1 Pughapetita machiko ghandina, kipinde cha mahuno gha ngano, Samusone ngatola litohe lya mbuhe, ngajhenda kuntyangii nkohano mundo. Ngannobholila nkohano mundo munalome kubhehe, "Mbala kujhingii kuchumbe cha aanabhango nakabhone."

Nambo nkohano mundo ngankanikiya.

2 Nkohano mundo munalome ngannobholila, "Nenga ambwika mpala jhe kabhele. Yene nganitolanikicha na nkoche gwino. Ata yene akwete nnung'umundo abhii lembulembu kumpeta jwenio. Chonde muntolele jwenio." 3 Samusone ngalonge, "Mwanja ghongo mbahijhe kukokolekelwa kwa ghala ghimbakwatende Akafilichite." 4 Peniya, Samusone ngajhenda nu kughakamuu mabweya miya tato ngatabha mikela jhabhe pamonga bhabhele bhabhele. Bhahe, ngabheka limbolembole mu mikela jha kila mabweya mabhelemabhele ghighatabhitwe. 5 Peniya, ngapamba mambolembole gheniya na ngaghalekekiya mabweya gheniya, ngaghajhingii mu mighonda jha Akafilichite nu kutiniya ngano jhihunitwe na ngano yangaunwa pamonga na mighonda jha micheitune. 6 Akafilichite pibhapala kumanya meneke jwatei gheniya, ngabhalobholilwa, "Ndi Samusone, nkohano mundo Ntimuna, ateila gheniya kwa nhwalo nkohano mundo antohi nhwana mundo na kuntolanikicha kwa kangombo jhumo, jwakibha nkoche mundo jwakibha njeche gwake." Yene, Akafilichite ngabhajhenda kwakoma kwajhocha mwotu mukeghe jwenio pamonga na tatemundo.

7 Samusone ngabhalobholila Akafilichite bheniya, "Gheniya ghunteiline ne napii kubhehe nibhoka jhe pamba ade nepechele ghunteile." 8 Peniya Samusone ngabhajhingilila na kwakoma bhando twe hake. Peniya, ngajhenda kutama kulinkwembe lya lighanga likolongwa kweno ku Etamo.

9 Akakomana ngondo bha Akafilichite ngabhaika na kubheka kighono chabhe mu kilambo chuku Yuda ngabhajhenila ade ku muche ghuku Lehi. 10 Bhando bhuku Yuda ngabhakonya, "Kilebhe ghane chimutubulila twenga?"

Akafilichite ngabhajhangwila, "Tuikila kuntabha Samusone nukuntende ngita chatutendii twenga."

11 Peniya, bhando elufo itato bhuku Yuda ngabhanyendilila Samusone kwenio kulinkwembe lyaku Etamo ngabhannobholila, "Bho, umanye kubhehe Akafilichite bhitulongocha twenga? Nnola mabhene uloche ghongo!"

Samusone ngajhangwila, "Anda chibhandendii na ndi chanatendii nenga."

12 Ngabhannobholila jwenio, "Tuikite kuntabha kupala tunhikiche kwa Akafilichite."

Samusone ngalonge, "Nnapila mabhene kubhehe mangota mingoma jhe."

13 Bhene ngabhalongila, "Twenga tunkoma jhe, nambo tupakuntabha tu nukumpeleka kwabhe." Peniya ngabhantabha ngojhe ibhele nhyono nu kumpiya mwenio mulinkwembe.

14 Pibhaikita ku muche gwa ku Lehi, Akafilichite ngabhanyendilila mbelo kone bhichobhela. Kipinde cheche kihuke cha Bhambo Chapanga ngikinhikilila Samusone kwa makakala na ngojhe ikibha bhantabhite mu mabhoko ghake ngitopwika ngita ngobho nhuo chikitinika mwotu na ibatane yenio ngaghagwelila pahe. 15 Samusone ngalokwita liupa libhehe li lijhegho lya pahe li liponda na kwabulii bhando na kwakoma bhando elufo jhimo. 16 Peniya Samusone ngalonge,

"Kwaliupa li lijhegho li liponda ngomite bhando elufo jhimo.

Kwaliupa li lijhegho li liponda, natei kubhehe lilundo ngita maponda ghighawile."

17 Pajhomolila kulonge gheniya, ngataghita liupa lyenio pahe. Chehemo jhenio ngapakemwa Lamate Lehi, mana ghake kitombe chi liupa li lijhegho.

18 Peniya Samusone ngabhe na nyota hake. Ngannyopa Bhambo Chapanga, kulonge, "Mwe ma Chapanga, mwenga ndi jhumbila kwahotola. Bho, ngoheno umbakunneka nyomoke kwa nyota nu kutolwa kwa makakala na Akafilichite akahongo bhano?" 19 Chapanga ngayekwila libhomba palutope kwenio ku Lehi, mache ngaghapitita. Samusone nganywila mache gheniya na makakala ghake ngaghabhujhilina. Chembwe chenie ngikikemwa Ene Hakole, mana ghake ndi chembwe cha mundo jwakema kupala atangatilwe na chembwe chenie kibhii kwenio ku Lehi ade deleno.

20 Yene Samusone ngabhila nkenga jhuku Ichilahele kwa kipinde cha yaka makome mabhele, kipinde chenie Akafilichite bhalongwicha kilambo chenio.