1 Pajhomwika Ehude, Akaichilahele ngabhateila kabhele uhakaho gwabhe Bhambo Chapanga. 2 Yene, Bhambo Chapanga ngantangatila munahota nkolongwa Yabine jwaku Kanaane, jwalongicha ku Hazole. Nkolo jwa akakomana ngondo akemitwa Sisela, jwatamita kwenio ku Haloshete Hagoyimo. 3 Munahota nkolongwa Yabine akibha na mutuka ya choma miya ticha ghighahutwa na falache. Jwenio Yabine helahela akang'ahite hake Akaichilahele kwa kipinde cha yaka makome mabhele. Peniya, Akaichilahele ngabhannelila Bhambo Chapanga abhatangatile.

4 Kipinde chenio pakibha na nnondole jwa Chapanga mwikeghe liina lyake Debola, nhwanamundo Lepidote, kipinde chenio Lepidote akibha nkenga jwa Akaichilahele. 5 Debola akibha ajhawila kutama pahe jha nkongo ntende ghukibha panakate jha muche gwa ku Rama na ku Betele, mu kilambo cha itombe yaku Efulaimo. Akaichilahele bhakanyendii kupala atemulane mihalo jhabhe. 6 Lichiko limo ngankema Balake mwana jwa Abinoamo jwa ku Kadeche, kwenio ku Nafutale nu kunnobholela, "Bhambo Chapanga, Chapanga jwa Akaichilahele, anaghalikiya naha, ‘Nnyende, makatole akanalome elufo kome kubhoka ku Nafutale na ku Chabulone mwalongoche mu kitombe Tabore. 7 Naninnobholela Sisela, nkolo jwa akakomana ngondo jwa Yabine pamonga na mutuka yake ya ngondo ade mu lukemba Kishone, namwenga nanintangatila kunhotola.’ "

8 Balake ngannobholila Debola, "Anda natulongohana, nanyenda. Nambo anda tulongahana jhe, nijhenda ndeka."

9 Debola ngajhangwila, "Chakaka natulongohana pamonga nambo ndela jhipetela nampata ndeka ichima nhwalo Bhambo Chapanga nantangatila mwikeghe anhotole Sisela." Bhahe, Debola ngalongohina na Balake ade ku Kadeshe, 10 kwenio Balake ngabhakonganicha akakomana ngondo kuhuma mu makabila gha Chabulone na Nafutale. Bhando elufo kome ngabhankengima Balake, na Debola ngabhalongohina pamonga.

11 Kipinde chenio Heberi, jhumo jwa lukolo lwa Hobabo, nnamo mundo Mucha. Ngabhaleka Akakene ajhake nu kutama nganjika. Ngabheka kighono chake kutale kwenio ku mwalone gwa ku Zaananimo, pahina naku Kadeche.

12 Sisela pajhohina kubhehe Balake mwana jwa Abinoamo ajhawii ku itombe ya Tabore, 13 Sisela ngakonganicha akakomana ngondo na mutuka yake miya ticha ya choma ya ngondo yukuhutwa na falache, ngabhoka ku Haloshete Hagoimo, nu kujhenda ade ku lukemba Kishone.

14 Debola ngannobholila Balake, "Jhenda! Deleno ndi lichiko lino lyukunhotola Sisela! Nhwalo Bhambo Chapanga nantangatila mwenga mahotole bheniya. Chakaka Chapanga abhii nnonge jhino kunkomanila." Yene, Balake ngahelila ku itombe Tabore na akakomana ngondo elufo kome. 15 Bhambo Chapanga ngammoghina Sesila na bhajhendecha mutuka na akakomana ngondo bhoha kwa upanga nnonge jha Balake, yene Sisela ngaileka mutuka jhake nu kutila kwa magholo. 16 Bhahe, Balake ngabhabhutwiya akakomana ngondo bheniya na mutuka ya choma ya ngondo ade ku Haloshete Hagoimo na kwakoma akakomana ngondo bhoha ku upanga, akahighii jhe hilu jhumo.

17 Nambo Sisela ngabhutikila mu lihema lya Yaele, nhwana mundo Hebere, lukolo lwa Nkene nhwalo bhajhilanila kwa ukoche pakate jha Yabine, munahota nkolongwa jwa ku Hazore nu lukolo lwa Hebere, Nkene. 18 Yaele ngaika nu kukumbatila Sisela nu kunnobholela, "Munahota, jhingila nkate." Peniya, Sisela ngajhingila nkate mwa Yaele, na jwenie Yaele ngampukita libulangete gubigubi. 19 Sisela ngannobholila Yaele, "Mmii na nyota, umbe mache." Yaele ngampila mabhele badajha mache, peniya ngampukita kabhele. 20 Peniya, Sisela ngannobholila nhwanamundo Hebere, "Jhema pannyango. Mundo jhojhoha jwapakukonya abhii nng'ene jhojhoha pamba, nnongela, abhii jhe."

21 Sisela akibha tipitipi mulughono ku kutotokela. Yene Yaele, nhwana jwa Hebere, ngatoila kipekepeke cha lihema na nyundo, nganyalila kachoko ngankobholila palibhonge lya muto ngakipitila kukihogho nu kujhingii muundope. Yene, Sisela ngajhomwikila papa. 22 Balake pibhankengimila Sisela, Yaele ngapita panja nu kumpokela. Ngannobholila, "Hika! Ninangiye jhola jhumumpalaha." Balake ngajhingila nkate jha lihema lya Yaele nu kunkolela Sisela abhii ngula ajhomwike, na kipekepeke cha lihema kibhii pakibhonge chake.

23 Yene lichiko lyenie, Chapanga ngabhatangatila Akaichilahele kunhotola munahota nkolongwa Yabine jwa Akakanaane. 24 Akaichilahele ngabhajhendilila kubhehe na makakala hake kumpeta munahota nkolongwa Yabine, ade pibhankomilikiya njwenjwe.