1 Lichiko lyene, Debola na Balake mwana gwa Abinoamo ngabhajhemba nhwambo ghongo.

2 Ilongoche bha bhando bha Akaichilahele ngabhalongwicha bhando kujhenda kungondo,

bhando ngabhahikita changakangwa.

Tunnomba mwe ma Bhambo Chapanga!

3 Jhokanikiya ma akanahota nkolongwa!

Jhokanikiya ilongoche,

Naninyembela Bhambo

Chapanga jwa Akaichilahele.

4 Ma Bhambo Chapanga, pummokita kwenio kukitombe cha Seire,

Punhelila kuitombe ya Edomo, kilambo ngakilendima,

ula ngaikomita.

ena, mahunde ngaghaletita ula.

5 Itombe ngainyukwinyika palonge jha Bhambo Chapanga,

Ena, ata kitombe chela cha Chinae palonge jha Bhambo Chapanga.

6 Mu machiko gha Shamugale mwana jwa Anate,

ngohe machiko gha Yaele,

mwanja jhukuchucha ilekwitwe mu ilambo,

Bhando bhibhabhii umwanja ngabhabhetukila mu upele.

7 Akolo muche ngabhalekita kulema mu mighonda jhabhe,

ade pumbitila ne na Debola,

puhikita kubhehe nalinyongolo lya ku Ichilahele.

8 Ngibhaijhinamila ichapanga ya kighene,

ngaipitila ngondo mu kilambo.

Nambo bhakibha jhe nu mundo jhuna ngao hilu nkoha,

pakate jha bhando elufo alobaine bhaku Ichilahele!

9 Nape ichima ilongoche ya ku Ichilahele,

pamonga na bhala bhibhaikita bhene changakangwa pakate jha bhando,

munnombe Bhambo Chapanga!

10 Kila jhumo ajhokanikiye, mwe bhimihobhoke maponda mahuo,

unyokanikiya mangota mina ilembwe,

bhimitama mu mipacha jha bei ngolongwa jhimitamii mu maponda gheniya.

mangota bhimityanga undela unyokanikiye.

11 Jhokanikiya malobhe bhibhajhemba bhibhabhii pahina na ilibha ya mache.

Bhichimulila ilebhe ikolongwa yateii Bhambo Chapanga,

bhilonge namuna jha akakomana ngondo bha Akaichilahele chibhanhotwila akamakoko bhabhe

peniya, bhando bha Chapanga ngabhajhenda mu milyango jha muche.

12 "Jhimuka Debola!

Jhimuka nnyembe nhwambo!

Jhimuka Balake mwana gwa Abinoamo,

bhatole bhando bhino bhimapukile."

13 Bhando bhibhahobholeka ngibhabhujha ku ilongoche yabhe.

Bhando bha Chapanga ngabhammujhila kupala kukomana na akamakoko bhabhe.

14 Ku Efulaimo ngabhaika akakomana ngondo lya Akameleke,

Benjamine abhii pakate jhabhe,

kubhoka ku Makile ngabhaulwika ilongoche ikolongwa ya akakomana ngondo,

na ku Chabulone ngabhaika akatumiche ikolongwa.

15 Akanahota bhuku Ichakale bhakibha pamo na Debola,

ena, Ichakale akibha pamo na Balake,

ngabhamtukila mbilo ade kululambo,

nambo likabila lya Leubene bhateila kuholelaholela hake.

16 Kilebhe ghane ntamita unyuma mu ibhajha ya mambelele?

Bho, kujhokanikiya malobhe gha bhibhalucha bhakemita mambelele?

Ena bhando bha likabila lya Leubene ngabhapechangina,

bhateila kuholelaholela kujhenda amu.

17 Bhando bha likabila lya Geliade likatamite kwiye jha lukemba Yoludane.

Kilebhe ghane bhando bha likabila lya Dane liighalike mu mele?

Na bhando bha likabila lya Ashele bhakibha nuu muupele jha mbwane,

ntamingine tu muupele jha bandale.

18 Bhando bha likabila lya Chabulone na Nafutale, ngabhajheketila bhene ata kuhwe ku ngondo,

ata mumipaka jha mighonda.

19 Kwenio ku Taanake, muupele jha chembwe cha Megido,

akanahota akakolongwa ngabhaika kukomana,

na akanahota akakolongwa bhaku Kaanane,

nambo bhakatoi jhe kilebhe chochoha madine gha feza.

20 Ngita hela ndondo yukunane kwa Chapanga itukomanila kunhwalo gwito,

ngita ndondo ipetita panane jhito kukomana na Sisela,

21 lukemba Kishone ngalwajhola,

nhwalo maheluko gha mache twe gha Kishone.

Lola lukemba lwa makacho,

lukemba Kishone,

ena, nanyenda nnonge kwa makakala!

22 Kwa nhindo gwa ipagha ya falache ngaitimbita,

falache yake ghina makakala pighabhutuka kuhumii kungondo.

23 Ntumiche jwa kunane kwa Chapanga ilonge naha,

"Mujhopela ghanganandela muche gwa Meloze,

mangatenda ubhiche jhe pimajhope ghanganandela,

nhwalo bhankantangatii jhe Bhambo Chapanga,

kinyume cha bhina makakala."

24 Nambo Yaele nhwanamundo Hebere Nkene, ndi jwapakubhe niichima hake akakeghe bhoha,

abhii niichima kupeta akakeghe bhoha bhibhatama mu mahema.

25 Sisela akannyopite mache, nambo ngampila mabhele,

ngampila siaghe mubakule jha ichima.

26 Kwa lubhoko lumo ngakamwila kipekepeke cha lihema,

na lubhoko lwalelo akibha na nyundo,

ngankong'ondila Sisela palibhonge ngo nu ngahanjulina menyemenye.

27 Sisela ngalitita, ngagwila,

ngagholwika nuu pamagholo ghake.

Peniya pajhinima ndi,

akibha ajhomwike!

28 "Majhe gwa Sisela ngalingulila palidilicha,

kupete palidilicha ngalelita, alongila,

‘Kilebhe ghane mutuka jhake ikibha na kiyoto kuika?

Nhwalo ghane ihindo ya mutuka yake ijhokanikike jhe?’

29 Ngabhanyangwila akakeghe bhina malango,

ngalitulila pipipi kwa lijhangulilo lyenio.

30 ‘Pange bhipalaha ilebhe yukupukila nu kughabhana,

kamwale jhumo amu bhabhele kwa kila nkomana ngondo,

ligwanda lya mangoma gha limbelele kwa nhwalo jha Sisela.

Magwanda ghighalembelekwii kwa nyuche twe na mikufo kunhwalo jha ntandala gwango!’

31 Mwe ma Bhambo Chapanga, akamakoko bhino bhoha bhapulutuka puu!

Nambo akakoche bhino bhabha ngita lyobha lyu nhwana, pulihembuka kwa makakala."

Peniya, kilambo ngakibhila teeke kwa kipinde cha yaka makome ncheche.