1 Bhando bha likabila lya Efulaimo ngabhakongana akakomana ngondo pamonga na kujhomboka lukemba lwa Yoludane, ngabhaika kwenio ku Zafone. Peniya, ngabhannobholila Yefuta, "Kilebhe ghane mutukemitii jhe tulongohane pamonga kujhenda kukomana na Akaamone? Ngohe natuijhocha mwotu nyumba jhino na mabhene mmi mwenio."

2 Yefuta ngalonge, "Nenga pamonga na bhando bhango tukibha na bhulo nkolongwa na Akaamone. Nanenga pininkemita nhwikite jhe kundangatila. 3 Nenga pinolita kubhehe nhwikite jhe kundangatila, nganyawila changajhoghopa kuwegha kubulana Akaamone, Bhambo Chapanga ngambila uhotolo gwa kwahotola. Kilebhe ghane ngohe miika kubulana na nenga?" 4 Bhahe, Yefuta ngabhakema bhando bhoha bhuku Geleade nu kubulana na Efulaimo. Bhando bha ku Geliade ngabhahotwila kwabula bhando bha Efulaimo. Aka Efulaimo bheniya ndi bhilonge, "Mangota mabhando bhuku Geleade bhinyogholwika kubhoke mu likabila lya Efulaimo nganyenda ku likabila lya Manache." 5 Akageleade ngabhapukila kwa makakala majhomboko gha lukemba lwa Yoludane, kupala kuhibha ndela jha bhando bhuku Efulaimo. Pahikita mundo jwatila ngondo pajhopita kujhomboka kwenio, aka Geleade bhankonyita, "Mwe, bho ma Efulaimo?" Na anda alongii, "Ne jhe," 6 peniya nabhalongela, hajha nnonge ote, "Shibolete," nambo jwenio ulonge, "Sibolete," mana ghake aka Efulaimo mihoto jhe kulonge lilobhe lyenio mbone. Bhahe, ngabhampukila kwa makakala, nu nkukoma kwenio kulyomboko lya lukemba lwa Yoludane. Bhando bhuku Efulaimo elufo alobaine ni ibhele ngabhakomwa kipinde chenio.

7 Yefuta akibha mundo jwahumii kubomane jwa ku Geleade ngabhila kilongoche kwa kipinde cha yaka chita. Ngajhomwika na ngabhanchika kwenio, mu ku muche kwenio ku Geleade.

8 Pajhomwika Yefuta, Ibizane jwaku Betelehemo ngabhila kilongoche jwa Akaichilahele. 9 Jwenio akibha na yana makome matato inalome na yana makome matato ikeghe. Ichikana yake ngaitolanikicha panja na likabila lyake, na ngabhatolila akakeghe makome matato kubhoka mulenge likabila bhatolane na yana yake inalome. Ibizane ngalongwicha aka Ichilahele kwa kipinde cha yaka chaba, 10 peniya Ibizane ngajhomwika ngachikwa kwenio ku Betelehemo.

11 Pajhomwika Ibizane, ngaika Elone jwa likabila lya Chabulone ngalongwicha aka Ichilahele kwa kipinde cha yaka kome. 12 Peniya Ayalone helahela ngajhomwika, ngabhanchika ku Ayalone mu kilambo chuku Chabulone.

13 Pajhomwika Elone, ngaika Abidone mwana jwa Hileli, jwa likabila lya Pilatone, ngabhila kilongoche jwa aka Ichilahele. 14 Abidone akibha na yana inalome makome ncheche, na ichokolo makome matato ihobhokii maponda makome chaba. Abidone ngabhila kilongoche jwa aka Ichilahele kwa kipinde cha yaka nane. 15 Peniya, Abidone ngajhomwika ngabhanchika ku muche ghuku Pilatone mu kilambo chu likabila lya Efulaimo.