1 Kipinde chenio pakibha na mundo jhumo jwa kilambo chu itombe ya ku Efulaimo, liina lyake Mika. 2 Lichiko limo ngannobholila majhe mundo, "Majhe nganyoina munnapanikiye jwannyibhila ipande elufo jhimo na miya jhimo ya madine gha feza ijhibhitwa, madine gheniya ghabhii nanenga, dola nakatoi nenga." Nenga ndi jhungwatwila.

Majhe mundo ngannobholila, "Mwanango, Bhambo Chapanga ampe mota, nhwalo nnongi chakaka."

3 Mika ngamujhichila majhe mundo ipande ya madine gha feza elufo jhimo na miya jhimo na majhe ngalongila, "Kulapii kunapile kwangampata jhe, ipande yenie nibheka kubhehe ya Bhambo Chapanga na peniya kutendekeya kinyagho chukubhacha nu kukilima madine gha feza kunhwalo gwino. Deleno ngita nimujhichila mwenga madine gheniya gha feza." 4 Mika ngamujhichila majhe mundo ipande ya madine gheniya, majhemundo ghapokila ipande miya ibhele ya madine gheniya na ngampila yukubhacha inyagho cha nkongo, ngakilima madine gha feza gheniya. Kinyagho chenio ngakibhekwa munyumba jha Mika.

5 Mika akibha na chehemo jhake jhukunyinamii ichapanga. Ngatendikiya kichibao cha mpiya litambiko pamonga na inyagho ichapanga, peniya ngammeka mwana mundo jhumo munalome kubhehe mpiya litambiko gwake. 6 Machiko gheniya pakibha jhe munahota nkolongwa pakilambo chuku Ichilahele. Yene kila mundo ngatenda chochoha chakipala jwenio.

7 Kipinde cheche pakibha na kangombo jhumo Nnabhe, kubomane ku Betelehemo kukilambo chuku Yuda. 8 Kangombo jwenio ngabhoka ku Betelehemo, kukilambo chuku Yuda ngajhenda kupalaha chehemo jhenge pukutama. Mukutyanga kwake ngaika pakajhake Mika, kukilambo chuku itombe yuku Efulaimo. 9 Mika ngankonya, "Mwe, mihumii koo?"

Na jwenio ngajhanguu, "Nenga Nalabhe, nihumii kumuche gwa Betelehemo kukilambo chuku Yuda. Nipalaha chehemo jhu kutama."

10 Mika ngannobholila, "Ntame pamonga na nenga mma ngita matate na mapiya litambiko bhango, nannimpela ipande kome ya madine gha feza kila chaka pamonga na ngobho na kila chimighana." 11 Kangombo jwenio Nnabhe ngajheketila kutama na Mika nu kubhehe ngita jhumo ya yana ya Mika. 12 Mika ngampila mota kangombo jwenio kubhehe mpiya litambiko gwake, na ngatama kajha kwa Mika. 13 Peniya, Mika ngalonge, "Ngohe manye kubhehe Bhambo Chapanga atendii ghambone, nhwalo ambii kangombo hojho Nnabhe abhe mpiya litambiko gwango."