1 Kwenio ku Gileade pakibha na mundo jhumo nkomana ngondo jwangajhoghopa, jwakemitwa Yefuta, mwana jwa majhe jhumo nngongola, na tatemundo akemitwa Geleade. 2 Geleade helahela akibha na yana henge kwa nhwanamundo jhukutolana. Kipinde yana ya jwenio pikibha ikolite ngimmenga Yefuta kukunongolela abhoke pakajha peniya, innobholila, "Mwe mmoke mipalwa jhe kubhujhii ilebhe ya tate gwito nhwalo mwe mamwana jwa mwikeghe jhonge." 3 Peniya Yefuta ngabhatila akalongo mundo nu kujhenda kutama kukilambo chuku Tobu. Kwenio bhando bhanganandela ngabhakonganika pamonga na jwenio, ngabhankengima pajhenda.

4 Pikipetita kipinde, bhando bha likabila lya Akaamone ngabhajhenda kukomana na aka Ichilahele. 5 Kipinde cha Akaamone pibhakomina ngondo, ighogholo yuku Geleade ngaijhenda kuntola Yefuta kukilambo chuku Tobu, 6 ngabhannobholila, "Nhwike mutulongoye mungondo jhito na aka Amone."

7 Nambo Yefuta ngabhalobholela ighogholo yuku Gileade, "Bho, chi unjimwita ade kumenga kubhoka kwa akalongo bhango? Ngohe kilebhe ghane nhwikilila kongo mmii miho pyuu?"

8 Ighogholo yenio ngainnobholila, "Chakaka tukammengite, nambo ngohe tung'alambukile mwenga tujhende na twenga tukabulane na aka Amone, nu kubhoke pakwahotola mwe mma makilongoche bhito na bhando bhoha bhuku Gileade."

9 Yefuta ngailobholila ighogholo yene yuku Gileade, "Anda nyawile na mangota na Bhambo Chapanga anda nandangatila kwahotola aka Amone, bho, nenga namaa nakilongoche gwino."

10 Ighogholo yenio ngainobholila Yefuta, "Bhambo Chapanga nabha nchaile jwito, kubhehe twenga natuhenga ngita chitulongile." 11 Yefuta ngalongohana na ighogholo yuku Gileade, nabhene ngabhammeka abhe kilongoche jwabhe. Yefuta ngabhujhila kulonge malobhe ghoha kola ku Misipa palonge jha Bhambo Chapanga.

12 Peniya, Yefuta ngatuma bhando bhajhende kumunahota nkolongwa jwaka Amone kunkonya, "Mwe mmi nabhulo ghane natwenga ade nhwike kutujhingilila kukilambo chito?"

13 Munahota nkolongwa jhuku Amone ngabhajhangwila bhando bheniya kulonge, "Akaichilahele pibhabhujhita kukilambo chuku Michile, ngabhatola kilambo chango kubhoke lukemba lwa Alinone ade lukemba lwa Yaboke pamonga nulukemba lwa Yoludane. Ngohe umbela kilambo chango kwa uteeke."

