1 Akaichilahele bhakatei kulapila pibhakibha ku Misipa nnonge jha Bhambo Chapanga kubhehe, "Abhii jhe mundo pakate jhabhe jwapakujheketela mwana mundo mwikeghe antolanikicha nu munalome jwa likabila lya Benjamine." 2 Badala jha ngondo jhenie bhando, ngabhajhenda ade ku Betele, ngabhalelita kwa lipyanda likolongwa palonge jha Bhambo Chapanga ade kimiye. 3 Bhalongila, "Mwe ma Bhambo Chapanga, Chapanga jwaku Ichilahele, nhwalo ghane kipitii kilebhe chenje? Bho, kilebhe ghane likabila lyaka Benjamine lihobhalile pa Ichilahele pano?"

4 Kilabho jhake bhando ngabhajhimwika putepute, ngabhachenga chehemo jhu kupiikiya matambiko gha ghukukomelekeya pamonga na matambiko gha uteeke. 5 Peniya Akaichilahele ngabhakonyina, "Bho, pakate jha makabila ghoha gha aka Ichilahele kibhii, kikunde chochoha changaika kukongana pamonga pangongano jhitendika nnonge jha Bhambo Chapanga?" Nhwalo bhakatei kulapii kulonge, mundo jhojhoha anda akotwike kukongana nnonge jha Bhambo Chapanga kwenio ku Misipa, ipalwa akomwa. 6 Nambo aka Ichilahele ngabhabhonila kiya akalongomundo bha likabila lya aka Benjamine, ngabhalonge, "Deleno likabila limo lya aka Ichilahele lihobhalile. 7 Ngohe natutenda bhole kupala kwapela akakeghe bheniya akanalome bha likabila lya aka Benjamine bhibhaighilile? Nhwalo ngatulapila kwa liina lya Bhambo Chapanga kubhehe twileka jhe yana ito ikeghe itolane na aka Benjamine!"

8 Ngabhapala kumanya kubhehe, anda kikibha kikunde chochoha cha likabila lya aka Ichilahele lyangajhenda pangongano nnonge jha Bhambo Chapanga ku Misipa. Ngabhamanya kubhehe akibha jhe mundo kubhoke ku Yabeshi Geleade jwakaika pangongano jhenie. 9 Akaichilahele pibhabhalingwa ku Misipa akibha jhe mundo jhojhoha jhuku Yabeshi Geleade jwakaikite pangongano jhenio. 10 Yene, aka Ichilahele bhoha ngabhapelika akakomana ngondo bhibhamanya kukomana maha elufo kome niibhele bhibhakibha mapunde bhukukomana, ngabhalaghila kulonge, "Nnyendangane makakome akolo muche bhuku Yebeshi Geleade, akakeghe pamonga na yana yabhe. 11 Helahela makakoma akanalome na akakeghe bhoha bhibhawaite kugholoka na munalome." 12 Kwenio ku Yabeshi Geleade ngabhakole akakeghe miya ncheche bhinagholoka jhe na munalome jhojhoha, ngabhapelika pa kighono chabhe ku Shilo mu kilambo chuku Kanaane.

13 Peniya, Akaichilahele bhibhakongina kwenio ngabhapelika lilobhe kupala kubhehe teeke kwa bhando bha likabila lya Benjamine bhibhakibha mulindalabho lyaku Limone. 14 Akanalome bheniya bha likabila lya Benjamine ngabhabhujhila ajhabhe bheniya kipinde cheche. Bhahe, ngabhakamwiya akakeghe bheniya bhibhapata kukomwa, kwenio ku Yabeshi Geleade. Nambo akakeghe bheniya bhakakwelite jhe.

15 Akaichilahele ngabhabhonila kiya bhando bha likabila lya Benjamine, mana Bhambo Chapanga pakaighii pandina kulihobhecha likabila lya Benjamine pakate jha aka Ichilahele. 16 Peniya ilongoche bhoha bhibhakibha pangongano jhenio ngabhalonge, "Ngohe natutenda bhole kupala kwapekeya akakeghe, akanalome bhibhapelwii akakeghe mana akakeghe bhoha bha likabila lya Akabenjamine bhakomitwe? 17 Ipalwa ngohe, akanalome bhoha bhibhaighilii bha aka Benjamine bhapate akakeghe kupala bhabhelekane, lyangahobhele jhe likabila lyolyoha pa Ichilahele. 18 Nambo twatolanikicha jhe yana ito, mana tukalapile kubhehe mundo jhojhoha jwapala kuntolanikicha likabila lya aka Benjamine, mwana gwake mwikeghe abhaha na likoto."

19 Bhahe, ngabhakombwika kubheka unyagho jhikumpe ichima Bhambo Chapanga ghutendika kila chaka ku Shilo, muche ghubhii upandi gwa kachikachine jhuku Betele, nuupandi gwa kuchine, kundela ngolongwa jhibhoke ku Betele kujhenda ku Chekemo, ukibha ubhandikile. 20 Yene ngabhalaghila akanalome bha Akabenjamine, kulonge, "Nnyendangane makajhobhela mu mighonda jha michabibo. 21 Mma miho. Achikabhale bhuku Shilo pibhapata kupeta panja kuina kipinde cha unyagho, mpita mu michabibo na kila mundo antola kamwale abha nhwanamundo. Peniya mmujha mu kilambo chuku Benjamine. 22 Akatate bhabhe amu akahacha bhabhe anda abhaikite kutukokolekeya tulongela, ‘Twe natwajhopa makole kiya bhando bhuku Benjamine na maleke akakeghe bheniya bhatole, mana ngondo jhuku Yabeshi Geleade twapatangine jhe achikabhale bhakwape bheniya. Na nhwalo mabhene bhapii jhe achikabhale bhino, mmii jhe ni lilemwa.’ "

23 Bhahe, akanalome bha likabila lya Benjamine ngabhateila yenio, kila mundo ngakiaghulila kamwale pakate jha achikabhale pibhapitita panja kuina, kwenio ku Shilo nu kuntola kubhehe nhwanamundo. Peniya, ngabhabhujha kajhabhe, ngabhachenga chenda yabhe kabhele nu kutama mwenio. 24 Machiko ghagha aka Ichilahele ngabhabhoka, kila mundo ngabhujha chehemo pi likabila lyake na akalongo mundo. Kila mundo ngabhujha chehemo jhibhammaghulile kubhehe jhake.

25 Kipinde chenie pakibha jhe munahota nkolongwa mu kilambo chuku Ichilahele. Kila mundo ngaoto kuhenga chikipala nu kubhehe tela tugha.