1 Bhahe, bhando bha likabila lya aka Efulaimo ngabhankokolikiya hake Gidione, "Kilebhe ghane mututendi naha? Nhwalo ghane mukatukemiti jhe punkomina na Akamidiane?"

2 Nambo Gidione ngabhajhangwila, "Chindei nenga kilebhe nacho anda npemite ghala ghuntei mangota. Chela kichokombe chibhatei akakomana ngondo bhino aka Efulaimo ndi kikolongwa kuliku chitutei twenga bha lukolo lwa Abiezele. 3 Chapanga antehi mangota kwahotola ilongoche ya Akamidiane Olebo na Zeebo. Ne kibhii jhe chindei kumpeta mangota. Palongila naha Gidione, lilaka lyabhe lijhakubhehe temutemu."

4 Bhahe, Gidione na ajhake miya itato bhala ngabhahika Yoludane, ngabhajhombwika pamonga nu kutotokela hake, ngabhajhendilila kwakengama akamakoko bhabhe. 5 Yene, Pibhaikita ku muche gwa ku Sukote ngabhalobholila bhando, "Apela chukulya bhando bhamba bhinongohine nabho nhwalo bhatotokii hake, na nenga nijhendelela kumpalaha akakolongwa bhuku Midiane Azeba na Asalimuna."

6 Nambo ilongoche yuku Sukote ngabhankonya, "Nhwalo gwa nike twape chakulya kone munanhoto jhe munahota nkolongwa Zeba na Salimuna?"

7 Gidione ngajhangwila, "Tela nambo Bhambo Chapanga papakundangatila kwakamula, Azeba na Salimuna nangelebhuka nabho pamba, na nenga naniichwapula yegha jhino kwa mibha jha ku njenga!" 8 Pabhokita ku Sukote, Gidione ngajhenda ku Penuele, ngajhopita chukulyegha. Nambo ngabhanyangwila ngita hela chajhangwilwa na bhando bhuku muche gwa ku Sukote. 9 Bhahe, Gidione ngalongila, "Pumbakubhujha njelembo, naniutilula nnala ghongo!"

10 Zeba na Salimuna bhakibha kwenio ku Kalikole pamonga na akakomana ngondo bhabhe elufo kome nuhwano, akakomana ngondo bhibhakahighalike upandi ghulihumi lyobha, nhwalo akakomana ngondo Lake jhimo na elufo ichiline ngabhakomitwa. 11 Bhahe, Gidione ngapetila ndela upande ghulihumii lyobha mwa muiche jha ku Noba na ku Yoghibeya kwajhingilila akakomana ngondo bheniya kwa kwapwitikilila. 12 Akanahota akakolongwa bhuku Midiane, yane Azeba na Asalimuna ngabhanyogholwika, nambo Gidione ngabhabhutukila nu kwakamula, na kwatenda akakomana ngondo bhabhe bhoha kubhehe nikiholo hake.

13 Peniya, Gidione mwana jwa Yoashi ngakelebhuka kuhuma kungondo ngapetila mwijhinuko ya Helese. 14 Ngankamwila kangombo jhumo jwaku Sukote nu kunkonyekeya mahina gha ilongoche. Kangombo jwenio nganyandikila maina gha ilongoche imanyikina hake pamuche, ilongoche yoha ikaikii chabine na chaba. 15 Gidione ngakelebhwika kabhele ku muche gwa Sukote nu kulonge, "Bho, mikomboka chunighita nenga punongila, ‘Nhwalo ghane twape chakulya bhando bhino bhibhatotokii hake bhina njala kone munanhoto jhe Zeba na Salimuna?’ Dola, Zeba na Salimuna bhamba." 16 Peniya, ngabhatola ilongoche bha muche gwenio na kwabula kwa mibha jhuku njenga kupala libhaha libholo kwa bhando bhoha bhu ku Sukote. 17 Helahela ngajhawila ku muche na kutilulina nnala ghuku Penuele na kwakoma akakolo kilambo bha kwenio.

