1 Akaichilahele kabhele ngabhajhendilila kutenda ghanganandela palonge jha Bhambo Chapanga, yene Bhambo Chapanga ngabhalekita bhang'ahichwe na bhando bhuku Midiane kwa yaka chaba. 2 Akamidiane ngabhang'ahicha hake Akaichilahele, bhahe, Akaichilahele ngabhatilila kwiitombe nu kujhobha mu mikwembe. 3 Pipipi aka Ichilahele pibhapandita mbejho yabhe, akakomana ngondo bha aka Midiane na Akameleke na bhange bhando kuhumii kulihumii lyobha ngabhakijhingilila kilambo chabhe. 4 Akakomana ngondo bheniya ngabhabhekita kighono pahina na kilambo chenio nu kwajhingilila. Ngabhahangabhina kila kilebhe mu kilambo chenio ade pahina nu ku Gacha, ngabhakomita mambelele na ng'ombi na maponda. 5 Bhahe, akamakoko bhakibha bhahikita kila chaka, bhakibhana ipugho na lihema yabhe ngita nchambe gwa madidima. Ikibha chepa kwabhalanga bhando na ngamiya yabhe, ngabhakijhingilila kilambo kukihangabhana. 6 Akaichilahele bhakibha manga makakala na akahocho kwa Akamidane, yene Akaichilahele ngabhanelila Bhambo Chapanga kupala kwatangatila.

7 Akaichilahele pibhannelila Chapanga kupala ammokeya mang'ahe ku nhwalo gwa aka Midiane, 8 Bhambo Chapanga, Chapanga jwaku Ichilahele, ngantumita nnondole jwa Chapanga ngabhalobholila, "Nimmohite mangota kukilambo chumikibha kubhanda ku Michile. 9 Nganinkombwila mu mabhoko gha aka Michile bhoha bhibhang'ahita. Nganabhengita kutale bhando bheniya nu kumpela mangota kilambo chabhe. 10 Peniya, nganinnobholila kubhehe, ‘Ne ndi Bhambo Chapanga, Chapanga gwino mangaijhinamii jhe ichapanga ya Akaamole, ngohe kilambo chabhe mitama. Nambo makajhokanikii jhe lilobhe lyango.’ "

11 Ntumiche jwa kunane kwa Bhambo Chapanga ngaika nu kutama pahe jha nkongo nkolongwa ghukemwa mwalone kwenio ku Ofula, nkongo gwenio ukibha gwa Yoashi mundo jwa lukolo lwa Abiezele. Na Gidione akibha ajhembiluya ngano mu kilibha chukuminyii chabibo kukukihiya Akamidiane bhangammona jhe. 12 Yene, ntumiche jwa Bhambo jwa kunane kwa Chapanga ngampitila Gidione nu kunnobholela, "Bhambo abhii na mwenga, mangajhoghopa jhe!"

13 Gidione ngajhanyangwila, "Anda chakaka Bhambo abhii na twenga, ghanga ghahumii koke? Ibhii koke itendwa yake ikolo ibhatuchimulila akatate bhito pibhalongila, atubhohite ku Michile? Nambo ngohe Bhambo Chapanga atulekite aka Midiane bhatung'ahe."

14 Bhahe, Bhambo Chapanga jwene ngang'alambwika nu kunaghalikiya Gidione, "Kwa makakala ghanga, nnyende makakombole aka Ichilahele kubhoka kwa aka Midiane."

15 Gidione ngajhangwila, "Bhambo Chapanga bhango, bho, nanakombola bhole aka Ichilahele? Lukolo lwango luleghelike hake na akahocho mu likabila lya Manache, nenga ndi kilebhe nacho kwa akalongo bhango."

16 Bhambo Chapanga ngannobholila, "Namma pamonga na mwenga kuntangatila. Namakomelekeya aka Midiane ambuka lipepetai, ngita mundo jhumo."

17 Gidione ngannyangwila, "Anda chakaka yenio, bhahe, nnangiye nginyililo kubhehe mwe ndi ma Bhambo Chapanga jhumilonge na nenga. 18 Mangaheghe jhe pamba, ade pumbakubhujha nu kunnete litambiko lyango."

Bhambo Chapanga nganyangwila, "Naninendela ade pumpa kuhika."

19 Gidione ngabhujhita kajhake, ngalenganikiya litohe lya mbuhe na mabumunda ghangaleke ngedule kubhoka mu kibhegha cha ukobha, ngatoila nyama nukubheka mukikapo na mito mukibhegha ngannetila Bhambo Chapanga, ngabhekita pahe jha nkongo gwa mwalone. 20 Ntumiche jwa Bhambo jwa kunane kwa Chapanga ngannobholila, "Ntole nyama na mabumunda ghangaleke ngedule mmeke palindalabho lende na mito nnyitilila nyama na mabumunda." Gidione ngateila ngita chalaghalikilwe. 21 Yene, ntumiche jwa Bhambo jwa kunane kwa Chapanga ngapapiya nyama na mabumunda ghenio kwa nkongocho gwenio. Papa mwotu ngupitila mu lindalabho lyenio, ngautiniya nyama na mabumunda na peniya ntumiche jwenio ngahobhalila.

