye hilu kulobhela chochoha, na hilu mangalye jhe kilebhe chochoha changajheketelwa palonge jha Bhambo Chapanga, 5 na mwana papakubhelukwa, manganchekujhe majhunjo, nhwalo apakulumikwa kwa lihengo lya Chapanga. Natumbula kwakombola aka Ichilahele kubhoka mu makakala gha aka Filichite."

6 Ndi mwikeghe jwenio ngajhenda kunnobholela unganamundo kubhehe, "Mundo jwa Chapanga ngaika nu kumio jhake kukibha kujhogwiya hake ngita ntumiche jhukubhoka kunane kwa Chapanga, nanenga ninkonyitejhe kubhehe nhumii koo? Na liina lyake alongiijhe. 7 Nambo ngannobholila, mpakubhe na ndumbo nu kupapa mwana munalome. Ngohe manganywe jhe divaye hilu kulobhela na mangalye jhe kilebhe chochoha changajheketelwa palonge jha Chapanga nhwalo mwana jwenio apakubhe jwa nyahinyahi jwa Chapanga kuhumii mulutumbo ade kuwe kwake."

8 Peniya Manowa ngannyopa Chapanga kulonge, "Mwe Mabhambo, nanjino nimpala mundo jwa Chapanga aike kabhele atulobholele ilebhe ipalwa kukamula kwa mwana jwenio jwapala kubhelukwa."

9 Bhambo Chapanga ngajhowa malobhe ghajhopa Manowa, na ntumiche jwa kunane kwa Chapanga ngannyendila kabhele mwikeghe jhola kipinde pakibha kung'onda, nambo Manowa unganamundo mwikeghe jwenio akibha jhe. 10 Bhahe, mwikeghe jwenio ngajhenda kajhombe kwa unganamundo, ngalonge, "Nnola! Mundo jhola ambitii kabhele, jhola jwanhikilila lichiko lela."

11 Manowa ngalongohina na nhwanamundo kujhenda ade kwa mundo jhola, ngankonya, "Bho, mwe ndi jwamalongela na nhwana gwango?"

Jwenio ngajhangwila, "Ena, ndi nenga."

12 Manowa ngalonge, "Malobhe ghino pighapakulenganila, bho, mambu ghane ghipalwa tughahenga kunhwalo jha mwana jwenio? Bho, lihengo lya mwana nalibhaha nike?"

13 Ntumiche jwa kunane kwa Chapanga ngannobholila Manowa, "Nhwana gwino ipalwa akamula malobhe ghoha ghininnobholile. 14 Angalye jhe kilebhe chochoha chikibhoke muchabibo hilu anganywe jhe divaye hilu kulobhela chochoha na angalye jhe kilebhe chochoha changajheketelwa palonge jha Chapanga, gheniya ghoha ipalwa aghakamula."

15 Manowa ngannobholila ntumiche jwenio jwa Bhambo Chapanga, "Tunnyopa ntame ote pandina tunnenganikiye katohe ka mbuhe kwa nhwalo gwino." 16 Nambo ntumiche jwa Bhambo jwa kunane kwa Chapanga ngannobholila Manowa, "Mangang'aghalila jhe kulye chakulya chino. Nambo anda mpahile nnenganikiya litambiko lyukukomelekeya, mpiikiya Bhambo Chapanga."

Manowa akamanyii jhe kubhehe jwenio akibha ntumiche jwa kunane kwa Chapanga.

17 Manowa ngannobholila, "Liina lino ghane kupala ilebhe yenie pipakulenganila tumpe ichima."

18 Ntumiche jwa kunane kwa Chapanga ngankonya, "Nhwalo gwa nike mingonya liina lyango? Liina lyango nenga lya kukangacha."

19 Peniya Manowa ngatola litohe lya mbuhe pamonga na litambiko lya ukobha ngajhenda kumpiikiya Bhambo Chapanga panane pilighanga. Ntumiche jwa kunane kwa Chapanga jwatenda ilebhe yu kukangacha, Manowa pamonga na nhwanamundo ngibhiibhona yenie. 20 Kipinde Manowa na nhwanamundo pibhalolikiya nime ya mwotu yakajhenda kunane kwa Chapanga kubhoke pachehemo jhukupiikiya litambiko, ngabhammona ntumiche jwa kunane kwa Chapanga jwenio akajhenda kunane kwa Chapanga pamonga nime ya mwotu yenio. Peniya Manowa na nhwanamundo ngabhagwila mangukama kunyinamila. 21 Manowa ngamanya jwenio akibha ntumiche jwa Bhambo Chapanga. Na jwenio ntumiche jwa Bhambo Chapanga ampitii jhe kabhele Manowa na nhwana mundo.

22 Manowa ngannobholila nhwanamundo, "Chakaka tupakuwegha, nhwalo tumweine Chapanga."

23 Nambo nhwanamundo Manowa ngannobholila Manowa, "Bhambo Chapanga ngapala kutukoma, ngapokii jhe litambiko lyu kukomelekeya na litambiko lya ukobha, hilu kabhele kututangachila ilebhe yenie kipinde chenje."

24 Peniya nhwanamundo Manowa ngapapa mwana munalome, na Manowa ngantina liina lyake Samusone. Mwana jwenio ngakola na Bhambo Chapanga ngampila mota. 25 Uhuke gwa Chapanga ngautumbu kunkokolekeya Samusone kipinde chakibha kukighono cha likabila lya Dane, yane Maane Dane, ikibha pakate jha ku Sola na ku Eshitaole.