18 Peniya, ngabhankonya Zeba pamonga na Salimuna, "Bho, bhando bhimakoma ku Tabole bhakibha bhando ghane?"

Ngabhajhangwila, "Bhakalandine na mwenga, nhwalo ibhonikina ngita yana ya munahota nkolongwa."

19 Gideone ngajhangwila, "Yenio ndi ikibha inung'una yango, lutumbo lumo nanenga. Napila kwa Bhambo Chapanga jwabhii ghome kubhehe, anda namkwakoma jhe, nane helahela nganikomite jhe mangota." 20 Peniya ngannobholila Yetele mwana jhulitibho, "Nnyeme, makome." Nambo Yetele ateila kujhoghopa kutola upanga gwake nhwalo akibha amela mwana.

21 Bhahe, Zeba pamonga na Salimuna ngabhalonge, "Mutukome mwenga, mabhene nhwalo lihengo lyene lya mundo munahota." Jwenio Gideone ngabhakoma na kutola ilekaleka ikibha mu mitandala jha ngamiya yabhe.

22 Peniya, aka Ichilahele ngabhannobholila Gideone, "Mwenga mma kilongoche jwito, nu kubhoke pukuwe nilongocha ibheluko ino, nhwalo mwe mutukombwile mu makakala gha aka Midiane."

23 Gideone ngajhangwila, "Nenga nibhe jhe kilongoche gwino hilu mwanango abhe jhe kilongoche gwino, nambo Bhambo Chapanga ndi nabha kilongoche gwino." 24 Yene ngabhalobhalila, "Ninnyopa kilebhe chimo, kila mundo ambe ndololo impokita." Akamidiane bhakibha ngita Akaichumaile na bhando bhange bhibhatamita kunjenga bhawalita ndololo ya chaabo.

25 Bhando bheniya ngabhajhangwila, "Natumpela kukuhengwa mwojho." Ngabhajhanjiya ngobho yabhe nu kubheka mwenio kila mundo ndololo yapokita Akamidiane. 26 Kutopa kwake ndololo yenio ikibha kilo makome mabhele. Pamonga na yenio ikibha ilebhe henge ngita ilebhe ya bei ngolongwa na ngobho ya chambalao yukuwala munahota nkolongwa jhuku Midiane na mikufo jhukuwalicha ngamiya yabhe. 27 Gideone ngatumila chaabo yenie ngatenginichila kinyagho ngabheka pikilambo chake chuku Ofula. Akachilahele bhoha ngabhajhenda kukijhinamila chenio. Ngikibhila ntambo kwa Gideone pamonga na akalongomundo.

28 Peniya aka Midiane ngabhannepilila njwe na bhakibha jhe kabhele kingobhahe kwa aka Ichilahele. Kilambo chuku Ichilahele ngikibhila njelembo kwa kipinde cha yaka makome ncheche.

29 Gideone, liina lenge Yelu Baale, mwana jwa Yoashi ngakelebhuka kajhake nu kutama kwenio. 30 Gideone akibha na yana inalome makome chaba, nhwalo akatolii akakeghe twe. 31 Akibha na kilaghe mu kilambo chuku Shekele ngampapii mwana munalome liina lyake Abimeleke. 32 Gideone mwana jwa Yoashi ngajhomwika pakibha na yaka ndiii, ngabhanchika umambe jha Yoashi tatemundo, mu kilambo cha Ofula mu lukolo lwa Akabiezele.

33 Machiko ghandina tugha pukujhomwoka kwake Gideone, aka Ichilahele ngibhabhujhila kabhele ichapanga Baale nu kuijhinamila. Ngabhantenda Baale Belite kubhehe kichapanga chabhe. 34 Akaichilahele ngabhannyewita Bhambo Chapanga, Chapanga jwabhe, jwabhakombwila kubhoka kwa akamakoko bhabhe twe bhibhakibha bhatindikiye kila upandi. 35 Kabhele, bhatendii jhe ghambone akalongo bha Yelu Baale yane Gideone pamonga najwenio Gideone akatendii ghambone twe kwa aka Ichilahele.