1 Peniya, ntumiche jwa kunane jwa Bhambo Chapanga ngabhokita ku Geligale nu kujhenda ku Bokimo, nu ngabhapila ujumbe Akaichilahele jhilonge, "Nimoingine ku Michile nu kunneta mu kilambo channaghila akahoko bhino, nnongila kubhehe, ‘Nilitwekuu ng'o lilaghano lyango na mangota. 2 Mangota mangabheka jhe lilaghano na akolo kilambo, mipalwa mitilulana chehemo jhabhe jhukupiikiya litambiko jhichengwitwe.’ Nambo mangota mkannyeketii jhe. Nhwalo ghane nteila naha? 3 Ngohe ninnobholela kubhehe nabhenga jhe akolo kilambo bheniya nambo nabhabha akamakoko pakate jhino, na ichapanga yabhe naibhaha ntambo gwino." 4 Ntumiche jwa kunane kwa Bhambo Chapanga pajhomolila kulonge naha kwa Akaichilahele, bhando ngabhalelita kukuchobhela. 5 Chehemo jhenie ngabhapakemita Bokimo yane kulela na bhene Akaichilahele ngabhampihikiya Bhambo Chapanga litambiko.

6 Bhahe, Yochuwa ngabhatawika Akaichilahele, kila jhumo ngajhenda chehemo jhake jhalaghilwa kuibhujhila kubhehe pake. 7 Kipinde choha cha Yochuwa pakibha ghome, Akaichilahele ngabhantumikila Bhambo Chapanga. Na ata pajhomwika ngabhajhendelila kuntumikila Bhambo Chapanga machiko ghoha ghibhakibha ghome bhala ilongoche bhibhaighalila bhibhalolita ilebhe ikolongwa ya Chapanga yabhatendila Akaichilahela. 8 Yochuwa mwana jwa Nune na ntumiche jwa Bhambo Chapanga, ngajhomwika kongo abhii na yaka miya jhimo na likome limo. 9 Ngabhanchika mu chehemo jhabhaghulilwe kubhehe jhake kwenio ku Timunate helesi mu kilambo cha itombe ya Efulaimo kachikachine jha Gaashi. 10 Peniya, bhando bhoha bha kipinde cha Yochuwa ngakijhomwika nu kupitii bhando bhange bhangannyinamii Chapanga hilu ilebhe yabhatendila bhando bha Akaichilahele.

11 "Peniya, Akaichilahele ngabhateila ilebhe ibhoho palonge jha Bhambo Chapanga, ngabhaijhinamila ichapanga Baale. 12 Ngabhaleka kunnyinamila Bhambo Chapanga, Chapanga jwa akahoko bhabhe jwabhabhoita mu kilambo chuku Michile. Ngabhaighalambukila ichapanga henge iyatindila ibhaijhinamila bhando bhibhatamita pahina jhabhe. Ngabhayomicha Bhambo Chapanga. 13 Ngannyinamila Baale na Maashitoleti nu kunneka kunnyinamila Bhambo Chapanga. 14 Yene, Bhambo Chapanga ngabhayomila Akaichilahele, ngabhateila bhando bhajhingilile na bhapoke ilebhe yabhe. Bhakibha jhe na makakala kabhele gha kukomana na akamakoko ghighatindila. 15 Popoha pibhajhawila kukomana ngabhalepalila nhwalo Bhambo Chapanga akatangatijhe, ngita hela chabhalobholila Bhambo Chapanga. Machiko ghoha ngabhabhila mu malagho hake."

16 Ndi Bhambo Chapanga ngabhajhinula ilongoche bhibhakemitwa akakenga, ngabhakombwila kuhuma kwa akapoka bheniya bhibhajhingilila. 17 Nambo Akaichilahele bhakajhokanii jhe ata ilongoche bheniya, ngabhajhendilila na ngongola kwa kuikengama ichapanga henge nu kuijhinamila. Ngabhaghalambwika papa kwa kuileka ndela ibhateila akatate bhabhe jha kunnyinamii Bhambo Chapanga. 18 Kipinde choha Bhambo Chapanga pabhapelikila nkenga, jwenio Chapanga ngantangatila nkenga jwenio, ngabhakombwila mu ukindendeke gwa akamakoko bhabhe machiko ghoha pibhakibha ghome. Bhambo Chapanga ngabhabhonila kiya pajhohina kulela kwabhe nhwalo gwa mang'ahe nu kubhonelwa. 19 Nambo pajhomwika nkenga, bhando ngabhachochita kubhehe bhanganandela hake kupeta akahoko bhabhe. Ngabhantumikila ichapanga jhenge nu kuijhinamila. Ngabhakanita kuleka ndela jhabhe yanganandela hilu lighoho lyabhe. 20 Yene, Bhambo Chapanga ngachochita kwayome Akaichilahele nu kulonge, "Bhando bha kilambo chenje kitwekwii lilaghano lyamekita na akahoko bhabhe hilu bhijhokanikii jhe chinilonge, 21 niibhenga jhe kabhele bhando bha ilambo yenje yailekita Yochuwa kabula jha kujhomoka. 22 Naniitumila bhando bha ilambo yenio kwajhigha Akaichilahele kupala nole anda nabhantembekeya Bhambo Chapanga ngita chibhateila akahoko bhabhe." 23 Bhahe, Bhambo Chapanga ngailekita bhando bha ilambo yenio, hilu Yochuwa akaibhekitii jhe mu kindendeke gwa Yochuwa.