22 Peniya, Gidione ndi pamanyita kubhehe jwenio akibha ntumiche jwa Bhambo Chapanga jwa kunane kwa Chapanga, ngalonge, "Nanola choto namwene, mwe Bhambo Chapanga, nhwalo nimwene ntumiche gwino kwa miho ghango namwete."

23 Nambo Bhambo Chapanga ngannobholila, "Uteeke ubhaha na mwenga. Mangapwelela jhe, chakaka miwe jhe." 24 Bhahe, Gideone nganchengila Bhambo Chapanga chehemo jha kupiya litambiko kwenio na ngaikemita Yehova Shalomu yane, "Bhambo Chapanga ndi jhu uteeke." Chehemo jhene jha kupiya litambiko ibhii kwenio ku Ofula, ku muche gwa lukolo lwa Akabiezele, ade deleno.

25 Kilo jhejhe Bhambo Chapanga ngannobholila Gidione, "Ntole ng'ombi nkambako jwa tate gwino, na ng'ombi jhonge jwabhii na yaka chaba. Na peniya ntilulane chehemo jha kupiya litambiko jhichengwitwe na Baale yaijhinamila tate gwino nkajhulane inyagho yoha ya Ashela ibhii pahina jhino. 26 Peniya ntola maghanga unjengela nenga Bhambo Chapanga, Chapanga gwino, chehemo jhukupiikiya matambiko jhambone chehemo jhenje pipajhinwike. Peniya umbihikiya litambiko lyu kukomelekeya lya lipongo lela kongo hanjo ibhaha kinyagho cha Ashela." 27 Bhahe, Gidione ngatoila akatumiche bhake kome, ngateila ngita chalobholilwe na Bhambo Chapanga. Nambo ajhogwipa akalongo mundo na bhando bhubhabhii kubomane apata atende muhe nambo jwenio ngateila kilo.

28 Akolo muche pibhajhimuka putepute, ngabhaibhona chehemo jhukupiikiya matambiko jha Baale na kinyagho cha Ashela kikibha pahina jhake kitilulinwe. Lipongo jwa ubhele jwakakomilikilwe chehemo jhukupiikiya matambiko jhikibha ichengwitwe chehemo jhenio. 29 Bhene ngabhakonyina, "Meneke jwatei naha?" Pibhalingukiya ngabhamanya kubhehe Gidione mwana jwa Yoashi ndi jwatei gheniya. 30 Akolo muche bheniya ngabhannobholila Yoashi kubhehe, "Tumpala mwana gwino tunkome, nhwalo atiluline maghanga gha chehemo jhukupiikiya matambiko jha Baale na kukajhulana kinyagho cha Ashela kikibha pahina jhake."

31 Nambo Yoashi ngaulobholila nchambe ghola, "Bho, mangota mkengelela Baale? Bho, mangota namkoombola? Mundo jhojhoha jwapakunkengelela nakomwa uhiko ghongoneghone. Anda chakaka Baale ndi Chapanga, bhahe, akikengelela jwene, nhwalo chehemo jha kupiikiya matambiko ghake, ipondomwike." 32 Lichiko lyenio bhando ngabhankema Gidione Yelubaale, nhwalo, "Baale akikengelela jwenio, nhwalo Gideone ahipondomwile chehemo jhake jhukupiikiya matambiko pa ichapanga Baale."

33 Bhahe, Akamidiane na Wamaleke na makabila ghange ghuupande ghulihumii lyobha ngabhajheketilana kujhenda kungondo pamonga. Ngabhajhomwika kwiye jha lukemba Yoludane nu kubheka ighono yabhe mululambo lwaku Yezileele. 34 Nambo uhuke gwa Chapanga nganhikila Gidione, nganhonita lipenenga kwakema bhando bhu lukolo lwa Akabiezele bhankengame. 35 Ngatuma bhando bhajhende mu kilambo cha Akamanache kwakema. Na bhange bhando ngabhatumita kwakema bhando bha likabila lya Ashele na Akachabulone na Akanafutale, bhoha ngabhaika kukongana nabho.

36 Peniya, Gidione ngannobholila Chapanga, "Anda chaka naundumila, kwakombola Ichilahele kupete nenga, 37 ngohe nibheka limbendela lya limbelele pakupulukiya ngano. Anda napabhaha na mangame palimbendela tu, na pahe patepetii jhe, namanya kubhehe mwenga namaghombola Akaichilahele kupete nenga ngita chinnalaghila." 38 Yene ndi chitendika, Gidione pajhimwika lukela, ngambukwita mangame ghighatepitii limbendela, ngatweliya mu bakule. 39 Peniya, Gidione ngannobholila Bhambo Chapanga, "Chonde Bhambo mangayome jhe, nambo nyopa nnonge lilobhe lende, uneke ndumii limbendela lende kwa lenge lijhighinikilo. Limbendela lende lyangatepete jhe, nambo pahe pabhaha na mangame twe. 40 Chapanga ngateila yenio uhiko gwenio, limbendela ndo likibha lijhomo nambo nnema ghoha ukibha chwii mangame."