14 Yefuta ngatumita akatenga kabhele kwa munahota nkolongwa jhuku Amone, 15 ngabhannobholele kubhehe, "Akaichilahele bhakatoi jhe kilambo chaku Moabo hilu kilambo cha Akaamone. 16 Nambo Akaichilahele pibhabhoka ku Michile, bhatyangita munjenga kubhoka kumbwane jhiku Chamo ade ku Kadeshi. 17 Peniya aka Ichilahele ngabhatuma akatenga kwa munahota nkolongwa jhuku Edomo kunnyopa ajheketele bhapeta mu kilambo chabhe. Nambo munahota nkolongwa jhuku Edomo ngakana, bhahe, ngannyopa munahota nkolongwa jhuku Moabo na jwenio helahela ngakanita. Yene aka Ichilahele ngabhaighala ku Kadeshi. 18 Peniya aka Ichilahele ngabhapeta ndela jhukunjenga kutindii kilambo chuku Edomu nikilambo chuku Moabo, ade pibhaika upande ghulihumii lyobha mwa kilambo chu ku Moabo, ngabhabheka kighono kwiye jhilukemba lwa Alinone. Nambo bhakajhingii jhe ku Moabo. Yene lukemba lwa Alinone lukibha ndi mpaka gwa kilambo chuku Moabo. 19 Peniya aka Ichilahele ngabhatuma bhange akatenga kwa munahota nkolongwa Sihone jwaku Amole okwe ku Heshibone, ngabhannyopa ajheketele bhapetele mu kilambo chake kupala bhajhende mu kilambo chabhe. 20 Nambo Sihone akajhaketii jhe Akaichilahele bhapete mu kilambo chabhe. Peniya Sihone ngakonganicha akakomana ngondo bhake pamonga, ngabheka kighono okwe ku Yahasa, ngabhakomina na Akaichilahele. 21 Bhambo Chapanga, Chapanga jwa aka Ichilahele ngabhatangatila Akaichilahele kwahotola Sihone pamonga na akakomana ngondo bhake. Yene Akaichilahele ngabhatola kilambo choha cha Akaamole bhubhatamita mwenio. 22 Ngabhatoila chehemo jhoha jha Akaamole kutumbulii lukemba lwa Alinone ade lukemba lwa Yaboke nu kubhoke kunjenga upande ghulihumii lyobha mwa lukemba Yoludane ade kuupande kulitipikii lyobha. 23 Yene Bhambo Chapanga, Chapanga jwa aka Ichilahele, ngabhabhenga aka Amole kone Akaichilahele bhikilola. Bho, namwe mipala kutupoka kilambo chito? 24 Bho, ngohe chi ntole chela champii kichapanga gwino Kemoshi? Nambo kilambo chochoha Bhambo Chapanga, Chapanga jwito chabhabhengite bhando bhibhakibha bhatamita mwenio, nu kutupe twenga, kilambo chenio ndi chito twenga. 25 Bho, mihambuka mwe mina makakala kumpeta Balake mwana jwa Zipole jwakibha munahota nkolongwa jhukilambo chiku Moabo? Jwenio ataungine jhe na aka Ichilahele hilu kubulana nabho. 26 Kwa yaka miya tato aka Ichilahele bhibhatamita mu muche jhuku Heshibone nu ku Aloele, na chenda yake itindii peniya na miche yoha ibhii muupele jha lukemba Alinone. Kwanike mangota mikombwii jhe chehemo jhenio jhoha? 27 Nenga nemwite jhe kilebhe. Nambo mangota ntenda kulemwa piminyingilila. Bhambo Chapanga ndi nakenga. Jwenio ndi jwahadabula deleno pakate jha Ichilahele na bhando buku Amone." 28 Nambo munahota nkolongwa jwaku Amone ngapuchita nhwalo gwenio gwalobholilwa na Yefuta.

29 Peniya Uhuke gwa Bhambo Chapanga ngihwikilila Yefuta, jwenio ngabhoka kukupete ndela jhiku Geleade na Manache, ngabhujhila ku Misipa mu kilambo chuku Geleade nu kujhendelela kujhenda kukomana na Akaamole. 30 Yefuta ngabheka nachile kwa Bhambo Chapanga kulonge, "Anda nahotwii kwabula akakomana ngondo bha Akaamone, 31 bhahe, jhojhoha jwapakupita panja munyumba jhango anda ngongine nako pambakubhujha kubhoka kwahotola aka Amone, jwenio nabha jwino mwe Bhambo Chapanga. Nanimpiya kwino kubhehe litambiko likukomelekeya."

32 Bhahe, Yefuta ngajhombwika lukemba, ngabulina na aka Amone. Bhambo Chapanga ngabhatenda kwahotola aka Amone. 33 Ngabhahotwila ngatola kwa makakala chenda makome mabhele pakate jha Aloele na chehemo jhitindii Minite na Abele Kelamimo. Bhahe, aka Amone ngabhalepelila hake kwa aka Ichilahele.

34 Yefuta pabhujhita kajhake ku Mizipa, kamwale jwake ngapita panja nu kumbokela, kongo akapeta kuhanganila nukina kwa kuona kang'oma. Kamwale jwenio akibha ndi mwana jhika jhake. Yefuta akibha jhe na mwana jhonge munalome hilu kamwale jhonge. 35 Yefuta pamwonita tugha jwenio kamwale ngakenjwila ngobho yake kwa ungolongonde nu kulonge, "Aka mwanango! Umbomwii mwojho. Mwe ndi kihokola cha malola ghanga ghoha. Ne napile kwa Bhambo Chapanga, nhoto jhe kutwekuu kilapo chango."

36 Na jwenio ngalonge, "Matate anda nnapii kilebhe kwa Bhambo Chapanga, bhahe, mwe militenda ngita chinapii, nhwalo ngohe anhotwiye kwalepechela akamakoko bhino Akaamone." 37 Peniya, ngannobholila tatemundo, "Ninnyopa kilebhe chimo tugha, umbe machiko gha myehe mibhele, nyende na akakoche bhango kukitombe, nikalele kabula jha kuwe kwango, nhwalo niwe changatolana na munalome." 38 Tatemundo ngannyeketila ajhende kwenio kwa myehe mibhele. Na jwenio ngajhenda pamonga na akakoche mundo, ngabhalelita kwa nhwalo ghukujhomwoka kwake changatolana na munalome. 39 Piipetita myehe mibhele ngabhujha ukajha, peniya tatemundo ngantende tela nachile jhake. Kamwale jwenio anawahi jhe kutolana namunalome.

Peniya, ndi ngapabhila nuluhomo londo ku Ichilahele.

40 Kila chaka achikabhale bhuku Ichilahele ujhenda kulela machiko ncheche kukunkombokela bite Yefuta jhuku Geleade.