Yohane 20

Yecho apitii Maliya jwa kilambo cha Magidala

11 Maliya akajhemite panja jha mambe kongo abhii mahole chwii. Pakibha alelita, ajhakulita na kulingulila nkate jha umambe, 12 ajhakwabhona akatumiche bha kunane kwa Chapanga bhabhele bhubhahwalita ngobho nhuo ya mbumbumbu, bhakibha pala pukabhekwite yegha jha Yecho, jhumo upandi gwa ku muto na jhonge upandi gwa ku magholo.

13 Bhahe, akatumiche bha kunane kwa Chapanga bhala bhajhakunkonya Maliya, "Majhe, milela nike?" Maliya ajhakwajhanguu, "Bhayungite Bhambo gwango, na kwale bhamekite kojhe!"

14 Maliya palongila malobhe gheniya, ajhakughalambuka kuyeto na ajhakummona Yecho ajhemite peniya, nambo akaumanyi ndeka ngita akibha ndi Yecho.

15 Yecho pankonyita, "Majhe, nhwalo gwa nike milela? Mipalaha ghane?" Maliya ahambwika alonge na ntunja buchitane, ajhakunnobholela, "Munahota, anda mutoile, unnobholele, kojhe kumumekite, nyende nikantole."

16 Yecho ajhakunnobholela, "Maliya!"

Maliya ajhakughalambuka ajhakunnobholela kwa Kiebulaniya, "Rabone!" Mana jhake, "Mmola."

17 Yecho ajhakunnobholela, "Ungotoka kungamula, nhwalo namela ninajhenda jhe kunane kwa Tate gwango. Nambo nnyende kwa akalongo bhango na makalobholele, nijhenda kunane kwa Chapanga kwa Tate gwango na mangota helahela Tate gwino, Chapanga gwango helahela Chapanga gwino."

18 Bhahe, Maliya jwa ku kilambo chaku Magidala ajhakukelebhuka na kwalobholela bhabholwa anda akongine na Bhambo, akabhalobhalile ngita chela Yecho channobholile.