1 Bhamba ndi bhando bha ilambo yailekita Bhambo Chapanga kupala yajhighe Akaichilahele bhangakomana ngondo jhojhoha mukilambo cha Kanaane. 2 Ateila naha kupala kuibhola ibheluko ya Akaichilahele ngondo, achwa ibheluko yela yangakomana ngondo kuhumii makacho. 3 Bhamba ndi bhando bhabhalekita Bhambo Chapanga, akanahota akakolongwa nhwano bha Akafilichite na Akakanaane bhoha na Akachidone na Akahite bhibhatamita muitombe ya ku Lebanone kuhumii mukitombe chuku Baal Helumone ade Lebo Hamathe. 4 Bhalekitwa bhando bha ilambo yenio bhajhigwe kupala alole pange nabhatembekeya mihilo jha Bhambo Chapanga, yabhalaghila akahoko bhabhe kupete Mucha. 5 Akaichilahele ngabhatama panakate jha Akakaanane na Akahite na Akaamole na Akapeliche na Akayebuche. 6 Akaichilahele ngabhaitolikichina yana yabhe ikeghe na inalome na helahela bhijhinamila ichapanga yabhe.

7 Bhahe, Akaichilahele ngabhanyewita Bhambo Chapanga, Chapanga gwabhe ngabhatenda ghanganandela na kuijhinamii inyagho ya Baale na Maashitole. 8 Bhahe, Bhambo Chapanga ngabhayomila hake Akaichilahele, nganteila munahota nkolongwa Kushane Lishataimo jwaku Mesopotaniya bhabule na bheniya ngabhantumikila kwa kipinde cha yaka nane. 9 Peniya Akaichilahele pibhannelila Bhambo Chapanga, Bhambo Chapanga ngahaghulilwa Otiniele mwana jwa Kenaze unnung'una mundo Kelebo kubhehe nkombola. 10 Uhuke gwa Bhambo Chapanga ngaikila Otiniele, yene ngabhila kilongoche jwa Akaichilahele. Peniya, ngajhenda kukomana ngondo na munahota nkolongwa Kushane Lishataimo jwa ku Mesopotaniya na Bhambo Chapanga ngantangatila Otiniele kunhotola Kushane. 11 Yene kilambo ngakibhila teeke kwa yaka makome ncheche. Peniya Otiniele mwana jwa Kenaze, ngajhomwika.

12 Bhahe, Akaichilahele ngabhatumbwla kabhele kuntembekeya Bhambo Chapanga kukutenda uhakaho, yenio Bhambo Chapanga ngabhatenda bhalepelele na munahota nkolongwa Elugone jwa ku Moabo kupala bhahotole Akaichilahele. 13 Munahota nkolongwa Elugone ngabhatoila Akaamole na Akaamaleke pamonga, ngabhajhenda kukomana na Akaichilahele, ngabhahotwila. Ngabhaupukila muche gwa mikongo jha Mitende, liina lenge ukemitwa Yeliko. 14 Munahota nkolongwa Egulone jwaku Moabo ngabhantumikila Akaichilahele kwa kipinde cha yaka kome na nane.

15 Peniya Akaichilahele ngabhannelila kabhele Bhambo Chapanga, jwenie ngabhapila nkombola Ehude mwana jwa Gela jwatumii lubhoko lwa ngejha jwa likabila lya Benjamine. Akaichilahele ngabhantumila munahota nkolongwa Elugone jwaku Moabo, apeleke hupo yabhe. 16 Ehude ngakitengenichila upanga ghutema kone na kone, kutandamala kwake chentimita amuchine, ngalibhilingilila lijambiya lyenio mulubhoko lwake lyulelo. 17 Peniya, ngampelikila Elugone munahota nkolongwa hupo yela. Jwenio Elugone akibha nkendaho hake. 18 Ehude pajhomolila kupiya hupo, ngabhalobholila bhando bhibhagheghita hupo bhala bhakelebhuke kajha. 19 Nambo Ehude paikita painyagho yukubhachwa ya maghanga pahina na ku Geligale, ndi ngabhujhita kwa Elugone nu kulonge, "Mwe munahota, mbala kunpwepwe nhwalo."

Munahota nkolongwa ngabhalaghalikiya akatumiche bhake, "Mpite panja!" Na bhena akatumiche, ngabhapita panja.

20 Bhahe, Ehude nganheghilila pakatamite muchumbe chukugholofa chikipepete malile kipinde cha kilangache nu kunobholela, "Mmii nu lupwepo kubhoka kwa Chapanga." Munahota nkolongwa jhola ngajhemita. 21 Ehude ngahulumwila upanga kwa lubhoko lwake lwangejha kubhoka mulibhondo lyalelo, nganhochita mulutumbo lwa Elugone, munahota nkolongwa. 22 Lijambiya ngalijhingiya na kipitika chake pwete, ngaupitila kuyeto kung'ongo. Ehude ngaulumwila na mahuta ngaghajhengilila mu lijambiya lyenio. 23 Peniya Ehude ngapita panja, ngadinda milyango jha chumbe chenio kwa pungolo. 24 Ehude pabhokita, akatumiche bhake munahota nkolongwa ngabhahika nu kukole milyango jha chumbe idinditwe kwa pungolo, ngabhalongila, "Pange abhii kucholo." 25 Bhahe, ngabhalendila ade ngabhabhila na kiholo. Milyango adindu jhe, ngabhatola upungulo kujhoghola. Dola ngabhankole munahota gwabhe abhii ngula, ajhomwike.

26 Pibhannendelila pala, Ehude nganyogholwika. Na paikita piinyagho yamaghanga, nganyogholwikila ku Seira. 27 Pahikita kwenio, ngahonita lipenenga mu kilambo cha itombe ya ku Efulaimo, Akaichilahele ngabhahelila pamonga na jwenio kongo jwenio abhalongwicha. 28 Ngalongila, "Ungengame nenga, nhwalo Bhambo Chapanga andangatile kwahotola akamakoko bhino Akamoabo." Kuyene Akaichilahele ngabhankengima Ehude ade palyomboko lya Yoludane nu kukipukila chibhajhombwika Akamoabo, ngabhaibhila mundo jhojhoha angajhomboka jhe. 29 Kipinde chenio ngabhakomita akakomana ngondo elufo kome bhibhakibha na makakala na bhangajhoghopa, abhii jhe ata jhumo jwakanyogholwike. 30 Lichiko lyenio, Akaichilahele ngabhahotwila Akamoabo. Yene kilambo ngakibhila teeke kwa kipinde yaka kome na nane.

31 Pajhomolila Ehude, mwana jwa Anate, ngahika Shamugale ngatola pwache jhake. Jwenio ngabhakoma Akafilichite miya chita kwa luyato lulunyenyike. Hele ngabhakombwila Akaichilahele.